3 ພັນກວ່າຄົນ ຈະໄດ້ຮັບຜົນປະໂຫຍດຈາກ ເວີນຄອນເຊີນ

  ເວີນຄອນເຊີນໄລຍະ3 ຈະນໍາຜົນປະໂຫຍດຫຼາຍຢ່າງດ້ານສຸຂະພາບສູ່ພໍ່ແມ່ປະຊາຊົນຊາວເມືອງໂພນທອງ ແຂວງຈໍາປາສັກ ໂດຍຜ່ານໂຄງການພັດທະນາແບບປະສົມປະສານເພື່ອການຊຸກຍູ້ສຸຂະພາບຂອງຊຸມຊົນໂດຍວາງເປົ້າໝາຍຈະມີຜູ້ໄດ້ຮັບຜົນປະໂຫຍດຫຼາຍກວ່າ 3 ພັນຄົນ.

  ອົງການເວີນຄອນເຊີນແຫ່ງ ສປປ ລາວ ແມ່ນການຮ່ວມມືກັນກັບກະຊວງສາທາລະນະສຸກຈະມີການເປີດຕົວແທນຢ່າງເປັນທາງການໃນເດືອນພະຈິກນີ້, ຊຶ່ງໂຄງການດັ່ງກ່າວມີຊື່ວ່າ: ໂຄງການພັດທະນາແບບປະສົມປະສານເພື່ອການຊຸກຍູ້ສຸຂະພາບຂອງຊຸມຊົນໄລຍະ 3 ໃນເມືອງໂຂງ ແຂວງຈໍາປາສັກ ໂດຍຈະໃຊ້ງົບປະມານເຂົ້າໃນໂຄງ ການ 5 ພັນລ້ານກີບ ຫຼື 568.400 ໂດລາ, ທຶນດັ່ງກ່າວແມ່ນເປັນທຶນສົມທົບທີ່ໄດ້ມາຈາກອົງການຈັດຕັ້ງການພັດທະນາເວີນຄອນເຊີນ, ມູນນິທິເອັນທຣັດ, ອົງການອົດສະຕາລີ, ສໍາລັບການພັດທະນາສາກົນ ແລະເທຍອົດສະຕາລີ.

  ກິດຈະກໍາສໍາຄັນຂອງໄລຍະ 3 ແມ່ນຈະລວມເອົາການສ້າງຄວາມເຂັ້ມແຂວງໃຫ້ແກ່ຄະນະພັດທະນາ, ລະບົບນໍ້າຂອງມວນຊົນ ແລະການກໍ່ສ້າງວິດຖ່າຍໃນຄົວເຮືອນ, ການຊຸກຍູ້ດ້ານສຸຂະພາບຂອງແມ່ ແລະ ເດັກ, ໂພຊະນາການ, ນໍ້າ, ສຸຂະພິບານ, ຫຼັກອະນາໄມ ແລະ ເອສໄອວີ-ເອສ ລວມທັງການພັດທະນາຊີວິດການເປັນຢູ່ເຊັ່ນ: ເຕັກນິກການຝຶກອົບຮົມວິຊາຊີບ, ການຜະລິດເຂົ້າ ແລະການຜະລິດພຶດພັນທັນຍາຫານ, ການລ້ຽງສັດ ແລະການພັດທະນາການຝາກປະຢັດ.

 ຈັດຕັ້ງປະຕິບັດຕາມຄວາມຕ້ອງການພາຍໃນ 8 ບ້ານຄື: ບ້ານໂນນກຸງ, ບຸງແກ, ແກ້ງຍາວ, ໃຜ່ລ້ວມ, ກ້ວຍ, ໜອງແຕ້ນ້ອຍ, ນາສະຫວ່າງແລະບ້ານໂພນໃຫຍ່ໂດຍສອດຄ່ອງກັບເປົ້າໝາຍການພັດທະນາແບບຍືນຍົງ ແລະແຜນພັດທະນາເສດຖະກິດ-ສັງຄົມ ແຫ່ງຊາດ ສປປ ລາວຄັ້ງທີ 8 ໄລຍະປີ 2016-2020.

  ພິທີເຊັນບົດບັນທຶກຄວາມເຂົ້າໃຈໂຄງການດັ່ງກ່າວມີຂຶ້ນໃນວັນທີ 12 ພະຈິກ 2019 ຜ່ານມາ, ທີ່ນະຄອນປາກເຊ ແຂວງຈໍາປາສັກ, ລະຫວ່າງການລົງນາມຂອງ ທ່ານ ດອ. ສົມກຽດ ວໍລິລາດ ຫົວໜ້າພະແນກສາທາລະນະສຸກກັບທ່ານ Bob Jaob ຫົວໜ້າອົງການໂຄງການເວີນຄອນເຊີນ ແຫ່ງ ສປປ ລາວ, ເຂົ້າຮ່ວມເປັນສັກຂີພິຍານໂດຍທ່ານ ສີສະຫວາດ ສຸດທະນີລະໄຊ ຮອງຫົວໜ້າກົມກະຊວງສາທາລະນະສຸກ, ມີບັນດາທ່ານແຂກຜູ້ໃຫຍ່ທີ່ກ່ຽວຂ້ອງເຂົ້າຮ່ວມ.

__________

ຂຽນໂດຍ:  ໂພທິຣາຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511

แชร์