ສຄອຊ ສືບຕໍ່ລະດົມການປະຕິບັດແຜນຍຸດທະສາດຕາມ 4 ເສົາຄໍ້າ

  ສະພາການຄ້າ ແລະອຸດສາຫະກຳແຫ່ງຊາດລາວ (ສຄອຊ) ເປັນອົງການຈັດຕັ້ງໜຶ່ງທີ່ປະຕິບັດບົດບາດເປັນຂົວຕໍ່ລະຫວ່າງລັດຖະບານ ແລະພາກທຸລະກິດ ເພື່ອແລກປ່ຽນຄຳຄິດເຫັນ; ເປັນຕົວແທນໃຫ້ແກ່ຜູ້ໃຊ້ແຮງງານຂອງສະມາຄົມ, ກຸ່ມທຸລະກິດ ແລະວິສາຫະກິດຕ່າງໆ; ປຸກລະດົມຂົນຂວາຍ, ສຶກສາອົບ ຮົມ, ເຕົ້າໂຮມນັກທຸລະກິດເພື່ອສົ່ງເສີມເສດຖະກິດ, ການຄ້າ-ອຸດສາຫະກຳ, ກະສິກຳ, ການບໍລິການໃຫ້ເຄື່ອນໄຫວຖືກຕ້ອງຕາມກົດໝາຍ ແລະລະບຽບການໂດຍຈັດຕັ້ງປະຕິບັດແຜນຍຸດທະສາດຂອງ ສຄອຊ ຕາມ 4 ວຽກງານທີ່ເປັນເສົາຄໍ້າຢ່າງກົມກຽວຊຶ່ງໃນຕະຫຼອດ 30 ປີຜ່ານມາກໍ່ຄືໃນປີ 2018 ນີ້ ສຄອຊ ສາມາດຍາດໄດ້ຜົນສໍາເລັດໃນຫຼາຍດ້ານ.

  ທ່ານ ອຸເດດ ສຸວັນນະວົງ ປະທານສະພາ ສຄອຊ ໄດ້ແຈ້ງໝາກຜົນແຫ່ງການເຄື່ອນໄຫວໃນຕະຫຼອດ 30 ປີຜ່ານມາຊຶ່ງປະກອບສ່ວນເຂົ້າໃນຂະແໜງການຕ່າງໆມີຜົນສໍາເລັດເປັນກ້າວໆໂດຍສະເພາະການພັດທະນາສົ່ງເສີມທຸລະກິດຂະໜາດນ້ອຍ-ຂະໜາດກາງ (SME) ໂດຍສ້າງຕັ້ງສູນບໍລິການ SME ເພື່ອເຕົ້າ ໂຮມເອົາບັນດາໂຄງການສົ່ງເສີມຄວາມຮູ້-ຄວາມສາມາດທີ່ມີຢູ່ຮ່ວມກັບກົມພັດທະນາສົ່ງເສີມ SME ໃນນີ້ໄດ້ຝຶກອົບຮົມ ແລະສ້າງເງື່ອນໄຂໃຫ້ SME ເຂົ້າ ເຖິງແຫຼ່ງທຶນ ແລະກິດຈະກໍາໃນການພັດທະນາບໍລິສັດເປັນການຝຶກອົບຮົມໃຫ້ທຸລະກິດໜຸ່ມມີຄວາມສາມາດ, ພ້ອມນັ້ນໄດ້ສ້າງກອງທຶນສົ່ງເສີມ Start Up ໂດຍນັກລົງທຶນລາວເຂົ້າໃນການພັດທະນາທຸລະກິດວຽກງານພັດທະນາສົ່ງເສີມການຕະຫຼາດຜະລິດຕະພັນໄດ້ເພີ່ມທະວີການສົ່ງເສີມການຜະລິດຕະພັນຍີ່ຫໍ້ລາ ວໃຫ້ເຂົ້າສູ່ຕະຫຼາດສາກົນໄດ້ເສີມສ້າງຄວາມສາມາດໃຫ້ບໍລິສັດສະຫະກອນ ແລະຊາວກະສິກອນ-ຊາວບ້ານໃນການຜະລິດສິນຄ້າເພື່ອສົ່ງອອກຢ່າງເປັນຕ່ອງໂສ້ທີ່ມີມາດຕະຖານສາກົນ,ມີຄຸນນະພາບ ແລະລາຄາສູງ; ສ່ວນດ້ານການສົ່ງອອກກໍ່ໄດ້ຄັດເລືອກເອົາຜະລິດຄະພັນລາວຈໍານວນໜຶ່ງເພື່ອສ້າງຕົວແບບເພື່ອກາ ນສົ່ງອອກເຊັ່ນ: ຊາ, ກາເຟ, ເຂົ້າໜຽວ, ແຜ່ນແພໄໝ ແລະອາຫານໂດຍໃນປີຜ່ານມາບໍລິສັດລາວເຮົາສາມາດຍາດໄດ້ລາງວັນດີເດັ່ນໃນປີ 2017 ແລະລາງ ວັນໃນປີ 2018 ເຮັດໃຫ້ປະຊາຄົມໃນພາກພື້ນກໍ່ຄືໃນໂລກໄດ້ຮູ້ຈັກກັບຜະລິດຕະພັນ ແລະສິນຄ້າຂອງ ສປປ ລາວ ຍິ່ງໆຂຶ້ນ.

    ໃນໂອກາດກອງປະຊຸມປະຈໍາປີ ແລະການສະຫຼອງ 30 ປີ ສຄອຊ; ທ່ານ ທອງລຸນ ສີສຸລິດ ນາຍົກ ລັດຖະມົນຕີໄດ້ໃຫ້ກຽດໂອ້ລົມໃນວັນທີ 23 ມັງກອນ 2019 ໂດຍໄດ້ຕີລາຄາສູງ ແລະ ຍ້ອງຍໍຊົມເຊີຍໝາກຜົນຂອງການເຄື່ອນໄຫວຂອງ ສຄອຊ ໃນຕະຫຼອດ 30 ປີ ຜ່ານມາ; ພ້ອມນັ້ນ, ທ່ານຍັງໄດ້ກ່າວບາງຕອນວ່າ: ສຄອຊ ຕ້ອງປະຕິບັດຕາມພາລະບົດບາດຂອງຕົນຢ່າງເຂັ້ມແຂງ;ເອົາໃຈໃສ່ປຸກລະດົມສະມາຄົມ,ກຸ່ມທຸລະກິດປະກອບສ່ວນໃນການພັດທະນາພ້ອ ມທັງຈັດຕັ້ງປະຕິບັດແຜນຍຸດທະສາດຕາມ 4 ວຽກງານທີ່ເປັນເສົາຄໍ້າເພື່ອສ້າງສະພາບແວດລອ້ມທີ່ເອື້ອອຳນວຍໃຫ້ທຸກພາກທຸລະກິດ; ສົ່ງເສີມວິສາຫະກິດຂະໜາດນ້ອຍ ແລະຂະໜາດກາງ; ເອົາໃຈໃສ່ສົ່ງເສີມການຕະຫຼາດຂອງຜະລິດຕະພັນລາວສົ່ງເສີມຜະລິດຕະພັນຍີ່ຫໍ້ລາວເຂົ້າສູ່ຕະຫຼາດສາກົນໃຫ້ຫຼາຍຂຶ້ນ ແລະເອົາໃຈໃສ່ພັດທະນາລະ ບົບຂໍ້ມູນຂ່າວສານ ເພື່ອເປັນພື້ນ ຖານໃຫ້ແກ່ການວາງແຜນ, ຕິດ ຕາມ ແລະປະເມີນຜົນທາງທຸລະ ກິດ; ນອກນີ້ ຕ້ອງສືບຕໍ່ເອົາໃຈໃສ່ພົວພັນ ແລະປະສານງານເພື່ອສ້າງຄູ່ຮ່ວມທຸລະກິດທັງໃນພາກພື້ນ ແລະສາກົນເປັນຕົ້ນ ສປ ຈີນ ແລະ ສສ ຫວຽດນາມເພື່ອສົ່ງເສີມການຄ້າສອງຝ່າຍໃຫ້ຫຼາຍຂຶ້ນກວ່າເກົ່າ; ຫັນໄປສູ່ການຜະລິດທີ່ສ້າງວຽກເຮັດງານທຳ, ສ້າງມູນຄ່າເພີ່ມໃຫ້ຫຼາຍຂຶ້ນບໍ່ເອື່ອຍອີງໃສ່ແຕ່ການລົງທຶນຂອງລັດ ແລະ ຄົ້ນຄວ້າກົນໄກຊ່ວຍລັດຖະບານຕໍ່ກັບໜີ້ສິນທີ່ເກີດຂຶ້ນເພື່ອຫຼຸດຜ່ອນໜີ້ສິນລົງເທື່ອລະກ້າວ.

  ໃນຂະນະດຽວກັນຕ້ອງເອົາໃຈໃສ່ແກ້ໄຂບັນຫາຄົງຄ້າງໂດຍສະເພາະກົນໄກການພົວພັນ ແລະ ປະສານງານຂອງລະຫວ່າງພາກລັດ ແລະພາກທຸລະກິດຍັງບໍ່ທັນຄ່ອງຕົວເທົ່າທີ່ຄວນ; ການເຄື່ອນໄຫວຍັງບໍ່ທັນລົງທົ່ວທຸກແຂວງ, ການຂະຫຍາຍສະມາຊິກບໍ່ທັນໄດ້ຫຼາຍເທົ່າທີ່ຄວນ; ການດຳເນີນທຸລະກິດສ່ວນໃຫ່ຍຕິດພັນກັບການຂຸດຄົ້ນຊັບພະຍາກອນທໍໍາມະຊາດ, ການກໍ່ສ້າງພື້ນຖານໂຄງລ່າງດ້ວຍທຶນຂອງລັດ, ການລົງທຶນສ້າງພື້ນຖານການຜະລິດ, ປຸງແຕ່ງຕ່າງໆ ເພື່ອຮັບໃຊ້ພາຍໃນ ແລະສົ່ງອອກຍັງມີໜ້ອຍ; SME ສ່ວນຫຼາຍບໍ່ມີແຜນຍຸດທະສາດໃນການພັດທະນາ, ຂາດບຸກຄະລະກອນ, ຜູ້ບໍລິຫານທີ່ມີສີມືທັງໃນແງ່ຄວາມຮູ້, ຄວາມສາມາດ ແລະແງ່ປະສົບປະການ; ການນໍາໃຊ້ວິທະຍາສາດ ແລະເຕັກໂນໂລຊີໃໝ່ເຂົ້າໃນການຜະລິດສິນຄ້າຍັງມີປະສິດທິຜົນຕໍ່າ. ຕໍ່ບັນຫາທີ່ຄົງຄ້າງດັ່ງກ່າວສະເໜີໃຫ້ ສຄອຊ ເອົາໃຈໃສ່ຄົ້ນຄວ້າ, ສ້າງກົນໄກ ແລະມາດຕະການແກ້ໄຂຢ່າງມີວິທະຍາສາດ.

  ໃນໄລຍະຜ່ານມາເບື້ອງລັດຖະບານເຮົາກໍ່ໄດ້ມີການແກ້ໄຂບັນດາຂໍ້ສະເໜີຂອງພາກທຸລະກິດທີ່ມີຜົນຄືບໜ້າດີຂຶ້ນເປັນກ້າວໆເປັນຕົ້ນການປະຕິບັດຄຳສັ່ງເລກທີ 12/ນຍ ວ່າດ້ວຍການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດ; ຄຳສັ່ງເລກທີ 02/ນຍ ປັບປຸງສະພາບແວດລ້ອມ ແລະ ອໍານວຍຄວາມສະດວກໃນການດໍາເນີນທຸລະກິດໃນລາວ; ການແກ້ໄຂບັນຫາພັນທະອາກອນຕ່າງໆ ແລະການປັບປຸງກອງທຶນສົ່ງເສີມ SMEs, ສົ່ງເສີມການຜະລິດເປັນສິນຄ້າ, ການປຸງແຕ່ງ ແລະສິ່ງກີດຂວາງການທ່ອງທ່ຽວ.

แชร์