ສຶກສາຄວາມເປັນໄປໄດ້ໂຄງການພະລັງງານໄຟຟ້າແສງຕາເວັນຢູ່ສາລະວັນ

  ພິທີເຊັນບົດບັນທຶກຄວາມເຂົ້າໃຈ ( MOU) ເພື່ອສຶກສາຄວາມເປັນໄປໄດ້ໂຄງການກໍ່ສ້າງພັດທະນາພະລັງງານໄຟຟ້າແສງຕາເວັນກຳລັງຕິດຕັ້ງ 5 MW, ຢູ່ເຂດອ່າງເກັບນໍ້າເຂື່ອນໄຟຟ້າເຊເສັດ-ຫ້ວຍເປາະພິທີດັ່ງກ່າວໄດ້ຈັດຂຶ້ນໃນວັນທີ 8 ພະຈິກ 2019 ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງ, ໂດຍການເປັນກຽດເຂົ້າຮ່ວມຂອງທ່ານ ວິຊຽນ ນະວິກຸນ ຮອງເຈົ້າແຂວງສາລະວັນຜູ້ຊີ້ນຳວຽກງານຂົງເຂດເສດຖະກິດຂັ້ນແຂວງ, ມີບັນດາທ່ານຫົວໜ້າພະແນກ-ຮອງພະແນກການຕ່າງໆທີ່ກ່ຽວຂ້ອງ, ພ້ອມດ້ວຍທ່ານຮອງເຈົ້າເມືອງໆເລົ່າງາມ ແລະຄະນະກຳມະການຄຸ້ມຄອງການລົງທຶນຂັ້ນແຂວງ, ພະນັກງານວິຊາການເຂົ້າຮ່ວມ.

ສະໜັບສະໜຸນໂດຍ: HONDA

  ທ່ານ ແສງດາລາ ວົງໄຊຍາ ຮອງປະທານບໍລິສັດຄູນຄຳກຣຸບ ຈຳກັດ ໄດ້ລາຍງານໃຫ້ຮູ້ວ່າ: ໂຄງການກໍ່ສ້າງພັດທະນາໄຟຟ້າແສງຕາເວັນຂອງກຸ່ມບໍລິສັດຄູນຄຳຈຳກັດ ກໍ່ເປັນອີກໂຄງການໜຶ່ງທີ່ນອນຢູ່ໃນເຂດອ່າງເກັບນໍ້າຂອງໂຄງການເຂື່ອນໄຟຟ້າຫ້ວຍເປາະພາວເວີ ຈຳກັດ,ໂຄງການນີ້ແມ່ນຕັ້ງຢູ່ເຂດບ້ານສັນທົ່ງ ເມືອງເລົ່າງາມແຂວງສາລະວັນ, ຊຶ່ງປະຈຸບັນນີ້ແມ່ນທາງບໍລິສັດໄດ້ຮັບສິດເປັນຜູ້ພັດທະນາໂຄງການ, ໂຄງການນີ້ຕາມການສຳຫຼວດເບື້ອງຕົ້ນແມ່ນມີກຳລັງຕິດຕັ້ງ 15 ເມກາວັດ, ແຕ່ຄວາມເປັນຈິງແລ້ວແມ່ນຜະລິດໄດ້ພຽງ 1 ເມກາວັດ, ຍ້ອນສະພາບດິນຟ້າອາກາດເຮັດໃຫ້ການຜະລິດກະແສໄຟຟ້າບໍ່ໄດ້ຕາມຄວາມເປັນຈິງ, ສະນັ້ນທາງບໍລິສັດຈຶ່ງໄດ້ມີການປັບປຸງການຜະລິດໂດຍການຫາແຫຼ່ງຜະລິດພະລັງງານເຂົ້າມາໃໝ່ເພື່ອເຮັດໃຫ້ການຜະລິດພະລັງງານໄຟຟ້າມີຄວາມສະຖຽນລະພາບທັງສອງລະດູ, ໂດຍໄດ້ເລັງເຫັນພື້ນທີ່ມີຄວາມເໝາະສົມນັ້ນກໍຄືພື້ນທີ່ອ່າງເກັບນໍ້າຂອງໂຄງການເຂື່ອນໄຟຟ້າຫວຍເປາະພາເວີ ຈຳກັດ, ທີ່ຈະພັດທະນາເປັນແຫຼ່ງຜະລິດພະລັງງານແສງຕາເວັນຂຶ້ນ, ຈາກການສຳຫຼວດເບື້ອງຕົ້ນເຫັນວ່າໂຄງການນີ້ແມ່ນມີຄວາມເປັນໄປໄດ້ສູງທີ່ຈະຊ່ວຍຕອບສະໜອງຄວາມຕ້ອງການດ້ານພະລັງງານໃຫ້ກັບໂຄງການເຂື່ອນໄຟຟ້າຫ້ວຍເປາະພາວເວີ ຈຳກັດ ແລະ ສາມາດຄາດຄະເນກຳລັງຕິດຕັ້ງໄດ້ຢູ່ໃນລະດັບ 5 ເມກາວັດ, ໃນອະນາຄົດຖ້າຫາກການລົງທຶນຂອງໂຄງການມີປະສິດທິຜົນສູງກໍ່ຈະໄດ້ມີແຜນການຂະຫຍາຍເພີ່ມອອກໄປຕື່ມອີກ.

 ຈາກນັ້ນກໍ່ໄດ້ມີການເຊັນສັນຍາບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໄດ້ຂອງໂຄງການຕາງໜ້າຄະນະກໍາມະການຄຸ້ມຄອງການລົງທຶນຂັ້ນແຂວງລົງນາມເຊັນໂດຍ ທ່ານ ປອ ໂພສີ ແກ້ວສີພັນດອນ ຫົວໜ້າພະແນກແຜນການແລະການລົງທຶນແຂວງ, ທ່ານ ໂພທິຍາ ວົງຈອມສີ ຮອງຫົວໜ້າພະແນກພະລັງງານ ແລະບໍ່ແຮ່ແຂວງສາລະວັນ, ຝ່າຍບໍລິສັດລົງນາມໂດຍທ່ານ ແສງດາລາ ວົງໄຊຍາ ຮອງປະທານບໍລິສັດຄູນຄໍາກຣຸບ ຈໍາກັດ ໂດຍຊ້ອງໜ້າທ່ານ ວິຊຽນ ນະວິກຸນ ຮອງເຈົ້າແຂວງສາລະວັນຜູ້ຊີ້ນຳວຽກງານຂົງເຂດເສດຖະກິດຂັ້ນແຂວງພ້ອມດ້ວຍຄະນະກຳມະການການຄຸ້ມຄອງການລົງທຶນຂັ້ນແຂວງ ແລະແຂກຖືກເຊີນຈາກພາກສ່ວນຕ່າງໆທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ສະໜັບສະໜຸນໂດຍ: ສ່ວນບຸກຄົນ

__________

ຂຽນໂດຍ: ທິດລານີ ໂຄດໂຍທາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์