ຍັງມີຫຼາຍຂອດຈຳກັດທີ່ທ້າທາຍໃນການຂະຫຍາຍຕົວເສດຖະກິດຂອງຊາດ

 ກະຊວງອຸດສາຫະກຳ ແລະການຄ້າຮ່ວມກັບສະພາການຄ້າ ແລະອຸດສາຫະກຳແຫ່ງຊາດລາວ (ສຄອຊ) ຈັດກອງປະຊຸມທຸລະກິດລາວຄັ້ງທີ 12 ເພື່ອລາຍງານຜົນສຳ ເລັດ ແລະ ຄວາມຄືບໜ້າຂອງການປຶກສາຫາລືລະຫວ່າງພາກລັດ ແລະພາກທຸລະກິດພາຍໃຕ້ກົນໄກກອງປະຊຸມທຸລະກິດລາວຄັ້ງທີ 11 ຜ່່ານມາຂຶ້ນວັນທີ 12 ພະຈິກ 2019 ທີ່ຫໍປະຊຸມແຫ່ງຊາດໂດຍເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ທ່ານ ນາງ ເຂັມມະນີ ພົນເສນາ ລັດ ຖະມົນຕີກະຊວງອຸດສາຫະກຳ ແລະການຄ້າ.

ສະໜັບສະໜຸນໂດຍ: ສ່ວນບຸກຄົນ

   ທ່ານ ສົມດີ ດວງດີ ໄດ້ກ່າວວ່າ: ການປັບປຸງສະພາບແວດລ້ອມໃນການດຳເນີນທຸກລະກິດໃຫ້ດີຂຶ້ນເປັນວຽກງານໜຶ່ງທີ່ເຮັດໃຫ້ການລົງທຶນຈາກຕ່າງປະເທດ ແລະຈາກພາຍໃນປະເທດເພີ່ມຂຶ້ນພ້ອມທັງຈະເຮັດໃຫ້ການຜະລິດສິນຄ້າເພື່ອຕະຫຼາດພາຍໃນ ແລະການສົ່ງອອກໄປຕ່າງປະເທດໃຫ້ເພີ່ມຂຶ້ນສ້າງໃຫ້ຖານລາຍຮັບຂອງຊາດໃຫ້ໝັ້ນຄົງທາງດ້ານການເງິນ (ເງິນຕາຕ່າງປະເທດ) ພ້ອມທັງຈະຫຼຸດຜ່ອນເສດຖະກິດນອກລະບົບເຮັດໃຫ້ເສດຖະກິດມະຫາພາກດີຂຶ້ນເທື່ອລະກ້າວ,ປະຈຸບັນສະພາບເສດຖະກິດຂອງ ສປປ ລາວ ໄດ້ຮັບຜົນຈາກການປ່ຽນແປງຂອງເສດຖະກິດຊຶ່ງອັດຕາການຂະຫຍາຍຕົວເຄີຍສະເລ່ຍໃນລະດັບ 8% ຕະຫຼອດໄລຍະເກືອບສອງທົດສະ ວັດຜ່ານມາແຕ່ການຂະຫຍາຍຕົວດັ່ງກ່າວຍັງບໍ່ໄດ້ນໍາມາຊຶ່ງຜົນປະໂຫຍດໃຫ້ສັງຄົມລາວໄດ້ຢ່າງເທົ່າທຽມພ້ອມກັນນັ້ນຍັງມີຄວາມສ່ຽງສູງເປັນຕົ້ນໜີ້ສາທາລະນະຕໍ່ຈີດີພີ, ການຂຸດຄົ້ນຊັບພະຍາກອນທໍາມະຊາດທີ່ີມີອັດຕາສູນເສຍໃນລະດັບສູງ ແລະອຸດສາຫະກໍາທີ່ເປັນເຫດໃຫ້ເກີດບັນຫາມົນລະພິດເພີ່ມຂຶ້ນ, ນັບແຕ່ປີ2013 ເປັນຕົ້ນມາອັດຕາການຂະຫຍາຍຕົວຂອງເສດຖະກິດລາວກໍເລີ່ມຫຼຸດລົງເລື້ອຍໆຈົນຮອດ 6,5% ໃນປີ 2019 ຕາມການຄາດຄະເນຂອງທະນາຄານໂລກ.

ພາບຂ່າວ:

  ທ່ານ ອຸດເດດ ສຸວັນນະວົງ ປະທານ ສຄອຊ ໃຫ້ຮູ້ວ່າ: ນັບແຕ່ກອງປະຊຸມ ທຸລະກິດລາວຄັ້ງທີ 11 ຜ່ານມາ ສຄອຊ ໄດ້ຮ່ວມກັບກະຊວງອຸດສາຫະກຳ ແລະ ການຄ້າເອົາໃຈໃສ່ປັບປຸງຂັ້ນຕອນການສະເໜີ ແລະປຶກສາຫາລືແກ້ໄຂບັນຫາຂອງພາກທຸກລະກິດໄປແຕ່ລະບາດກ້າວຊຶ່ງພາກທຸກລະກິດໄດ້ມີການສະເໜີ 100 ກວ່າບັນຫາຊຶ່ງໄດ້ຄັດຈ້ອນເອົາ 23 ບັນຫາທີ່ມີຜົນກະທົບຫຼາຍຕໍ່ຂະແໜງການພາກລັດ ແລະພາກທຸລະກິດໃນນັ້ນແກ້ໄຂແລ້ວ 7 ບັນຫາ ແລະຈະສືບຕໍ່ 16 ບັນຫາ.

  ນອກນີ້ ປະທານ ສຄອຊ ຍັງໄດ້ສະ ເໜີຂອດຈໍາກັດທີ່ເປັນສິ່ງທ້າທາຍໃຫ້ແກ່ການຂະຫຍາຍຕົວເສດຖະກິດຂອງຊາດຊຶ່ງລວມມີ 7 ບັນຫາຄື: 1) ການຂາດ ເຂີນໂຄງລ່າງພື້ນຖານດ້ານຄົມມະນາຄົມ,  ອຸດສາຫະກໍາ, ຕົວເມືອງ ແລະອື່ນໆ ເພື່ອສະໜັບສະໜູນການພັດທະນາຊົນນະບົດ ແລະ ບັນດາຂະແໜງອຸດສາຫະກໍາຢູ່ພາຍໃນປະເທດ; 2) ກໍາລັງແຮງງານຍັງອ່ອນມີລະດັບການສຶກສາ ແລະທັກສະທີ່ຈໍາກັດຊຶ່ງເປັນອຸປະສັກໃຫ້ແກ່ການຂະຫຍາຍອຸດສາຫະກໍາການຜະລິດສິນຄ້າ; 3) ສະພາບແວດລ້ອມການດໍາເນີນທຸລະກິດຢູ່ລາວຍັງບໍ່ເອື້ອອໍານວຍ, ຊຶ່ງ ສປປ ລາວ ຍັງຖືກຈັດລະດັບຄວາມສະດວກຢູ່ທີ 154  ໃນ 191 ປະເທດ; 4)  ຄວາມສາມາດ ແລະກົນໄກຄຸ້ມຄອງຂອງລັດແມ່ນຍັງຈໍາກັດ ແລະຊັກຊ້າ, ສິ່ງສໍາຄັນກົນໄກສົ່ງເສີມການຜະລິດ ແລະການຈໍລະຈອນແຈກຢາຍສິນຄ້າບໍ່ສອດຄ່ອງຂາດການປະສານສົມທົບລະ ຫວ່າງ ຂະແໜງການ ແລະຍັງບໍ່ມີສ່ວນຮ່ວມຂອງພາກທຸລະກິດເທົ່າຄວນ.

ສະໜັບສະໜຸນໂດຍ: HONDA

 ສ່ວນບັນຫາທີ 5) ພາກທຸລະກິດໃນ ສປປ ລາວ ຍັງອ່ອນແອ ແລະບໍ່ມີທັກສະການແຂ່ງຂັນພຽງພໍຕໍ່ສາກົນຊຶ່ງ 98% ຂອງທຸລະກິດລາວເປັນຈຸນລະວິສາຫະກິດ, ວິ ສາຫະກິດຂະໜາດນ້ອຍ ແລະກາງ, ພ້ອມນັ້ນກໍຍັງມີທຸລະກິດບໍ່ເປັນທາງການກວມເອົາເກືອບ 60% ຂອງຈໍານວນທຸລະກິດທີ່ມີຢູ່; 6) ສປປ ລາວ ບໍ່ມີເສັ້ນທາງຕິດກັບທະເລເຮັດໃຫ້ໂຄງປະກອບຂອງການຄ້າ ແລະການລົງທຶນຕິດກັນກັບປະເທດອ້ອມຂ້າງ ຊຶ່ງ 60% ຂອງການສົ່ງອອກແມ່ນຢູ່ໃນປະເທດລຸ່ມແມ່ນໍ້າຂອງແລະການສົ່ງອອກສ່ວນໃຫຍ່ຢູ່ໃນຮູບແບບການຄ້າຊາຍແດນຊຶ່ງຖືເປັນເສດຖະກິດເງິນສົດ ແລະ ນອກລະ ບົບ; 7) ຕົ້ນທຶນການຜະລິດອຸດສາຫະກໍາຢູ່ລາວແມ່ນມີມູນຄ່າສູງຖ້າທຽບໃສ່ປະເທດອ້ອມຂ້າງເນື່ອງຈາກຄ່າໃຊ້ຈ່າຍໃນການປະຕິບັດຕາມກົດລະບຽບ, ການຂົນສົ່ງສິນຄ້າພາຍໃນ, ຂົນສົ່ງຜ່ານແດນລວມທັງການປະກອບເອກະສານແມ່ນ ມີມູນຄ່າສູງ, ນອກນີ້ແຮງງານຍັງມີຜະລິດຕະພາບຕໍ່າ ແລະລະບົບຄຸ້ມຄອງພາສີອາກອນຍັງບໍ່ຊັດເຈນ ແລະຊໍ້າຊ້ອນ.

__________

ຂຽນໂດຍ: ກິ່ງລັດຕະນະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์