ເຈົ້າເມືອງພູຄູນ ມອບອຸປະກອນການສຶກສາໃຫ້ນັກຮຽນ

  ເມື່ອອາທິດຜ່ານມາທີ່ເດີ່ນໂຮງຮຽນປະຖົມສົມບູນບ້ານຫຼັກຫ້າທ່ານ ວຽງທອງ ຫັດສະຈັນ ເຈົ້າເມືອງພູຄູນ,ທ່ານ ນາງ ວິໄລ ອົງມີໄຊ ຮອງຫ້ອງການແຮງງານແລະສະຫວັດດີການສັງຄົມເມືອງໄດ້ນຳເອົາອຸປະກອນການສຶກສາ ແລະເຄື່ອງນຸ່ງຈຳນວນໜຶ່ງເພື່ອໄປ ມອບໃຫ້ນ້ອງນັກຮຽນຊັ້ນປະຖົມບ້ານຫຼັກຫ້າ ແລະບ້ານບັງກາໂລ, ໂດຍມີນ້ອງນັກຮຽນຫ້ອງກຽມປະຖົມ ແລະປະຖົມ ຈຳນວນ 190 ນ້ອງ.

ຊຶ່ງອຸປະກອນການສຶກສາທີ່ນໍາມາມອບໃນຄັ້ງນີ້ປະກອບມີເສື້ອຂາວນັກຮຽນຈໍານວນ 205 ຜືນ, ປື້ມຂຽນ 200 ຫົວ, ບິກຂຽນ 210 ກ້ານ, ເກີບ 26 ຄູ່ ແລະເຄື່ອງນຸ່ງ ຈຳນວນ 5 ເປົ໋າເພື່ອມອບໃຫ້ບ້ານ ນຳໄປແຈກຢາຍໃຫ້ປະຊາຊົນ.

ໃນໂອກາດນີ້ທ່ານ ວຽງທອງ ຫັດສະຈັນ ເຈົ້າເມືອງພູຄູນຍັງໄດ້ ໂອ້ລົມຕໍ່ຄູ-ອາຈານ ແລະອໍານາດການປົກຄອງບ້ານຈົ່ງເພີ່ມທະວີໃນການເອົາໃຈໃສ່ສິດສອນລູກຫຼານໃຫ້ໄດ້ຮັບການສຶກສາຮໍ່າຮຽນຢ່າງ ທົ່ວເຖິງ, ສ້າງໃຫ້ເດັກມີຄວາມຮູ້ຄວາມສາມາດ ແລະກ້າສະແດງອອກ,ສ້າງໂຮງຮຽນໃຫ້ກາຍເປັນໂຮງຮຽນທີ່ສະອາດ ແລະເປັນແບບຢ່າງໃນການສ້າງເປັນໂຮງ ຮຽນຄູສອນດີ, ນັກຮຽນ, ຮຽນເກັ່ງ ແລະຮັກສານາມມະຍົດບ້ານພັດທະນາໃຫ້ຍືນຍົງ.

-----------------

ພາບ ແລະຂ່າວຈາກ  ໜັງສືພິມເສດຖະກິດ-ສັງຄົມ

แชร์