ເອດີບີ ຢ້ຽມຢາມແຂວງຈຳປາສັກ

 ຄະນະທະນາຄານພັດທະນາອາຊີ ຫຼື ເອດີບີ ຊຶ່ງນຳໂດຍ ທ່ານ ຢາຊູຊິ ເນກິຊິ ຜູ້ອຳນວຍການຫ້ອງການເອດີບີປະຈຳລາວພ້ອມດ້ວຍສື່ມວນຊົນຈາກສູນກາງໄດ້ລົງເຄື່ອນ ໄຫວຢ້ຽມຢາມ ແລະ ຕິດຕາມຄວາມຄືບໜ້າໂຄງການຊ່ວຍເຫຼືອໃນຂົງເຂດການສຶກສາກໍຄືການພັດທະນາທາງດ້ານຊັບພະຍາກອນມະນຸດທີ່ແຂວງຈຳປາສັກໃນວັນທີ 6 ພະຈິກ 2019 ທີ່ຫ້ອງວ່າການປົກຄອງແຂວງກໍໄດ້ເຂົ້າພົບປະຢ້ຽມຢາມ ທ່ານ ບຸນຖອງ ດີວິໄຊ ເຈົ້າແຂວງຈຳປາສັກໂດຍມີພາກສ່ວນກ່ຽວຂ້ອງຮ່ວມໃຫ້ການຕ້ອນຮັບ.

  ໃນໂອກາດດັ່ງກ່າວທ່ານເຈົ້າແຂວງໄດ້ລາຍງານໃຫ້ຊາບກ່ຽວກັບສະພາບໂດຍລວມຂອງການພັດທະນາຂອງແຂວງຈຳປາສັກໃຫ້ຮູ້ວ່າ: ປະຈຸບັນແຂວງຈຳປາສັກໄດ້ຮັບການຊ່ວຍເຫຼືອຈາກທະນາຄານ ພັດທະນາອາຊີແມ່ນໂຄງການກໍ່ສ້າງປ້ອງກັນຕາຝັ່ງເຈື່ອນແຄມເຊໂດນ, ປັບປຸງສະພາບແວດລ້ອມໃນຕົວເມືອງ ຊຶ່ງກຳລັງດຳເນີນການຢູ່, ນອກຈາກນີ້ກໍ່ມີໂຄງການຊ່ວຍເຫຼືອຂອງ ສ.ເກົາຫຼີ ເປັນໂຄງການປ້ອງກັນຕາຝັ່ງເຈື່ອນແຄມຂອງຍ້ອນມີການຊ່ວຍເຫຼືອຄືແນວນັ້ນແຂວງພວກເຮົາຈິ່ງມີຕ່າງປະເທດ ມາລົງທຶນຢູ່ພາຍໃນແຂວງຈຳນວນ 18 ປະເທດ, ຈຳນວນ 560 ກວ່າໂຄງການ, ມີມູນຄ່າການລົງທຶນທັງໝົດ 4.000 ລ້ານກວ່າໂດລາ, ທົ່ວແຂວງສະພາບເສດຖະ ກິດມີການຂະຫຍາຍຕົວ 8,15% ແລະ ລາຍຮັບສະເລ່ຍຂອງພົນລະເມືອງ 3.500 ໂດລາຕໍ່ຄົນຕໍ່ປີ, ຍັງມີບ້ານທຸກຍາກ 10 ບ້ານເທົ່າກັບ 1,5% ມີຄອບຄົວທີ່ທຸກ ຍາກ ຈຳນວນ 500 ຄອບຄົວເທົ່າກັບ 0,4% ຂອງຄອບຄົວທັງໝົດ.

  ໃນໂອກາດດຽວກັນນີ້ ທ່ານ ຢາຊູຊິ ເນກິຊິ ກໍ່ໄດ້ຂອບໃຈຕໍ່ທ່ານເຈົ້າແຂວງຈຳປາສັກທີ່ໄດ້ສະຫຼະເວລາໃຫ້ການຕ້ອນຮັບ, ໂດຍການຊ່ວຍເຫຼືອຂອງທະນາຄານພັດທະນາອາຊີແມ່ນໄດ້ເລີ່ມ ມາແຕ່ປີ 1990 ຂະແໜງສຶກສາເລີ່ມ ຈາກຊັ້ນປະຖົມ, ມາຮອດປະຈຸບັນແມ່ນ ຊັ້ນມັດທະຍົມ ແລະມະຫາໄລ, ທະນາຄານ ພັດທະນາອາຊີແມ່ນໄດ້ລົງເລິກໃນ 3 ຂະແໜງການຍ່ອຍຄື: ມັດທະຍົມ, ອາຊີວະສຶກສາ ແລະການສຶກສາຊັ້ນສູງກໍຄືມະຫາວິທະຍາໄລ, ນອກຈາກນີ້ຍັງໄດ້ຊ່ວຍເຫຼືອທາງດ້ານການປັບປຸງຫຼັກ ສູດການຮຽນ-ການສອນ,ພ້ອມທັງຍົກລະດັບທາງດ້ານບຸກຄະລາກອນກໍ່ຄືການພັດທະນາຊັບພະຍາກອນມະນຸດໃຫ້ມີຄຸນນະພາບ,ການຊ່ວຍເຫຼືອດັ່ງກ່າວແມ່ນເປັນການພັດທະນາເສດຖະກິດ-ສັງຄົມ ຊ່ວຍເຮັດໃຫ້ ສປປ ລາວ ຫຼຸດພົ້ນອອກຈາກສະພາບດ້ອຍພັດທະນາ.

____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์