ອພສ ສາລະວັນ ຕີລາຄາການເຜີຍແຜ່ ທຳມະນູນສົງ

  ພາຍຫຼັງອົງການພຸດທະສາດສະໜາສຳພັນລາວ (ອພສ) ແຂວງສາລະວັນໄດ້ລົງເຜີຍແຜ່ທຳມະນູນສົງລາວສະບັບປັບປຸງປີ 2018 ໃຫ້ກັບ ອພສ ເມືອງ 5 ຕົວເມືອງ ຄື: ເມືອງສາລະວັນ, ເລົ່າງາມ, ວາປີ,ລະຄອນເພງ ແລະ ເມືອງ ຄົງເຊໂດນ, ພ້ອມທັງໄດ້ມອບກາປະທັບໃຫ້ຫ້ອງການ ອພສ ແຕ່ລະເມືອງໄດ້ນຳໃຊ້ເຂົ້າໃນໜ້າທີ່ວຽກ ງານຂອງສົງມາໃນທ້າຍອາທິດຜ່ານມານີ້ຢູ່ທີ່ວັດໄຕຣພູມ ເມືອງຄົງເຊໂດນ ແຂວງສາລະວັນ ໄດ້ສະຫຼຸບ ແລະຕີລາຄາຜົນສຳເລັດໃນການເຜີຍແຜ່ທຳມະນູນສົງ ໂດຍເປັນກຽດເຂົ້າຮ່ວມຂອງພະຫຼັກຄຳລັດຕະນະຄຸນາຈານຍາທ່ານໃຫຍ່ ສອນໄຊ ແກ້ວເມືອງໃຕ້ກຳມະການສູນກາງ ອພສ, ເຈົ້າຄະນະແຂວງສາລະວັນ, ມີພະອາຈານຮອງເຈົ້າຄະນະແຂວງ, ຄະນະກຳມາທິການຕ່າງໆຂັ້ນເມືອງ, ແຂວງ ພ້ອມດ້ວຍຫ້ອງການທີ່ກ່ຽວຂ້ອງ ອ້ອມຂ້າງເມືອງເຂົ້າຮ່ວມ.

ໃນພິທີໄດ້ມີການປຶກສາຫາລື ຄົ້ນຄວ້າການເຜີຍແຜ່ທຳມະນູນ ສົງລາວ ສະບັບປັບປຸງປີ 2018, ມີທັງໝົດ 13 ໝວດ, 76 ມາດຕາ ແລະຄໍາແນະນໍາວ່າດ້ວຍການຈັດ ຕັ້ງປະຕິບັດທັມມະນູນສົງລາວກ່ຽວກັບຜູ້ທີ່ຈະເຂົ້າບວດ, ການເອີ້ນຊື່ນຳໜ້າບຸກຄະລາກອນສົງ, ເຄື່ອງໝາຍ, ທຸງ ແລະຕາປະທັບເພື່ອໃຫ້ມີຄວາມເຂົ້າໃຈຖືກຕ້ອງ, ຊັດເຈນ ແລະເປັນເອກະພາບກັນ ຈັດຕັ້ງປະຕິບັດໃນຂອບເຂດທົ່ວປະເທດ ແລະໄດ້ຕີລາຄາສູງຕໍ່ຜົນ ສຳເລັດໃນການລົງເຜີຍແຜ່ ແລະ ການປະກາດ, ແຕ່ງຕັ້ງກຳມາທິ ການຕ່າງໆ,ພ້ອມທັງມອບກາປະ ທັບເຂົ້ານຳໃຊ້ໃນໜ້າທີ່ວຽກງານ, ຊຶ່ງບັນດາຄະນະກຳມາທິການຕ່າງໆ ກໍ່ປະກອບຄຳຄິດເຫັນກ່ຽວກັບ ການຈັດຕັ້ງປະຕິບັດທຳມະນູນສົງ ລາວ ເພື່ອໃຫ້ເປັນເອກະພາບກັນ ໃນການຈັດຕັ້ງປະຕິບັດວຽກງານ ໂດຍສະເພາະ 4 ໜ້າວຽກຂອງ ກຳມາທິການຂັ້ນເມືອງຄື: ກຳມາທິການປົກຄອງສົງໃນການຄຸ້ມຄອງພະສົງໃນຂອບເຂດຄວາມຮັບຜິດຊອບ, ວຽກງານການສຶກສາສົງ,ການເຜີຍແຜ່-ປະຕິບັດກຳມະຖານ, ວຽກງານກຳມາທິການສາທາລະນຸປະການກ່ຽວກັບການປະຕິສັງຂອນ ແລະການກໍ່ສ້າງວັດວາ ອາຮາມ,ນອກນັ້ນຍັງຮ່ວມກັນຄົ້ນຄວ້າບັນດາເອກະສານທີ່ສຳຄັນຕ່າງໆ ແລະໄດ້ຍົກເອົາບັນຫາການ ຍ້າຍພະສົງ-ສຳມະເນນໃຫ້ເປັນລະບົບລະບຽບກ່ອນຈະຮັບ ແລະຍ້າຍ ຄວນໄດ້ມີການຕິດຕາມເອກະສານທີ່ກ່ຽວຂ້ອງ, ການບວດ-ການສີກ ຫຼື ຈະເຄື່ອນໄຫວໄປຕ່າງປະເທດ ແລະອື່ນໆ ຄຽງຄູ່ກັນການເຜີຍແຜ່,ການປະຕິບັດແມ່ນຈະໄດ້ມີການຕິດຕາມ, ປະເມີນຜົນການປະຕິບັດທຳມະນູນສົງຄຽງຄູ່ກັນໄປ.

ໃນໂອກາດດຽວກັນນັ້ນ,ຍາທ່ານໃຫຍ່ເຈົ້າຄະນະແຂວງສາລະວັນ ໃຫ້ຮູ້ວ່າ: ການເຜີຍແຜ່ທຳມະນູນສົງຄັ້ງນີ້ແມ່ນມີຄວາມໝາຍຄວາມສຳຄັນຫຼາຍຕໍ່ກັບອົງການພຸດທະສາດສະໜາສຳພັນລາວ ແຂວງສາລະວັນກໍ່ຄືບັນດາເມືອງ ເປັນການປັບປຸງກົງຈັກທີ່ສຳຄັນໃນການຄຸ້ມຄອງພະສົງ ແລະບໍລິຫານວຽກງານຕ່າງໆ ໄດ້ຮັບການປັບປຸງໃນດ້ານວິທີການເຮັດວຽກ ງານຂອງພະສົງຄຽງຄູ່ໄປກັບການນຳພາຂອງພັກ-ລັດ,ນອກນັ້ນຍັງເຮັດໃຫ້ການຈັດຕັ້ງປະຕິບັດວຽກ ງານມີຄວາມເຂັ້ມແຂງ ແລະເປັນໄປຢ່າງມີລະບົບລະບຽບແນໃສ່ ເຕົ້າໂຮມຄວາມສາມັກຄີຂອງພະສົງກັບຍາດໂຍມຮູ້ຈັກເຄົາລົບກົດໝາຍບ້ານເມືອງ ແລະພະສົງກໍໍ່ເດີນຕາມຫຼັກພະທຳມະ,ວິໄນຂອງ ສາດສະໜາ ,ທັງໄດ້ເນັ້ນໜັກຈະສືບຕໍ່ເອົາໃຈໃສ່ຜັນຂະຫຍາຍວຽກ ງານຕ່າງໆ ທີ່ໄດ້ຮັບການປັບປຸງໃຫ້ທົ່ວສັງຄົມຮັບຮູ້, ເຂົ້າໃຈຢ່າງກວ້າງຂວາງ,ທັງພະສົງ ແລະອອກຕົນຍາດໂຍມ.

 -----------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົ

แชร์