ພູຄຳ ທິບພົມວົງ Miss Tourism Universe Laos ກຽມໄປປະກວດຢູ່ຟິລິປິນ

  ພູຄຳ ທິບພົມວົງ Miss Tourism Universe Laos 2018 ພາຍຫຼັງໄດ້ຮັບຕໍາແໜ່ງອັນຊົງກຽດ ໃນເວທີນາງງາມລາວເມື່ອທ້າຍປີຜ່ານມາແລ້ວຍັງໄດ້ຖືກເລືອກໃຫ້ເປັນຕົວແທນສາວລາວໄປປະກວດ Miss Global 2019 ຢູ່ນະຄອນຫຼວງມະນີລາປະເທດຟິລິບປິນໂດຍຈະເດີນທາງໄປເກັບຕົວໃນວັນທີ 31 ມັງກອນ ແລະການປະກວດ Miss Global 2019 ຮອບຕັດສິນຈະຈັດຂຶ້ນໃນວັນທີ 11 ກຸມພານີ້.

   ພູຄຳ ທິບພົມວົງ (ໝີພູ) ອາຍຸ 23 ປີປະຈຸບັນເປັນພະນັກງານລັດວິສາຫະກິດການບິນລາວເປີດເຜີຍຄວາມຮູ້ສຶກສູ່ຟັງວ່າ: Miss Global ເປັນເວທີການປະກວດທີ່ສົ່ງເສີມໃຫ້ຜູ້ຍິງໝັ້ນໃຈກ້າສະແດງອອກ ແລະພັດທະນາຄວາມເປັນຜູ້ນຳເພື່ອເປັນແບບຢ່າງໃຫ້ແກ່ຜູ້ຍິງຍຸກໃໝ່ ແລະໃນເວທີການປະກວດນີ້, ຕົນພູມໃຈທີ່ສຸດທີ່ໄດ້ເປັນຜູ້ຍິງລາວຄົນໜຶ່ງຈະໄດ້ນຳເອົາວັດທະນະທຳອັນດີງາມຂອງຊາດບໍ່ວ່າຈະເປັນການນົບໄຫວ້ສະບາຍດີລວມທັງການນຸ່ງສິ້ນເກົ້າຜົມບ່ຽງແພທີ່ເປັນເອກະລັກຂອງແມ່ຍິງລາວໄປອວດສາຍຕາເພື່ອນນາງງາມຈາກທົ່ວໂລກ ແລະປະຈຸບັນພວມກຽມໂຕຫຼາຍດ້ານ, ທັງພາສາຄວາມຮູ້ວັດທະນະທໍາການປະພຶດໃນກອງປະກວດລວມທັງຊຸດທີ່ຈະໄດ້ນຳໄປໃຊ້ໃນການປະກວດ, ດັ່ງນັ້ນຈຶ່ງຂໍໃຫ້ປະຊາຊົນລາວຊ່ວຍເປັນກໍາລັງໃຈສົ່ງແຮງໃຈໃຫ້ດ້ວຍ.

   Miss Global ໄດ້ຈັດຂຶ້ນຄັ້ງທຳອິດໃນປີ 2013 ຢູ່ເມືອງ Redondo ກາລິຟໍເນຍສະຫະລັດອາເມລິກາ ແລະໄດ້ຈັດຂຶ້ນຕິດຕໍ່ກັນມາແລ້ວ 5 ຄັ້ງ ແລະຫຼ້າສຸດທີ່ຈັດມີຕົວແທນຈາກ 60 ປະເທດທົ່ວໂລກເຂົ້າຮ່ວມປະກວດຢູ່ນະຄອນຫຼວງພະນົມເປັນປະເທດກຳປູເຈຍ ແລະປີນີ້ຈະໄດ້ຈັດເປັນຄັ້ງທີ 6 ຢູ່ນະຄອນຫຼວງມະນີລາປະເທດຟິລິປິນໃນວັນທີ 1-11 ກຸມພາ 2019 ນີ້.

แชร์