ກອງປະຊຸມໂຕະມົນຈະຈັດຂື້ນທີ່ຫຼວງພະບາງ

 ວັນທີ 13 ພະຈິກ 2019 ທີ່ນະຄອນຫຼວງວຽງຈັນ ກະຊວງແຜນການ ແລະການລົງທຶນ, ລັດຖະບານລາວ ແລະອົງການສະຫະປະຊາຊາດເພື່ອການພັດທະນາໄດ້ຈັດພິທີພົບປະກັບສື່ມວນຊົນເພື່ອກຽມຈັດກອງປະຊຸມໂຕະ 2019 ຂຶ້ນໃນລະຫວ່າງວັນທີ 25-26 ພະຈິກ ທີ່ຈະມາເຖິງນີ້ທີ່ນະຄອນຫຼວງພະບາງ ແຂວງຫຼວງພະບາງ ໂດຍການ ເປັນປະທານຂອງທ່ານ ກິແກ້ວ ຈັນທະບູຣີ ຮອງລັດຖະມົນຕີກະຊວງແຜນການ ແລະ ການລົງທຶນ, ທ່ານ Jan Delbaere ຮັກສາການຜູ້ປະສານງານອົງການສະຫະປະຊາຊາດທັງເປັນຫົວໜ້າອົງການ ອາຫານໂລກ ປະຈໍາ ສປປ ລາວ ພ້ອມດ້ວຍແຂກຖືກເຊີນເຂົ້າຮ່ວມ.

 

 ກອງປະຊຸມໂຕະມົນປະຈຳປີນີ້ຈະໄດ້ທົບທວນຄວາມຄືບໜ້າໃນການຈັດຕັ້ງຜັນຂະຫຍາຍຜົນຂອງກອງປະຊຸມໂຕະມົນປີຜ່ານມາພ້ອມທັງປຶກສາຫາລືກ່ຽວກັບເນື້ອໃນຕົ້ນຕໍຂອງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ພ້ອມຍົກ 4 ບັນຫາຫຼັກຂຶ້ນມາປຶກສາຫາລືເປັນຕົ້ນຜົນກະທົບຂອງການຫຼຸດພົ້ນອອກຈາກສະ ຖານະພາບການເປັນປະເທດດ້ອຍພັດທະນາຕໍ່ກັບວຽກງານການຄ້າ, ການຊ່ວຍເຫຼືອທາງການເພື່ອການພັດທະນາ ແລະໂອກາດການເຂົ້າຫາແຫຼ່ງທຶນຕ່າງໆໃນໄລຍະຜ່ານມາ, ການຕິດຕາມ ແລະລາຍງານການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ, ການເຊື່ອມສານວຽກງານການຫຼຸດຜ່ອນຄວາມສ່ຽງທີ່ເກີດຈາກໄພ ພິບັດເຂົ້າໃນຂະບວນການວາງແຜນແຫ່ງຊາດ ແລະຜົນກະທົບຂອງການປ່ຽນແປງດິນຟ້າອາກາດຕ່າງກັບການພັດທະນາລວມທັງການຈັດຕັ້ງຜັນຂະຫຍາຍຍຸດທະສາດການເຕີບໂຕສີຂຽວຂອງ ສປປ ລາວ.

ສະໜັບສະໜຸນໂດຍ: ສ່ວນບຸກຄົນ

------  

 ທ່ານ ກິແກ້ວ ຈັນທະບູຣີ ກ່າວວ່າ: ກອງປະຊຸມຄັ້ງນີ້, ຈະເປັນເວທີໆມີຄວາມສຳຄັນຫຼາຍສຳລັບລັດຖະບານ ແຫ່ງ ສປປ ລາວແລະບັນດາຄູ່ຮ່ວມພັດທະນາໃນການກໍານົດກົນໄກ ແລະວິທີການໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ສໍາລັບທ້າຍສະໄໝໂດຍສະເພາະຄວາມຕ້ອງການໃນການເພີ່ມທະວີການເປັນຄູ່ຮ່ວມເພື່ອພັດທະນາທີ່ມີປະສິດທິຜົນ, ການເຕີບໂຕແບບສົມສ່ວນ ແລະຍືນຍົງ ແລະການກະກຽມສ້າງແຜນພັດທະນາ 5 ປີ ຄັ້ງທີ IX.

ສະໜັບສະໜຸນໂດຍ: HONDA

-----

 

  ທ່ານ Jan Delbaere ກ່າວຕື່ມວ່າ: ການຂັບເຄື່ອນດ້ວຍການເຕີບໂຕທາງດ້ານເສດຖະກິດທີ່ແຂງແຮງ ແລະການປັບປຸງດ້ານການສຶກສາ ແລະສາທາລະນະສຸກຢ່າງວ່ອງໄວ ສປປ ລາວ ເປັນປະເທດໜຶ່ງຂອງຫຼາຍໆປະເທດທີ່ປະຕິບັດໄດ້ດີທີ່ສຸດສໍາລັບການຫຼຸດພົ້ນອອກຈາກສະຖານະພາບການເປັນປະເທດດ້ອຍພັດທະນາໃນປີ 2024.

________

ຂຽນໂດຍ: ຟ້າ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์