ລັດກຳນົດຊື້-ຂາຍເງິນຕາຕ່າງປະເທດໃນວົງເງິນ 10 ລ້ານກີບຕໍ່ຄົນຕໍ່ມື້

 ແນໃສ່ຮັບປະກັນສະຖຽນລະພາບເງິນຕາແຫ່ງຊາດໃຫ້ໝັ້ນທ່ຽງ, ອັດຕາເງິນເຟີ້ຢູ່ໃນລະດັບບໍ່ເກີນ 5%, ທະນາຄານແຫ່ງ ສປປ ລາວ(ທຫລ) ໄດ້ກໍານົດອອກອັດຕາແລກປ່ຽນແຕ່ລະວັນໃຫ້ທະນາຄານທຸລະກິດ ແລະຮ້ານແລກປ່ຽນປະຕິບັດໃນຂອບ 0,25% ແລະກໍານົດສ່ວນຕ່າງລະຫວ່າງອັດຕາຊື້-ຂາຍເງິນ ເອີໂຣ 0,5%, ເງິນບາດ 0,75% ແລະ ສະກຸນເງິນອື່ນໆ 2%, ພ້ອມທັງໄດ້ເຂົ້າດັດສົມເງິນຕາຕ່າງປະເທດໃຫ້ຂະແໜງການນໍາເຂົ້າສິນຄ້າບູລິມະສິດທີ່ຈໍາເປັນ ແລະ ໄດ້ຜ່ອນຄາຍລະ ບຽບການຊື້-ຂາຍ ເງິນຕາຕ່າງປະເທດກັບມວນຊົນໃນວົງເງິນ 10 ລ້ານກີບຕໍ່ຄົນຕໍ່ມື້.

  ອີງຕາມບົດສະຫຼຸບການຈັດຕັ້ງປະຕິບັດແຜນເງິນຕາ 9 ເດືອນຕົ້ນປີ 2019 ຂອງທະນາຄານແຫ່ງ ສປປ ລາວ ໃຫ້ຮູ້ວ່າ: ທຫລ ໄດ້ສືບຕໍ່ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດເປັນເຄື່ອງມືຕົ້ນຕໍໃນການຮັກສາສະຖຽນລະພາບເງິນຕາແຫ່ງຊາດຄື: ສືບຕໍ່ກໍານົດອອກອັດຕາແລກປ່ຽນອ້າງ ອີງແຕ່ລະວັນເພື່ອໃຫ້ທະນາຄານທຸລະກິດ ແລະຮ້ານແລກປ່ຽນປະຕິບັດໃນຂອບ0,25% ແລະກໍານົດສ່ວນຕ່າງໆລະຫວ່າງອັດຕາຊື້-ຂາຍ ສໍາລັບເງິນເອີໂຣ 0,5%, ເງິນບາດ 0,75% ແລະ ສໍາລັບສະກຸນເງິນອື່ນໆ 2%, ພ້ອມທັງໄດ້ເຂົ້າດັດສົມເງິນຕາຕ່າງປະເທດໃຫ້ຂະແໜງການນໍາເຂົ້າສິນຄ້າ ບູລິມະສິດທີ່ຈໍາເປັນເຊັ່ນ: ການນໍາເຂົ້ານໍ້າມັນເຊື້ອໄຟ, ນອກນີ້ກໍໄດ້ຜ່ອນຄາຍລະບຽບການຊື້-ຂາຍ ເງິນຕາຕ່າງປະເທດກັບມວນຊົນຂອງທະນາຄານທຸລະກິດ ແລະຮ້ານແລກປ່ຽນໃນວົງເງິນ 10 ລ້ານກີບຕໍ່ຄົນຕໍ່ມື້ເພື່ອຮັກສາຄວາມເຊື່ອໝັ້ນຄ່າເງິນກີບ ແລະຂະແໜງການທະນາຄານຫຼາຍຂຶ້ນ.

  ພ້ອມດຽວກັນນີ້ ທຫລ ຍັງໄດ້ເອົາໃຈໃສ່ຄຸ້ມຄອງຕິດຕາມຮ້ານແລກປ່ຽນເງິນຕາຕາມລະບຽບການຢ່າງເຂັ້ມງວດເພື່ອກໍາຈັດຊ່ອງຫວ່າງການສວຍໂອກາດເກງກໍາໄລ ແລະເພື່ອແກ້ໄຂບັນຫາສ່ວນຕ່າງອັດຕາແລກປ່ຽນຂອງທະນາຄານ ແລະຕະຫຼາດ ທຫລ ໄດ້ນໍາໃຊ້ມາດຕະການບໍລິຫານໂດຍໄດ້ເຊີນບັນດາຮ້ານແລກປ່ຽນເງິນຕາເພື່ອມາຊີ້ນໍາ ແລະຕັກເຕືອນຮ້ານແລກປ່ຽນໃຫ້ປະຕິບັດຕາມລະບຽບອັດຕາ ຊື້-ຂາຍທີ່ ທຫລ ໄດ້ກໍານົດອອກຢ່າງເຂັ້ມງວດ ແລະ ໄດ້ແຕ່ງຕັ້ງພະນັກງານລົງຕິດຕາມກວດ ກາສະພາບການຈັດຕັ້ງປະຕິບັດລະບຽບດັ່ງກ່າວຢ່າງໃກ້ຊິດ, ພ້ອມທັງປະຕິບັດມາດຕະການຕໍ່ຮ້ານແລກປ່ຽນເງິນຕາທີ່ບໍ່ໄດ້ຮັບອະນຸຍາດ ແລະ ປະຕິບັດບໍ່ສອດຄ່ອງລະ ບຽບການໂດຍໄດ້ຖອນໃບອະນຸຍາດຈໍານວນ 8 ຮ້ານ, ຖືກກ່າວ ເຕືອນ 13 ຮ້ານ, ກໍາລັງປັບປຸງລະບຽບ ການຄຸ້ມຄອງຮ້ານອັດຕາແລກປ່ຽນເງິນຕາ ແລະໄດ້ແຈ້ງໂຈະຊົ່ວຄາວການອອກໃບອະນຸຍາດດໍາເນີນທຸລະກິດແລກປ່ຽນເງິນຕາເພື່ອປັບປຸງລະບຽບການໃຫ້ຮັດກຸມຂຶ້ນຕື່ມ, ຊຶ່ງໃນປະຈຸບັນທົ່ວປະເທດມີຮ້ານອັດຕາແລກປ່ຽນເອກະຊົນ ທັງໝົດ 258 ຮ້ານ.

  ນອກຈາກນີ້ ໃນ 3 ເດືອນທ້າຍປີ 2019 ນີ້ ທຫລ ຈະເອົາໃຈໃສ່ສືບຕໍ່ຄຸ້ມຄອງອັດຕາແລກປ່ຽນ ແລະຮ້ານແລກປ່ຽນຕາມລະບຽບການຢ່າງເຂັ້ມງວດ ແລະມີມາດຕະການຄຸ້ມຄອງບໍລິຫານເພື່ອຈໍາກັດສ່ວນຕ່າງອັດຕາແລກປ່ຽນທາງການ ແລະຕະຫຼາດໃຫ້ແຄບເຂົ້າ.

_____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์