ຕົວເລກເຕີບໂຕເສດຖະກິດລາວ ປີນີ້ຈະຫຼຸດຄາດໝາຍ

  ປະຈຸບັນສະພາບການພັດທະນາເສດຖະກິດ-ສັງຄົມແມ່ນໄດ້ພົບຄວາມຫຍຸ້ງຍາກ ແລະທ້າທາຍຫຼາຍຂຶ້ນເນື່ອງຈາກສະພາບແວດລ້ອມຂອງສາກົນສືບຕໍ່ຜັນແປຢ່າງສັບສົນແລະບັນຫາອື່ນໆ ເຮັດໃຫ້ເສດຖະກິດໂລກຖືກກະທົບອັດຕາການເຕີບໂຕຫຼຸດລົງຕໍ່າສຸດໃນຮອບ 10 ປີ ນອກນັ້ນຍັງມີສະພາບແວດລ້ອມພາຍໃນໂດຍສະເພາະໄພພິບັດທາງທຳມະຊາດທີ່ສ້າງຜົນເສຍຫາຍຫຼາຍດ້ານຕໍ່ການພັດທະນາເສດຖະກິດແນວໃດກໍດີໃນປີນີ້ຕົວເລກການເຕີບໂຕຂອງເສດຖະກິດບັນລຸໄດ້ 6,4% ຫຼຸດຄາດໝາຍຂອງສະພາແຫ່ງຊາດຮັບຮອງແຕ່ເປັນຕົວເລກທີ່ມີການເຕີບໂຕຕໍ່ເນື່ອງ ແລະທີ່ສຳຄັນການເຕີບໂຕດັ່ງກ່າວເປັນການເຕີບໂຕທີ່ຂ້ອນຂ້າງມີຄຸນນະພາບກວ່າເກົ່າ.

  ທ່ານ ທອງລຸນ ສີສຸລິດ ນາຍົກລັດຖະມົນຕີລາຍງານການປະຕິບັດວຽກງານພົ້ນເດັ່ນປີ 2019 ແລະ ທິດທາງວຽກງານຈຸດສຸມໃນປີ 2020 ຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ວ່າ: ການຈັດຕັ້ງແຜນພັດທະນາເສດຖະກິດ-ສັງຄົມປີ 2019 ແມ່ນທາມກາງສະພາບແວດລ້ອມຂອງສາກົນສືບຕໍ່ຜັນແປຢ່າງສັບສົນ, ສົງຄາມການຄ້າລະຫວ່າງປະເທດມະຫາອຳນາດບວກກັບຄວາມເຄັ່ງຕຶງຢູ່ຂົງເຂດຕ່າງໆຂອງໂລກໄດ້ສົ່ງຜົນກະທົບຕໍ່ການພັດທະນາທັງທາງກົງ ແລະ ອ້ອມຕໍ່ຫຼາຍປະເທດ, ສ້າງຄວາມຜັນຜວນຕໍ່ຕະຫຼາດການເງິນ ແລະ ຕະຫຼາດທຶນໃນທົ່ວໂລກເຮັດໃຫ້ການເຕີບໂຕຂອງເສດຖະກິດໂລກຖືກກະທົບໂດຍ IMF ໄດ້ປັບຫຼຸດການຄາດຄະເນອັດຕາການເຕີບໂຕຂອງເສດຖະກິດໂລກລົງອີກຈາກ 3,2% ໃນປີ 2019 ເປັນ 3% ແລະ ຈາກ 3,5% ປີ2020 ເປັນ3,4% ຖືວ່າຕໍ່າສຸດໃນຮອບ 10 ປີ, ການຂະຫຍາຍຕົວຂອງບັນດາປະເທດກຳລັງພັດທະນາໃນອາຊີກໍ່ຊ້າລົງຖ້າທຽບໃສ່ຫຼາຍປີຜ່ານໆມາ.

  ນອກນັ້ນລາຄານໍ້າມັນໃນຕະຫຼາດໂລກຍັງມີຄວາມຜັນຜວນຍ້ອນຄວາມບໍ່ສະຫງົບຢູ່ຕາເວັນອອກກາງທີ່ກະທົບແຫຼ່ງຜະລິດຊຶ່ງໃນອະນາຄົດອາດເຮັດໃຫ້ລາຄານໍ້າມັນໃນຕະຫຼາດໂລກ ແລະ ປະເທດປາຍທາງຄືປະເທດລາວສູງຂຶ້ນຕື່ມຢ່າງຫຼີກລຽງບໍ່ໄດ້ໄປຄຽງຄູ່ກັບສະພາບແວດລ້ອມພາຍນອກເປັນເຊັ່ນນີ້, ສະພາບພາຍໃນປະເທດເຮົາໃນປີນີ້ກໍຍັງບໍ່ທັນຫຼຸດພົ້ນຈາກຄວາມທຸກຍາກທີ່ມີລັກສະນະຊຳເຮື້ອແຫ່ງການຂາດດຸນໃນດ້ານຕ່າງໆທີ່ໜັກໜ່ວງບວກກັບໄພພິບັດທາງອຸທົກກະໄພໃນປີ 2018 ແລະ 2019 ລຽນຕິດກັນໄດ້ກາຍເປັນອຸປະສັກໃຫ້ແກ່ການພັດທະນາທັງເປັນການຈຳກັດແຫຼ່ງງົບປະມານເພື່ອອັດສີດເຂົ້າໃສ່ການກະຕຸ້ນເສດຖະກິດ ແລະຈັດຕັ້ງປະຕິບັດໂຄງການຕ່າງໆເພື່ອການເຕີບໂຕຂອງເສດຖະກິດໃນປີ2019.

ການແກ້ໄຂຄວາມຫຍຸ້ງຍາກດ້ານເສດຖະກິດໃນປີ 2019 ໄດ້ຖືກຊໍ້າເຕີມດ້ວຍຜົນກະທົບຈາກໄພທຳມະຊາດທີ່ມີຄວາມໜັກໜ່ວງບໍ່ໜ້ອຍກວ່າປີ2018 ໂດຍໃນປີ 2019 ນອກຈາກນໍ້າຖ້ວມ 6 ແຂວງພາກໃຕ້ແລ້ວຍັງຊ້ຳພັດເກີດໄພແລ້ງຂຶ້ນສອງຮອບໃນປີດຽວກັນອັນໄດ້ສົ່ງຜົນໃຫ້ການປູກເຂົ້າ, ພືດລະດູຝົນຫຼ້າຊ້າ ແລະ ເສຍຫາຍລວມທັງກະທົບຕໍ່ການລ້ຽງສັດ, ການປະມົງ, ກະທົບຜະລິມານນໍ້າເພື່ອຜະລິດໄຟຟ້າ ແລະສະໜອງນໍ້າປະປາຫຼຸດລົງນອກນີ້ຍັງມີການລະບາດຂອງພະຍາດອະຫິວາໝູອາຟຣິກາ, ການລະບາດຂອງບົ້ງສາລີ ແລະໄພນໍ້າຖ້ວມໜັກໜ່ວງທີ່ສຸດໃນຮອບຫຼາຍສິບປີຢູ່ບັນດາແຂວງພາກກາງ ແລະພາກໃຕ້, ສະພາບດັ່ງກ່າວເຮັດໃຫ້ການສະໜອງພາຍໃນບໍ່ພຽງ ພໍ ແລະຍັງເຮັດໃຫ້ລາຄາສະບຽງອາຫານໃນທ້ອງຕະຫຼາດເພີ່ມຂຶ້ນ.

ສະໜັບສະໜຸນໂດຍ: ສ່ວນບຸກຄົນ

  ທ່ານ ທອງລຸນ ສີສຸລິດ ກ່າວຕື່ມວ່າ: ສະພາບແວດລ້ອມທັງສາກົນ ແລະພາຍໃນທີ່ກ່າວມານັ້ນໄດ້ສົ່ງຜົນກະທົບທາງກົງແລະທາງອ້ອມຕໍ່ການຄຸ້ມຄອງເສດຖະກິດມະຫາພາກຂອງປະເທດເຮົາທີ່ມີຄວາມບອບບາງຢູ່ແລ້ວໃຫ້ພົບຄວາມຫຍຸ້ງຍາກ ແລະທ້າທາຍຫຼາຍຂຶ້ນແນວໃດກໍຕາມການເຕີບໂຕຂອງເສດຖະກິດບັນລຸໄດ້6,4% (ຄາດໝາຍໝົດປີ 2019) ຊຶ່ງຫຼຸດຄາດໝາຍທີ່ສະພາແຫ່ງຊາດຮັບຮອງແຕ່ກໍຍັງເປັນຕົວເລກການເຕີບໂຕໃນລະດັບດີຕໍ່ເນື່ອງທີ່ສຳຄັນການເຕີບໂຕດັ່ງກ່າວແມ່ນການເຕີບໂຕທີ່ຂ້ອນຂ້າງມີຄຸນນະພາບກວ່າເກົ່າ, ການດຸ່ນດ່ຽງລາຍຮັບ-ລາຍຈ່າຍພາຍໃນມີທ່າຕັ້ງໜ້າ, ອັດຕາການຂາດດຸນງົບປະມານຕໍ່ຈີດີພີຫຼຸດລົງຈາກປະມານ 6% ໃນຊ່ວງປີ 2015-2016 ມາເປັນ 4% ໃນປີ 2018, ລາຍຮັບຈາກພາຍໃນເພີ່ມຂຶ້ນຈາກປະມານ 21 ພັນຕື້ກີບ ໃນປີ 2016 ມາເປັນ 26,2 ພັນຕື້ກີບ ໃນປີ2019.

ສະໜັບສະໜຸນໂດຍ: HONDA

   ທັງໝົດເຫຼົ່ານີ້ເຖິງວ່າຈະເຮັດໃຫ້ອັດຕາການເຕີບໂຕຂອງເສດຖະກິດຫຼຸດລົງໃນໄລຍະສັ້ນແຕ່ເປັນການຫຼຸດລົງທີ່ຈຳເປັນຊຶ່ງເປັນການຫັນເຂົ້າສູ່ພື້ນຖານການຜະລິດຈິງ ເພື່ອສ້າງຄວາມໜັກແໜ້ນໃຫ້ແກ່ການເຕີບໂຕທີ່ໝັ້ນທ່ຽງຍືນຍົງທັງເປັນການສ້າງຖານການຜະລິດ ແລະການກະຈາຍລາຍຮັບອອກສູ່ປະຊາຊົນໃນທ້ອງຖິ່ນຕ່າງໆ.

_____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์