ໂຮງຮຽນປະຖົມ ບ້ານຕະອູນ ໄດ້ຮັບເຄື່ອງຊ່ວຍເຫຼືອ

  ໃນວັນທີ 8 ພະຈິກ ຜ່ານມາ, ພະອາຈານກໍລະກັນ ເຊື້ອໂຊດຮອງເຈົ້າຄະນະ ອພສ ເມືອງ ລະມາມ ພ້ອມດ້ວຍຄະນະພັກ-ອົງການປົກຄອງບ້ານດ່ານໄດ້ນໍາເອົາອຸປະກອນການສຶກສາ ແລະອຸປະກອນກີລາໄປມອບໃຫ້ໂຮງຮຽນ ປະຖົມບ້ານຕະອູນ ເມືອງລະມາມ ແຂວງເຊກອງ ໂດຍມີທ່ານ ພະຂັນໄຊ ສີຫາເທບຮອງຫົວໜ້າ ພະແນກແຮງງານ ແລະສະຫວັດດີການສັງຄົມແຂວງ, ທ່ານ ແພງຮັກ ຮູ້ນປະຫຍັດ ຫົວໜ້າກຸ່ມພັດທະນາທີ 6 ຕອກອົງແກ້ວ ແລະ ພາກສ່ວນກ່ຽວຂ້ອງເຂົ້າຮ່ວມ.

ເຄື່ອງທີ່ນໍາມາມອບຄັ້ງນີ້ປຶ້ມຂຽນຈໍານວນ 850 ຫົວ, ບິກຂຽນ 140 ກ້ານ, ຊຸດກີລາ 11 ຊຸດ, ບານເຕະ 2 ໜ່ວຍ ແລະກະຕໍ້ 1 ໜ່ວຍລວມມູນຄ່າ 3,5 ລ້ານກີບຊຶ່ງໄດ້ມາຈາກການປະກອບສ່ວນຂອງການນໍາພັກ-ລັດ, ອອກຕົນ ຍາດໂຍມພໍ່ແມ່ປະຊາຊົນ,ນັກທຸລະ ກິດ, ພໍ່ຄ້າຊາວຂາຍຢູ່ທັງໃກ້ ແລະ ໄກຮ່ວມບໍລິຈາກ,ທັງນີ້ກໍ່ເພື່ອເປັນການແບ່ງເບົາບັນເທົາທຸກໃຫ້ປະຊາຊົນຜູ້ທີ່ທຸກຍາກຂາດເຂີນທຶນຮອນໃນການຊຸກຍູ້ສົ່ງເສີມລູກເຂົ້າໃນການສຶກສາຮໍ່າຮຽນ.

ໂອກາດດັ່ງກ່າວທ່ານ ນັດຄໍາສີ ສີສະເກດ ຫົວໜ້າໂຮງຮຽນບ້ານຕະອູນ ກໍໄດ້ກ່າວສະແດງຄວາມຂອບໃຈມາຍັງພະອາຈານ ກໍລະກັນ ເຊື້ອໂຊດ ພ້ອມດ້ວຍຄະ ນະພັກ-ອົງການປົກຄອງ,ເຖົ້າແກ່ແນວໂຮມບ້ານດ່ານ ກໍຄືການນໍາ ພັກ-ລັດ,ອອກຕົນຍາດໂຍມ ແລະ ອົງການຈັດຕັ້ງທຸກພາກສ່ວນທີ່ ເຫັນຄວາມສໍາຄັນ ແລະຈໍາເປັນປະກອບສ່ວນຊ່ວຍເຫຼືອແກ່ໂຮງຮຽນໃນເທື່ອນີ້, ທາງຄູ-ອາຈານ ກໍຄືຄະນະພັກ-ອົງການປົກຄອງ ບ້ານຕະອູນຈະໄດ້ນໍາໄປມອບຕໍ່ໃຫ້ກັບນັກຮຽນທີ່ທຸກຍາກຂາດເຂີນເພື່ອເປັນການແບ່ງເບົາຄວາມທຸກໃຫ້ແກ່ເຂົາເຈົ້າ.

------------------

ພາບ ແລະຂ່າວຈາກ  ໜັງສືພິມເສດຖະກິດ-ສັງຄົມ

แชร์