ກີລາບານເຕະຄົນພິການລຸ່ມແມ່ນໍ້າຂອງ ຈັດຂຶ້ນທ້າຍເດືອນນີ້

  ໃນວັນທີ 15 ພະຈິກ ຜ່ານມາ ທີ່ນະຄອນຫຼວງວຽງຈັນ, ກະຊວງແຮງງານ ແລະສະຫວັດດີການສັງຄົມໄດ້ຈັດພິທີຖະແຫຼງຂ່າວກຽມເປັນເຈົ້າພາບຈັດການ ແຂ່ງຂັນກີລາເຕະບານຄົນພິການທາງສະໝອງ-ປັນຍາໃນປະເທດລຸ່ມແມ່ນໍ້າຂອງ ຄັ້ງທີ IX ຂຶ້ນໃນລະຫວ່າງວັນທີ 27-28 ພະຈິກ2019 ທີ່ສະໝາມກີລາເຈົ້າອານຸວົງ.

ທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະສະຫວັດດີການສັງຄົມ,ຮອງປະທານຜູ້ປະຈຳການປະທານຄະນະກຳມະການແຫ່ງຊາດເພື່ອຄົນພິການ ແລະຜູ້ອາຍຸສູງກ່າວວ່າ: ວຽກງານກີລາ-ກາຍຍະກຳລັດຖະບານຖືເປັນວຽກໜຶ່ງທີ່ສຳຄັນໃນການພັດທະນາຊັບພະຍາກອນມະນຸດທາງດ້ານສຸຂະພາບຮ່າງກາຍ ແລະຈິດໃຈ, ສ້າງໃຫ້ຄົນ ເຮົາມີຄວາມອົດທົນ, ເຂັ້ມແຂງ, ມີຄວາມເສຍສະຫຼະ, ມີລະບຽບວິໄນ, ມີນໍ້າໃຈຮັກຊາດເຮັດໃຫ້ສັງຄົມມີຊີວິດຊີວາ ແລະ ມີບັນຍາກາດເບີກບານມ່ວນຊື່ນ, ຊຶ່ງການ ຈັດການແຂ່ງຂັນກີລາຄົນພິການ ທາງສະໝອງ-ປັນຍາ ຄັ້ງທີ IX ນີ້ເປັນຄັ້ງທຳອິດທີ່ ສປປ ລາວ ໄດ້ຮັບກຽດເປັນເຈົ້າພາບຂອງບັນດາປະເທດລຸ່ມແມ່ນໍ້າຂອງ ໂດຍ ຜ່ານມາໄດ້ຈັດຢູ່ມີປະເທດໄທ, ສສ ຫວຽດນາມ, ກໍາປູເຈຍ ແລະ ມຽນມາ,ສໍາລັບການຈັດການແຂ່ງຂັນກີລາຄົນພິການທາງສະໝອງ-ປັນຍາຄັ້ງນີ້ແມ່ນມີຄວາມສຳຄັນ ແລະຈຳເປັນທັງເປັນການປະຕິບັດພັນທະສາກົນທີ່ ສປປ ລາວ ເປັນພາຄີອັນຈະເປັນໂອກາດດີທີ່ຄູຝຶກ,ວິທີການບໍລິຫານໃນການຈັດການແຂ່ງຂັນ ແລະນັກກີລາຄົນພິການທາງສະໝອງ-ປັນຍາຈະໄດ້ແລກປ່ຽນບົດຮຽນສະແດງຄວາມສາມາດຂອງຕົນສູ່ເວທີພາກພື້ນ ແລະ ສາກົນນັບມື້ນັບກວ້າງອອກໄປເລື້ອຍໆ.

ຜ່ານມາວຽກງານກີລາຄົນພິການໄດ້ຮັບການເອົາໃຈໃສ່ພັດທະນານັບມື້ຫຼາຍຂຶ້ນ ໂດຍສະເພາະລັດຖະບານໄດ້ແຕ່ງຕັ້ງຄະນະຮັບຜິດຊອບພາລາແລມປິກແລະສະເປໂຊໂອແລມປິກເພື່ອເຮັດໜ້າທີ່ສົ່ງເສີມໃຫ້ຄົນພິການໄດ້ຫຼິ້ນກີລາຕາມເງື່ອນໄຂ ແລະຄວາມສາມາດຂອງຄົນພິການແຕ່ລະປະເພດຊຶ່ງກີລາຄົນພິການທາງສະໝອງ ແລະປັນຍາກໍ່ເປັນກີລາປະເພດໜຶ່ງທີ່ໄດ້ມີການເຄື່ອນໄຫວຝຶກແອບ ແລະເຂົ້າຮ່ວມແຂ່ງຂັນໃນລະດັບປະເທດ,ອາຊຽນ,ຂົງເຂດອາຊີ-ປາຊິຟິກ ແລະລະດັບໂລກມາຫຼາຍຄັ້ງເຊັ່ນ:ກີລາພາລາແລມປິກ ແລະສະເປໂຊໂອແລມປິກໄດ້ສ້າງຊື່ສຽງໃຫ້ແກ່ປະເທດຊາດຈາກການເຂົ້າຮ່ວມແຂ່ງລະດັບໂລກທີ່ນະຄອນຫຼວງປັກກິງ ສປ ຈີນ,ລອດສແອນເຈີລິດ ສະຫະລັດອາເມລິກາ ແລະນະຄອນອາບູດາບີສະຫະລັດອາຣັບເອມີເຣດຊຶ່ງສາມາດຍາດໄດ້ 5 ຫຼຽນຄຳ, 3 ຫຼຽນ ເງິນ ແລະ 6 ຫຼຽນທອງແດງ.

ສະໜັບສະໜຸນໂດຍ: HONDA

ໂອກາດດັ່ງກ່າວຮອງປະທານຜູ້ປະຈຳການຄະນະກຳມະການແຫ່ງຊາດເພື່ອຄົນພິການ ແລະຜູ້ອາຍຸສູງໄດ້ຮຽກຮ້ອງມາຍັງບັນດາກະຊວງ,ອົງການ,ບໍລິສັດຫ້າງຮ້ານຕ່າງໆ ຈົ່ງໄດ້ຮ່ວມແຮງຮ່ວມໃຈກັນເປັນເຈົ້າພາບຮ່ວມກັນ ແລະໃຫ້ການສະໜັບສະໜູນທາງດ້ານທຶນຮອນ,ອຸປະກອນການກີລາເຂົ້າໃນການຈັດການແຂ່ງຂັນກີລາບານເຕະຄົນພິການທາງສະໝອງ-ປັນຍາໃນຄັ້ງນີ້ຕາມເງື່ອນໄຂ ແລະຄວາມສາມາດຂອງແຕ່ລະພາກສ່ວນ,ຊຶ່ງການປະກອບສ່ວນຊ່ວຍເຫຼືອຂອງບັນດາທ່ານຈະເປັນການສ້າງໂອກາດໃຫ້ເດັກຜູ້ດ້ອຍໂອກາດໄດ້ຮັບການພັດທະນາ ແລະມີສ່ວນຮ່ວມກິດຈະກຳທາງສັງຄົມນັບມື້ຫຼາຍຂຶ້ນຊຶ່ງສອດຄ່ອງກັບທັດສະນະຂອງພັກແລະລັດຖະບານທີ່ວ່າ:“ສ້າງຄວາມສາມັກຄີປອງດອງສີວິໄລ ແລະຍຸຕິທຳ” ໃຫ້ປະກົດຜົນເປັນຈິງເທື່ອລະກ້າວ.

---------------------

ພາບ ແລະຂ່ວຈາກ: ໜັງສືພິມເສດຖະກິດ-ສັງຄົມ

แชร์