ຂຸດໜອງລ້ຽງປາຂາຍ ສ້າງລາຍຮັບເຂົ້າຄອບຄົວສິບລ້ານກວ່າກີບຕໍ່ເດືອນ

  ການສ້າງເສດຖະກິດຄອບຄົວຂອງປະຊາຊົນລາວບັນດາເຜົ່າອາດຈະບໍ່ຄືກັນ ແລະມີຜົນສຳເລັດທີ່ແຕກຕ່າງກັນເພາະວ່າຕ້ອງອີງໃສ່ສະພາບຄວາມເປັນຈິງຂອງແຕ່ລະຄອບຄົວທີ່ມີທາງເລືອກຂອງໃຜມັນໃນການສ້າງລາຍຮັບເຂົ້າຄອບຄົວເພື່ອເຮັດໃຫ້ຫຼຸດພົ້ນອອກຈາກຄວາມທຸກຍາກຄືດັ່ງຄອບຄົວທ່ານ ບຸນຕຽງ ຈັນທະວີ ປະຈຸບັນຢູ່ບ້ານພູເຄືອ ເມືອງນາໝໍ້ ແຂວງອຸດົມໄຊ ທີ່ສ້າງເສດຖະກິດ ຄອບຄົວດ້ວຍການລ້ຽງປາໃນ ໜອງຂາຍເປັນສິນຄ້າຈົນສາມາດ ເຮັດໃຫ້ຄອບຄົວມີລາຍຮັບ 10 ລ້ານກວ່າກີບຕໍ່ເດືອນ.

ສະໜັບສະໜຸນໂດຍ: HONDA

  ທ່ານ ບຸນຕຽງ ວ່າ: ປະຈຸບັນອາຊີບແມ່ນເປັນຄູສອນປະຖົມສົມບູນບ້ານພູເຄືອເມືອງນາໝໍ້ ແຂວງອຸດົມໄຊ, ອາຊີບເສີມເຮັດໄຮ່, ເຮັດສວນປູກສາລີ, ແຮງງານຫຼັກມີຜົວ ເມຍ ແລະລູກ, ຊີວິດການເປັນຢູ່ກໍ່ ຍັງຂາດໆເຂີນໆພໍແຕ່ກຸ້ມຢູ່ກຸ້ມກິນ ໄປວັນໆເທົ່ານັ້ນມີຄວາມລໍາບາກ ຫຼາຍ, ເມື່ອເຫັນເປັນແນວນັ້ນແລ້ວ, ມາຮອດປີ 2016 ມາສັງເກດເຫັນວ່າບ້ານເມືອງມີການພັດທະນາເສດຖະກິດກໍມີການຂະຫຍາຍຕົວ,ຈຶ່ງໄດ້ຕັດສິນໃຈມາເຮັດໜອງລ້ຽງປາ,ຢຸດເຊົາການຖາງປ່າເຮັດໄຮ່,ເຮັດສວນ, ທຳອິດຂຸດ 1 ໜອງ, ດ້ວຍຕົ້ນທຶນຂອງຕົນເອງຈໍານວນເງິນ 40 ລ້ານກີບ, ຕໍ່ມາໄດ້ຂະຫຍາຍຕື່ມອີກໜຶ່ງໜອງໃນເວລານັ້ນເຫັນວ່າຕົ້ນທຶນຍັງບໍ່ພຽງພໍໃນການຂະຫຍາຍໜອງຕື່ມທາງຄອບຄົວຈຶ່ງໄດ້ປຶກສາຫາລືກັນໄປກູ້ຢືມເງິນນຳທະນາຄານສົ່ງເສີມກະສິກຳເມືອງນາໝໍ້ໃນຈຳນວນເງິນ 50 ລ້ານກີບຕື່ມອີກ.

 ການລ້ຽງປາໃນໜອງຂາຍນີ້ທຳອິດແມ່ນຍັງບໍ່ທັນມີປະສົບການເທື່ອລ້ຽງປີທຳອີກຍັງບໍ່ທັນໄດ້ຂາຍມາຮອດປີທີສອງຈຶ່ງໄດ້ເອົາປາອອກໄປຂາຍ, ໄດ້ເງິນປະມານ 30 ລ້ານກີບ ເຫັນວ່າມັນມີລາຍໄດ້ເຂົ້າ ຄອບຄົວດີ ຈຶ່ງໄດ້ຂະຫຍາຍໜອງ ຕື່ມອີກ ແລະກໍໄດ້ເອົາປາມາປ່ອຍ 20 ພັນໂຕ, ໃນການເອົາປານ້ອຍ ມາປ່ອຍລົງໃນໜອງ, ການໃຫ້ອາ ຫານປານ້ອຍ ທໍາອິດຕ້ອງໄປຊື້ຫົວ ອາຫານຝຸ່ນມາເກືອປາກ່ອນປະ ມານໜຶ່ງເປົ໋າ ຫຼືສອງເປົ໋າອີງຕາມ ປາມີນ້ອຍມີຫຼາຍ, ເມື່ອປາໃຫຍ່ ຂຶ້ນມາໄລຍະໜຶ່ງກໍໄດ້ນໍາເອົາຫົວ ອາຫານນ້ໍາເບີ 1 ມາເກືອເມື່ອໃຫຍ່ຂຶ້ນມາອີກເຮົາກໍຊື້ນ້ຳເບີ 2 ຈົນເຖິງເບີ 5, ເມື່ອປາໃຫຍ່ໄດ້ປະມານ 2 ໂຕຕໍ່ໂລຫາ 3 ໂຕຕໍ່ໂລ ເຮົາກໍສາມາດນຳອອກມາຈຳໜ່າຍໄດ້, ການຂາຍແມ່ນລາຄາຂາຍສົ່ງກິໂລລະ 18 ພັນກີບ ຂາຍຍ່ອຍແມ່ນກິໂລລະ 20 ພັນກີບ.

  ມາຮອດປະຈຸບັນນີ້ແມ່ນມີທັງໝົດ 3 ໜອງ ແລະໄດ້ປ່ອຍປານ້ອຍລົງທັງໝົດ 43,5 ພັນກວ່າໂຕ, ຂາຍໄດ້ປະມານ 80 ກວ່າລ້ານ ກີບຕໍ່ປີສະຖານທີ່ໆເອົາປາອອກ ໄປຈໍາໜ່າຍແມ່ນເອົາໄປສົ່ງຢູ່ຕະຫຼາດເມືອງນາໝໍ້ ແລະຈຳໜ່າຍໃຫ້ປະຊາຊົນພາຍໃນບ້ານພູເຄືອ, ປີໜຶ່ງສາມາດຂາຍໄດ້ສອງຊຸດ, ສະເພາະປີ 2019 ຄາດວ່າຈະໄດ້ ຂາຍປາ 8-9 ໂຕນ, ໃນລາຄາກິ ໂລລະ 18 ພັນ ໄດ້ເງິນຢູ່ປະມານ 160-170 ລ້ານກີບ.

ສະໜັບສະໜຸນໂດຍ: ສ່ວນບຸກຄົນ

 ການລ້ຽງປາຂາຍແມ່ນເປັນອາຊີບໜຶ່ງທີ່ສາມາດສ້າງລາຍຮັບເຂົ້າຄອບຄົວ ແລະເຮັດໃຫ້ຊີວິດການເປັນຢູ່ມີການປ່ຽນແປງຈາກເມື່ອກ່ອນຫຼາຍພໍສົມຄວນ,ລູກ ແລະເມຍກໍມີເວລາພັກຜ່ອນ, ມີເງິນໃຊ້ຈ່າຍໃນຄອບຄົວນອກຈາກນີ້ກໍຍັງໄດ້ຊື້ດິນເຮັດຟາມລ້ຽງງົວ ແລະປູກຫຍ້າລ້ຽງງົວຕື່ມອີກຊື້ລົດກະບະຄັນໜຶ່ງ, ລົດຈັກສອງຄັນມີເງິນສົ່ງ ເສີມລູກຫຼານໄປຮໍ່າໄປຮຽນ, ມີເງິນໄປປິ່ນປົວພະຍາດໃນເວລາເຈັບເປັນແລະມີເງິນໝູນວຽນໃຊ້ຈ່າຍຢູ່ພາຍໃນຄອບຄົວ.

  ແຜນຕໍ່ໜ້າຈະຈົກໜອງລ້ຽງປາຕື່ມຕາມເຫື່ອແຮງຄວາມສາມາດ ແລະຈົກໜອງນ້ອຍພໍໄດ້ລ້ຽງປາຂາຍຢູ່ບ້ານ ແລະຈະຂະຫຍາຍດິນປູກຫຍ້າ-ລ້ຽງງົວ, ລ້ຽງເປັດ, ໄກ່, ລ້ຽງໝູ ແລະພືດຜັກຕ່າງໆອີກ.

  ທ່ານ ນາງ ວັນລີ ສີປະເສີດ ຫົວໜ້າຫ້ອງການໂຄສະນາອົບຮົມ ເມືອງນາໝໍ້ ແຂວງອຸດົມໄຊ ເປັນຜູ້ທີ່ຮັບຜິດຊອບກຸ້ມບ້ານພູເຄືອໄດ້ຢັ້ງຢືນວ່າ: ໃນນາມເປັນຜູ້ທີ່ຮັບ ຜິດຊອບ ແລະລົງຊີ້ນຳໆພາຢູ່ໃນ ກຸ່ມບ້ານພູເຄືອນີ້ ມີບ້ານທັງໝົດ 8 ບ້ານ ເປັນຕົ້ນ ແມ່ນໄດ້ເວົ້າເລື່ອງການພັດທະນາທາງດ້ານ ເສດຖະກິດຄອບຄົວຂອງພໍ່ແມ່ປະຊາ ຊົນສ່ວນຢູ່ບ້ານພູເຄືອມີຄອບຄົວຂອງທ່ານ ບຸນຕຽງ ທະວີ ຄອບຄົວຂອງຜູ້ກ່ຽວແມ່ນມີຄວາມດຸໝັ່ນຂະຫຍັນພຽນມີຫົວຄິດປະດິດສ້າງໃນການສ້າງເສດຖະກິດຄອບຄົວ, ດ້ວຍການເຮັດໜອງລ້ຽງປາຂາຍເປັນສິນຄ້າ, ດັ່ງນັ້ນການຈັດຕັ້ງຂັ້ນເທິງມອບໃຫ້ຄອບຄົວຜູ້ກ່ຽວເປັນຄອບຄົວຕົວແບບຢູ່ບ້ານພູເຄືອເມືອງນາໝໍ້ແຂວງອຸດົມໄຊທີ່ມີ ຄວາມພົ້ນເດັ່ນໃນການປູກ-ການລ້ຽງ, ສາມາດສ້າງລາຍຮັບເຂົ້າຄອບຄົວເດືອນໜຶ່ງປະມານ 10 ລ້ານກວ່າກີບ.

__________

ຂຽນໂດຍ: ສ.ນາກກາລະສິນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์