ຫວຽດນາມຈະຫຼຸດພື້ນທີ່ປູກເຂົ້າ 5 ແສນເຮັກຕາ

  ສສ ຫວຽດນາມ ປັບແຜນ ການກະສິກຳໃໝ່ຫຼຸດພື້ນທີ່ປູກເຂົ້າລົງ 5 ແສນເຮັກຕາ ( 3,1 ລ້ານໄຮ່) ຫັນມາປູກພືດເສດຖະກິດທົດແທນຫຼຸດຄວາມສ່ຽງ.ຕາມຂ່າວຕ່າງປະເທດລາຍ ງານວ່າ ທ່ານ ຫວຽນ ຊວນກວງ ລັດຖະມົນຕີວ່າການກະຊວງກະສິກຳ ແລະພັດທະນາຊົນນະບົດຫວຽດນາມລະບຸວ່າລັດຖະບານກຳລັງພິຈາລະນາປັບພື້ນທີ່ເພາະປູກເຂົ້າເພື່ອປູກພືດເສດຖະກິດອື່ນທົດແທນເຊັ່ນ: ໝາກພ້າວເນື່ອງຈາກການຜະລິດເຂົ້າເພື່ອສົ່ງອອກພຽງຢ່າງດຽວມີຄວາມ ສ່ຽງສູງ ແລະບໍ່ສາມາດສົ່ງເສີມການເຕີບໂຕທາງເສດຖະກິດຂອງຫວຽດນາມໄດ້ຢ່າງມີປະສິດທິພາບ,ຊຶ່ງລັດຖະບານຫວຽດນາມວາງແຜນຈະປະສານງານກັບຊາວກະສິກອນເພື່ອຫຼຸດພື້ນທີ່ປູກເຂົ້າລົງ 5 ແສນເຮັກຕາຈາກເດີມທີ່ມີຢູ່ 4,1 ລ້ານເຮັກຕາຊຶ່ງຈະສົ່ງຜົນເຮັດໃຫ້ຜົນຜະລິດເຂົ້າຫຼຸດລົງປີລະ 3-4 ລ້ານໂຕນ ແຕ່ຢູ່ໃນລະດັບທີ່ບໍ່ກະທົບຕໍ່ຄວາມໝັ້ນຄົງທາງອາຫານຂອງປະເທດ.

ນອກຈາກນີ້ຫວຽດນາມຍັງມຸ້ງເນັ້ນການພັດທະນາເພື່ອເພີ່ມມູນຄ່າຂອງເຂົ້າໃຫ້ຫຼາຍຂຶ້ນ ໂດຍ ສະເພາະການຜະລິດນໍ້າມັນລໍາເຂົ້າທີ່ໃຫ້ຜົນຕອບແທນທາງເສດຖະກິດສູງກວ່າທັງນີ້ຫວຽດນາມສົ່ງອອກເຂົ້າສູງເປັນອັນດັບທີ 3 ຂອງໂລກຮອງຈາກອິນເດຍ ແລະໄທ ໂດຍປີ 2018 ມີປະລິມານສົ່ງອອກເຂົ້າຫຼາຍກວ່າ 6 ລ້ານໂຕນຄິດເປັນມູນຄ່າຫຼາຍກວ່າ 315 ລ້ານໂດລາສະຫະລັດເພີ່ມຂຶ້ນ 16% ເມື່ອທຽບກັບໄລຍະເວລາດຽວກັນຂອງປີ 2017.

----------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์