ສ້າງສິ່ງອຳນວຍຄວາມສະດວກໃຫ້ນັກທ່ອງທ່ຽວ

 ທ່ານ ບຸນເຫຼືອ ສິນທະວົງ ນາຍບ້ານໆໂພນສະອາດ ໃຫ້ຮູ້ວ່າ: ໂຄງການສ້າງຂົວໄມ້ປ່ອງຂ້າມນໍ້າຄານ (ຈຸດປາກນໍ້າຄານ) ແມ່ນ ໂຄງການໜຶ່ງຂອງບ້ານໂພນສະອາດເພື່ອເປັນການສ້າງສີສັນສົ່ງ ເສີມການທ່ອງທ່ຽວ ແລະສ້າງລາຍຮັບໃຫ້ກັບບ້ານຊຶ່ງໂຄງການສ້າງຂົວໄມ້ປ່ອງແມ່ນໄດ້ເລີ່ມມາແຕ່ປີ 2006 ເປັນຕົ້ນມາລວມ 10 ກວ່າ ປີແລ້ວ ຊຶ່ງຈະໄດ້ເຫັນມີພາບຂົວ ໄມ້ປ່ອງຢູ່ທີ່ປາກນໍ້າຄານແຫ່ງນີ້ ແຕ່ລະປີນັບແຕ່ເດືອນຕຸລາໄປຮອດເດືອນມິຖຸນາເທົ່ານັ້ນ.

ເພື່ອແນໃສ່ສ້າງສິ່ງອໍານວຍ ຄວາມສະດວກໃຫ້ແກ່ນັກທ່ອງທ່ຽວ ຍ່າງຂ້າມໄປ-ມາເພື່ອຊົມທິວທັດທໍາມະຊາດເຂດປາກນໍ້າຄານຕໍ່ໃສ່ແມ່ນໍ້າຂອງ, ຊົມພູທ້າວ-ພູນາງ ຟາກແມ່ນໍ້າຂອງທາງເມືອງຈອມເພັດ ແລະໄປທ່ຽວຊົມບ້ານຫັດຖະ ກໍາຊ່າງຄ້ອງ ໂດຍໃຊ້ເວລາສັ້ນກວ່າຂີ່ລົດໂຄ້ງອອກໄປທາງຂົວໃໝ່ຊຶ່ງໃນແຕ່ລະປີໄດ້ມີແຂກນັກທ່ອງທ່ຽວຈາກທັງພາຍໃນແລະຕ່າງປະເທດໄປໃຊ້ບໍລິການເປັນຈໍານວນຫຼາຍສາມາດສ້າງລາຍຮັບໃຫ້ກັບບ້ານໂພນສະອາດ ປີໜຶ່ງປະມາ30-40 ລ້ານກວ່າກີບ, ສໍາລັບຄ່າປີ້ຜ່ານຂົວນັກທ່ອງທ່ຽວຕ່າງປະເທດເກັບຄົນລະ 10 ພັນກີບໄປ-ກັບ, ຄົນລາວ 2.000 ກີບ.

ທ່ານນາຍບ້ານຍັງໃຫ້ຮູ້ຕື່ມວ່າ ບ້ານໂພນສະອາດຕັ້ງຢູ່ລະຫວ່າງ ກາງແມ່ນໍ້າຂອງ ແລະແມ່ນໍ້າຄານ, ມີ 193 ຄອບຄົວ, ພົນລະເມືອງ 1.159 ຄົນ, GDP ບັນລຸ 17 ຕື້ ກວ່າກີບ,ສະເລ່ຍໃສ່ຫົວຄົນໜຶ່ງປະມານ 17 ລ້ານກວ່າກີບຕໍ່ຄົນຕໍ່ປີ.ຫາກທ່ານໃດທີ່ໄດ້ມາທ່ຽວຊົມນະຄອນຫຼວງພະບາງ ຊ່ວງນີ້ເປັນຕົ້ນໄປກໍຢ່າລືມໄປໃຊ້ບໍລິການເດີຮັບຮອງວ່າທ່ານຈະມີພາບມູມງາມໆຈາກປາກນໍ້າຄານເຊື່ອມຕໍ່ແມ່ນໍ້າຂອງໄວ້ໃນມືຖືຂອງທ່ານເພື່ອໄວ້ເບິ່ງເວລາກັບບ້ານບໍ່ຜິດຫວັງ ໂດຍສະເພາະແມ່ນພາບຢາມ ແລງ.

--------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์