ຝຶກອົບຮົມ ໃຫ້ປະຊາຊົນຫຼີກເວັ້ນການນໍາໃຊ້ ສານເຄມີເຂົ້າໃນການກະເສດ

  ພະແນກສຶກສາທິການ ແລະກີລາແຂວງ (ສກຂ) ຊຽງຂວາງ ຈັດຝຶກອົບຮົມກ່ຽວກັບຄວາມຮູ້ຈາກຜົນກະທົບຂອງການນໍາໃຊ້ສານເຄມີເຂົ້າໃນການຜະລິດການກະເສດຕ່າງໆ ພ້ອມທັງວິທີການ ສັກຢາປ້ອງກັນພະຍາດສັດໃຫ້ແກ່ຊຸມຊົນຊາວບ້ານນາໄຊ ເມືອງຜາໄຊແຂວງຊຽງຂວາງໃນວັນທີ 7 ພະຈິກ 2019 ທີ່ໂຮງຮຽນມັດທະຍົມສົມບູນບ້ານນາໄຊ ໂດຍໃຫ້ກຽດເປັນປະທານຂອງທ່ານ ທອງ ເພັດ ອິນທະໄຊ ຮອງຫົວໜ້າພະແນກ ສກຂ, ມີທ່ານ ນາງຂັນ ທອງ ພົມມະວັນ ຮອງຫົວໜ້າຂະແໜງການສຶກສານອກໂຮງຮຽນ (ກສນ) ພະແນກ ສກຂ ພ້ອມຄະນະ,ມີຂະແໜງການທີ່ກ່ຽວຂ້ອງຂອງພະແນກ ສກຂ, ຄູຝຶກຂັ້ນ ແຂວງ,ອໍານາດການປົກຄອງບ້ານນາໄຊ, ພະນັກງານລົງກໍ່ສ້າງຮາກຖານ, ຄູ-ອາຈານສອນຕະຫຼອດຮອດຊຸມຊົນຊາວບ້ານນາໄຊ ເຂົ້າຮ່ວມ.

ສະໜັບສະໜຸນໂດຍ: HONDA

  ໂອກາດນີ້ທ່ານ ນາງ ຂັນທອງ ພົມມະວັນ ໄດ້ກ່າວລາຍງານໃຫ້ຮູ້ ເຖິງຈຸດປະສົງເປົ້າໝາຍຂອງການຝຶກອົບຮົມແມ່ນເພື່ອປູກຈິດສໍານຶກ ໃຫ້ແກ່ພໍ່ແມ່ປະຊາຊົນຊາວບ້ານນາໄຊ ເມືອງຜາໄຊ ຊຶ່ງເປັນບ້ານ ເປົ້າໝາຍຮັບຮູ້ເຂົ້າໃຈເຖິງຜົນກະທົບຂອງການນໍາໃຊ້ສານເຄມີເຂົ້າໃນການຜະລິດການກະເສດຕ່າງໆ ພ້ອມທັງຫຼີກເວັ້ນການນໍາໃຊ້ສານ ເຄມີເຫຼົ່ານັ້ນໂດຍສິ້ນເຊີງເຊັ່ນ:ການນໍາໃຊ້ສານເຄມີປາບສັດຕູພືດ,ການໃຊ້ຢາຂ້າຫຍ້າ,ການໃຊ້ປຸຍເຄມີ ເລັ່ງພືດເລັ່ງໝາກ ເລັ່ງໃບ ຫຼື ໃຊ້ກໍລະນີໃດໆກໍຕາມລ້ວນແລ້ວແຕ່ເປັນຜົນກະທົບອັນຮ້າຍແຮງຕໍ່ຮ່າງກາຍຂອງຄົນເຮົາເມື່ອນໍາເອົາຜົນຜະລິດເຫຼົ່ານັ້ນໄປອຸປະໂພກບໍລິໂພກເປັນຕົ້ນແມ່ນຄອບຄົວທີ່ນໍາໃຊ້ສານເຄມີຕົວຈິງ, ປະຊາຊົນພາຍ ໃນບ້ານ ແລະບ້ານໃກ້ຄຽງຈະໄດ້ ຮັບຜົນກະທົບຫຼາຍກ່ວາໝູ່ຈາກນັ້ນກໍຈະແຜ່ກະຈາຍໄປສູ່ຊຸມຊົນອ້ອມຂ້າງ,ນອກຈາກມີຜົນກະທົບຕໍ່ຊີວິດຄົນເຮົາແລ້ວສັດສາວາສິ່ງທີ່ອາໄສຢູ່ທາງບົກ ຫຼື ທາງນໍ້າກໍໄດ້ຮັບຜົນກະທົບເຊັ່ນດຽວກັນ,ຍ້ອນເຫັນໄດ້ຜົນກະທົບທີ່ບໍ່ພຶ່ງປາຖະໜາເຊັ່ນນັ້ນທາງຂະແໜງການທີ່ກ່ຽວຂ້ອງຂອງພະແນກໂດຍສົມທົບກັບຄະນະພະແນກ ສກຂ ຈຶ່ງໄດ້ຈັດຝຶກອົບຮົມໃຫ້ຄວາມຮູ້ແກ່ຊຸມຊົນເພື່ອຫຼີກເວັ້ນຈາກການນໍາໃຊ້ສານເຄມີ ເຂົ້າໃນການຜະລິດການກະເສດຕ່າງໆ, ໃຫ້ຫັນມານໍາໃຊ້ຝຸ່ນທໍາມະຊາດ ຫຼື ຝຸ່ນຊີວະພາບເຂົ້າໃນການຜະລິດເພື່ອສຸຂະພາບທີ່ດີຂອງຄົນ ເຮົາກໍຄືສັດສາວາສິ່ງທີ່ດໍາລົງຊີ ວິດຢູ່ໃນປະຈຸບັນ ແລະອານາຄົດ,ພ້ອມດຽວກັນນັ້ນການກໍາຈັດເສດຂີ້ເຫຍື້ອທີ່ນໍາໃຊ້ແລ້ວຢູ່ຕາມອາຄານບ້ານເຮືອນ,ໂຮງຮຽນ ຫຼື ສະຖານທີ່ຕ່າງໆ ກໍເປັນອີກປັດໄຈໜຶ່ງທີ່ສົ່ງຜົນກະທົບຕໍ່ການດໍາລົງຊີວິດຂອງຄົນເຮົາຖ້າເຮົາຫາກບໍ່ກໍາຈັດ ໃຫ້ຖືກວິທີຕາມຫຼັກອານາໄມ, ເປັນໂຕແປທີ່ສໍາຄັນພາໃຫ້ເກີດພະຍາດຕ່າງໆຕໍ່ກັບຮ່າງກາຍຂອງຄົນເຮົາເຊັ່ນດຽວກັນ,ຖ້າເຮົາຫາກຮູ້ວິທີກໍາຈັດ ແລະຮັກສາສະພາບແວດທີ່ດີກໍຈະສົ່ງຜົນດີຕໍ່ການດໍາລົງຊີວິດ,ນອກນັ້ນຍັງໃຫ້ຄວາມຮູ້ ແກ່ຊຸມຊົນໃນປ້ອງກັນພະຍາດທີ່ເກີດຂຶ້ນກັບສັດອີກດ້ວຍເຊັ່ນວ່າການສັກຢາປ້ອງກັນຕາມຫຼັກການ ທັນຕະແພດ, ໂດຍຈະໃຊ້ເວລາຝຶກອົບຮົມທັງໝົດ 2 ວັນ ຈຶ່ງຈະສໍາເລັດ.

ພາບຂ່າວ:

ໂອກາດດັ່ງກ່າວທ່ານ ທອງເພັດ ອິນທະໄຊ ໄດ້ສະແດງຄວາມຊົມເຊີຍຕໍ່ຄະນະຮັບຜິດຊອບທີ່ໄດ້ພ້ອມກັນຫ້າງຫາກະກຽມເຮັດໃຫ້ບັ້ນຝຶກອົບຮົມໄຂຂຶ້ນທັນຕາມກໍານົດເວລາ ,ທ່ານຍັງໄດ້ຍົກໃຫ້ເຫັນເຖິງຜົນກະທົບທີ່ເກີດຂຶ້ນໃນສັງຄົມປະຈຸບັນຕໍ່ກັບການນໍາໃຊ້ສານເຄມີເຂົ້າໃນການຜະລິດການກະເສດຕ່າງໆ ຊຶ່ງມີຜົນກະທົບຕໍ່ສຸຂະພາບເຮັດໃຫ້ສຸ ຂະພາບບໍ່ສົມບູນມັກເຈັບເປັນ ແລະພະຍາດຕ່າງໆມັກເກີດຂຶ້ນກັບຮ່າງກາຍ,ບາງຄົນກາຍເປັນອຳມະພາດ,ເກີດເປັນມະເລັງ ແລະເສຍຊີວິດກະທັນຫັນຍ້ອນໄດ້ຮັບຜົນກະທົບຮ້າຍແຮງ,ເຊື່ອໝັ້ນວ່າການຝຶກອົບຮົມຄັ້ງນີ້ຈະເປັນບົດຮຽນ ແລະເປັນຄະຕິເຕືອນໃຈໃຫ້ກັບພໍ່ແມ່ປະຊາຊົນທີ່ເຂົາຮ່ວມເພື່ອຫຼີກເວັ້ນການນໍາໃຊ້ສານເຄມີເຂົ້າໃນການຜະລິດການກະເສດຕ່າງໆ, ທ່ານຍັງໄດ້ຮຽກຮ້ອງໃຫ້ທຸກຄົນຈົ່ງຕັ້ງໃຈຈົດບັນທຶກ ແລະສົນທະນານໍາຄູຝຶກໃຫ້ເຂົ້າໃຈຢ່າງກະຈ່າງແຈ້ງ, ນໍາເອົາຄວາມຮູ້ໄປຈັດຕັ້ງປະຕິບັດໃຫ້ໄດ້ຮັບຜົນດີເພື່ອຜົນປະໂຫຍດຂອງຄອບຄົວ ແລະຕົນເອງ.

ສະໜັບສະໜຸນໂດຍ: ສ່ວນບຸກຄົນ

___________

 ໜັງສືພິມເສດຖະກິດ-ສັງຄົມ

แชร์