9 ເດືອນ ຜົ້ງສາລີ ສ້າງບ້ານວັດທະນະທໍາ ໄດ້ 13 ບ້ານ

  ໃນໄລຍະ 9 ເດືອນຜ່ານມາ ນີ້ຂະແໜງວັດທະນະທໍາແຂວງ ຜົ້ງສາລີສາມາດສ້າງບ້ານວັດທະນະທໍາໄດ້ 13 ບ້ານ ແລະສ້າງຄອບຄົວວັດທະນະທໍາໄດ້ 1.149 ຄອບຄົວ, ຊຶ່ງມາຮອດປະຈຸບັນທົ່ວແຂວງ ມີບ້ານວັດທະນະທໍາທັງໝົດ 181 ບ້ານກວມ 35,08%, ຄອບວັດທະນະທໍາ 14.646 ຄອບຄົວ ກວມ 42%.

  ອີງຕາມຂໍ້ມູນຈາກພະແນກຖະແຫຼງຂ່າວວັດທະນະທໍາ ແລະທ່ອງ ທ່ຽວແຂວງຜົ້ງສາລີໃຫ້ຮູ້ວ່າ:ວຽກງານການສ້າງຄົນ,ຄອບຄົວ,ບ້ານ,ກຸ່ມບ້ານ,ກົມກອງວັດທະນະທໍາແມ່ນອີງໃສ່ 5 ມາດຖານເງື່ອນໄຂຂອງຄອບຄົວວັດທະນະທໍາເຊັ່ນ:ຕ້ອງມີເຮືອນຢູ່ເປັນຂອງຕົນເອງແຕ່ເຄິ່ງຖາວອນຂຶ້ນໄປ,ມີອາຊີບໝັ້ນທ່ຽງຖືກຕ້ອງຕາມກົດໝາຍ ແລະກຸ້ມກິນຕ້ອງເປັນຄອບຄົວສາມັກຄີຖືກຕ້ອງປອງດອງກັນສະເໝີພາບ ແລະບໍ່ສ້າງຄວາມຫຍຸ້ງຍາກໃຫ້ແກ່ອໍານາດການປົກຄອງ,ຕ້ອງເອົາໃຈໃສ່ລ້ຽງລູກໃຫ້ຖືກຫຼັກອານາໄມອົບຮົມສັ່ງສອນລູກເປັນຄົນມີຄວາມກະຕັນຍູຕໍ່ຜູ້ມີພະຄຸນ ແລະ ສົ່ງລູກໃຫ້ໄດ້ສຶກສາຮໍ່າຮຽນ; ຕ້ອງເປັນຄອບຄົວທີ່ດໍາລົງຊີວິດປອດໃສຂາວສະອາດບໍ່ເຊື່ອຖືງົມງວາຍ,ຮັກສາວັດທະນະທໍາຮີດຄອງປະເພນີອັນດີງາມຂອງຊາດ ແລະນັບຖືລະບຽບກົດໝາຍ;ຕ້ອງເປັນຄອບຄົວທີ່ມີຄວາມສາມັກຄີຊ່ວຍເຫຼືອເພື່ອແຜ່ເຊິ່ງກັນ ແລະກັນພາຍໃນບ້ານປະກອບສ່ວນສາທາລະນະປະໂຫຍດຂອງບ້ານເມືອງ.

ສະໜັບສະໜຸນໂດຍ: HONDA

  ຜ່ານການຈັດຕັ້ງປະຕິບັດສ້າງຄອບຄົວ ແລະບ້ານວັດທະນະທໍາ ໃນ 9 ເດືອນຜ່ານມານີ້ ທົ່ວແຂວງ ສາມາດສ້າງບ້ານວັດທະນະທໍາໄດ້ 13 ບ້ານ, ຄອບຄົວວັດທະນະທໍາ 1.149 ຄອບຄົວ, ຊຶ່ງມາຮອດປະຈຸບັນທົ່ວແຂວງມີບ້ານວັດທະນະທໍາທັງໝົດ 181 ບ້ານ ກວມ 35,08%, ຄອບວັດທະນະທໍາ 14.646 ຄອບຄົວ ກວມ 42% ແລະພົນລະເມືອງ 64.111 ຄົນ, ຍິງ 34.716 ຄົນ.

 ສ່ວນແຜນການ 3 ເດືອນທ້າຍ ປີ 2019 ພະແນກຖະແຫຼງຂ່າວ ວັດທະນະທໍາ ແລະທ່ອງທ່ຽວ ແຂວງຜົ້ງສາລີຈະສືບຕໍ່ສ້າງບ້ານວັດທະນະທຳໃຫ້ໄດ້ 3 ບ້ານ, ຄອບຄົວວັດທະນະທໍາໃຫ້ໄດ້ 128 ຄອບຄົວ.

-----------------

ໜັງສືພິມເສດຖະກິດ-ສັງຄົມ

แชร์