ປາກອູ ຫາລືກັບນັກທຸລະກິດທີ່ລົງທຶນພາຍໃນເມືອງ

 ເມື່ອບໍ່ດົນມານີ້ທີ່ສະໂມສອນໃຫຍ່ຂອງເມືອງປາກອູ ແຂວງຫຼວງພະບາງ ໄດ້ຈັດກອງປະຊຸມປຶກສາຫາລືຮ່ວມນັກທຸລະກິດທີ່ລົງທຶນຢູ່ພາຍໃນເມືອງປາກອູເພື່ອຫ້າງຫາກະ ກຽມໃຫ້ແກ່ກອງປະຊຸມໃຫຍ່ອົງຄະນະພັກເມືອງປາກອູຄັ້ງທີ 8 ໂດຍການເປັນປະທານຂອງ ທ່ານ ໄຊເຢຍ ເຊັ່ງທ່າວ ຮອງເຈົ້າເມືອງປາກອູ, ມີຫົວໜ້າຫ້ອງການກ່ຽວ ຂ້ອງ, ຜູ້ອໍານວຍການບໍລິສັດ, ບັນດາຜູ້ຕາງໜ້າບໍລິສັດຫົວໜ່ວຍທຸລະກິດທີ່ມາລົງທຶນຢູ່ພາຍໃນເມືອງປາກອູເຂົ້າຮ່ວມ.

ທ່ານ ໄຊເຢຍ ເຊັ່ງທ່າວ ຮອງເຈົ້າເມືອງປາກອູ ໄດ້ມີຄໍາເຫັນຊີ້ແຈງຈຸດປະສົງການເປີດກອງປະຊຸມຄັ້ງນີ້ກໍ່ເພື່ອປຶກສາຫາລືແລກປ່ຽນຄໍາຄິດຄໍາເຫັນລະຫວ່າງພາກລັດ ແລະນັກທຸລະກິດທີ່ມາລົງທຶນຢູ່ພາຍໃນເມືອງປາກອູ ໂດຍສະເພາະໄດ້ເນັ້ນໜັກຮຽກຮ້ອງໃຫ້ບັນດາຜູ້ອໍານວຍການບໍລິສັດ, ຜູ້ຕາງໜ້າບໍລິສັດ, ຫົວໜ່ວຍທຸລະກິດຕ່າງໆໃຫ້ຂຶ້ນມີຄໍາເຫັນຕໍ່ກັບສະພາບການຂອງບັນດາບໍລິສັດ, ວ່າມີຄວາມສະດວກຄວາມຫຍຸ້ງຍາກແນວໃດ ແລ້ວທາງພາກລັດກໍຈະໄດ້ນໍາເອົາຄໍາຄິດເຫັນດັ່ງກ່າວມາປັບປຸງໃຫ້ຖືກຕ້ອງສອດຄ່ອງ ແລະຫັນເຂົ້າສູ່ລະບຽບກົດໝາຍທີ່ທາງຂັ້ນເທິງໄດ້ກຳນົດໄວ້.

ສະໜັບສະໜຸນໂດຍ: HONDA

  ຈາກນັ້ນ, ທ່ານ ສົມບຸນ ພົມມະປັນຍາ ຫົວໜ້າຫ້ອງການແຜນການ ແລະການລົງທຶນເມືອງປາກອູກໍ່ໄດ້ຜ່ານແຜນພັດທະນາເສດຖະກິດ-ສັງຄົມ ປີ2014-2019 ໄດ້ໃຫ້ຮູ້ວ່າສາມາດເກັບກໍາການລົງທຶນຂອງລັດ, ທຶນເອກະຊົນ, ທຶນຊ່ວຍເຫຼືອລ້າຈາກຕ່າງປະເທດ ທີ່ເຂົ້າມາລົງທຶນຢູ່ພາຍໃນເມືອງປາກອູມີທັງໝົດ 126 ໂຄງການມີມູນຄ່າ 94 ຕື້ກວ່າກີບ ໃນນັ້ນການລົງທຶນຂອງລັດມີ 34 ໂຄງການມີມູນຄ່າ 30 ຕື້ກວ່າກີບ, ການລົງທຶນຂອງເອກະຊົນມີ 37 ໂຄງການມີມູນຄ່າ 12 ຕື້ກວ່າກີບ, ການລົງທຶນຊ່ວຍເຫຼືອລ້າຈາກຕ່າງປະເທດ ມີ 35 ໂຄງການມີມູນຄ່າ 12 ຕື້ກວ່າກີບ, ທຶນສົມທົບປະຊາຊົນ ມີ 19 ໂຄງການມີມູນຄ່າ 658 ລ້ານກີບ ແລະທຶນກູ້ຢືມມີ 1 ໂຄງການ ມູນຄ່າ 38 ຕື້ກວ່າກີບ.

 ພາຍຫຼັງສໍາເລັດກອງປະຊຸມປຶກສາຫາລືແລ້ວບັນດາຜູ້ອໍານວຍການບໍລິສັດ, ຜູ້ຕາງໜ້າບໍລິສັດ, ຫົວໜ່ວຍທຸລະກິດຕ່າງໆທີ່ມາລົງທຶນຢູ່ເມືອງປາກອູກໍໄດ້ຊຸກຍູ້ເປັນວັດຖຸ ແລະເງິນຈໍານວນໜຶ່ງ, ນອກຈາກນີ້ແລ້ວກໍ່ຍັງມີຫຼາຍພາກສ່ວນທີ່ຈະມາຊຸກຍູ້ເປັນວັດຖຸ ຫຼືວ່າເປັນຈໍານວນເງິນຕື່ມອີກເພື່ອປະກອບສ່ວນເຂົ້າໃນການຫ້າງຫາກະກຽມໃຫ້ແກ່ກອງປະຊຸມໃຫຍ່ຂອງອົງຄະນະພັກເມືອງປາກອູຄັ້ງທີ 8 ທີ່ຈະເປີດຂຶ້ນໃນມໍ່ໆນີ້.

ສະໜັບສະໜຸນໂດຍ: ສ່ວນບຸກຄົນ

___________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์