ຍິງທະນູທີມຊາດລາວກຽມສົ່ງນັກກີລາ 12 ຄົນ ເຂົ້າຮ່ວມຊີເກມ

  ສະຫະພັນກີລາຍິງທະນູ ແຫ່ງຊາດລາວ ພ້ອມຈະສົ່ງນັກກີລາຍິງທະນູປະເພດຮີເຄີບ ແລະປະເພດຄອມປາວ ທັງຍິງ-ຊາຍຈຳນວນ 12 ຄົນ, ຍິງ 6 ຄົນ ເຂົ້າຮ່ວມໃນງານມະຫະກຳກີລາຊີເກມຄັ້ງທີ 30 ພະຈິກ ຫາ 12 ທັນວາ 2019 ທີ່ປະເທດຟິລິບປິນ.

ຕາມການລາຍງານຂອງທ່ານ ນາງ ເກດວົງພິມ ມະນີວົງ ຄະນະນຳພານັກກີລາຍິງທະນູທີມຊາດລາວເຂົ້າຮ່ວມໃນງານມະຫະກຳກີລາຊີເກມທີ່ປະເທດຟີລິບປິນ ໃຫ້ຮູ້ວ່າ: ໃນເບື້ອງຕົ້ນສະຫະພັນຍິງທະນູແຫ່ງຊາດລາວ ສາມາດຄັດ ເລືອກນັກກີລາທັງຍິງ ແລະຊາຍໄດ້ຈຳນວນ 12 ຄົນ ເປັນທີ່ຮຽບຮ້ອນແລ້ວ ແລະກໍ່ໄດ້ນຳພານັກກີລາເຄື່ອນໄຫວຮ່ວມແຂ່ງຂັນ ແລະ ຝຶກຊ້ອມມາແຕ່ເດືອນມິຖຸນາ ຜ່ານມາ ໂດຍເນັ້ນໃຫ້ນັກກີລາເກັບຕົວຝຶກຊ້ອມຢູ່ທີ່ສະໜາມກີລາຍິງທະນູ ຂອງສະໜາມຝຶກຊ້ອມກີລາຍິງປືນ 5 ເມສາ ເມືອງໄຊເຊດຖານະຄອນຫຼວງວຽງຈັນກ່ອນຈະສົ່ງນັກກີລາ 4 ຄົນ, ຍິງ 2 ຄົນອອກເດີນທາງໄປເກັບຕົວຝຶກຊ້ອມທີ່ ສສ ຫວຽດນາມຕັ້ງແຕ່ວັນທີ 1 ຕຸລາ 2019 ໃນໄລຍະເວລາ 1 ເດືອນ ແລະຈະກັບມາໃນໄວໆນີ້ເພື່ອສົມທົບກັບນັກກີລາອີກ 8 ຄົນທີ່ຊ້ອມຢູ່ລາວ

ສຳລັບການແຂ່ງຂັນກີລາຍິງ ທະນູໃນງານມະຫະກຳກີລາຊີເກມ ທີ່ປະເທດຟີລິບປິນ ເປັນເຈົ້າພາບກີລາຍິງທະນູແມ່ນມີການແຂ່ງຂັນ ທັງໝົດ 10 ລາຍການຄື: ປະເພດຍິງທະນູໂຄ້ງ ຫຼື ຮີເຄີບ 5 ລາຍການ ແລະປະເພດຍິງທະນູທົດກຳລັງ ຫຼື ຄອມປາວ 5 ລາຍການທັງ 2 ປະເພດນີ້ປະກອບມີບຸກຄົນຊາຍ-ປະເພດຄູ່ປະສົມ ແລະປະເພດທີມ ຊຸດຊາຍ-ຍິງ.

-----------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์