ກຳປູເຈຍ ປະກາດແຜນພັດທະນາປະເທດ ໄລຍະ 5 ປີ

  ສົມເດັດຮຸນເຊນຜູ້ນໍາກຳປູເຈຍປະກາດແຜນການພັດທະນາຍຸດທະສາດແຫ່ງຊາດປະຈຳປີ 2019-2023 ເປັນຈຳນວນເງິນ 60 ຕື້ໂດລາສະຫະລັດ.

  ຕາມຂ່າວຕ່າງປະເທດລາຍງານວ່າຜູ້ນໍາກຳປູເຈຍກ່າວວ່າແຜນພັດທະນາດັ່ງກ່າວມີຈຸດປະສົງທີ່ຈະເຮັດໃຫ້ກຳປູເຈຍມີການຂະຫຍາຍຕົວທາງເສດຖະກິດທີ່ຍືນຍົງໃນລະດັບ 7% ຕໍ່ປີ ໃນໄລຍະຍາວ ແລະຫຼຸດອັດຕາຄວາມທຸກຍາກຂອງປະເທດລົງຕໍ່າກວ່າລະດັບ 10%, ດ້ານກະຊວງວາງແຜນການພັດທະນາກຳປູເຈຍກ່າວວ່າລັດຖະ ບານຈະສົມທົບທຶນ 27,5% ໃນວົງເງິນພັດທະນາປະເທດດັ່ງກ່າວຂະນະທີ່ອີກ 72,5% ຈະມາຈາກຂະແໜງເອກະຊົນໂດຍຈະໃຫ້ຄວາມສຳຄັນຕໍ່ການພັດທະນາຊັບພະຍາກອນບຸກຄົນ, ຖະໜົນ, ແຫຼ່ງນໍ້າ ແລະກະແສໄຟຟ້າ ໂດຍແຜນການນີ້ມີຄວາມສຳຄັນຕໍ່ການສະໜັບສະໜູນເປົ້າໝາຍໃນການເຮັດໃຫ້ ກຳປູເຈຍເປັນປະເທດຊັ້ນນໍາໃນກຸ່ມປະເທດທີ່ມີລາຍໄດ້ຂະໜາດກາງພາຍໃນປີ 2030 ແລະຕິດກຸ່ມປະເທດທີ່ມີລາຍໄດ້ສູງພາຍໃນປີ 2050, ທັງນີ້ການສົ່ງອອກແຜ່ນແພ,ການກໍ່ສ້າງ ແລະ ອະສັງຫາລິມະຊັບ,ການທ່ອງທ່ຽວ ແລະກະສິກຳຍັງເປັນຕົວເລກຂັບເຄື່ອນເສດຖະກິດຂອງກຳປູເຈຍ ໂດຍຄາດວ່າ ແຜ່ນແພ ແລະ ການກໍ່ສ້າງຈະຂະຫຍາຍຕົວ 10% ໃນ ປີ 2019 ຄາດວ່າຂະແໜງການບໍລິການເຊັ່ນການທ່ອງທ່ຽວ, ການຂົນສົ່ງ, ໂທລະຄົມມະນາຄົມ ແລະອະສັງຫາລິມະຊັບຈະຂະຫຍາຍ ຕົວ 7% ສ່ວນຂະແໜງກະສິກຳຄາດວ່າຈະຂະຫຍາຍຕົວ 1,8%.

 ຂະນະທີ່ລັດຖະບານກຳປູເຈຍຄາດຄະເນການເຕີບໂຕທາງເສດຖະກິດຂອງປະເທດວ່າຈະຂະຫຍາຍຕົວ 7,1% ໃນປີ 2019 ໃກ້ຄຽງກັບອັດຕາການເຕີບໂຕປີ 2018 ທີ່ຈະຊຸກຍູ້ໃຫ້ຈີດີພີຂອງປະເທດມີມູນຄ່າ 27,2 ຕື້ໂດລາສະຫະລັດສຳລັບຕົວເລກຜະລິດຕະພັນພາຍໃນ (ຈີດີພີ)ຕໍ່ຫົວຄົນຄາດວ່າຈະຢູ່ທີ່ 1.706 ໂດ ລາໃນປີນີ້ເພີ່ມ ຂຶ້ນ 9,1% ຈາກ 1.563 ໂດລາ.

-----------------

 ໜັງສືພິມເສດຖະກິດ-ສັງຄົມ

แชร์