ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ໄຂຂື້ນເປັນທາງການ

  ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ VIII ໄດ້ ໄຂຂຶ້ນຢ່າງເປັນທາງການໃນຕອນເຊົ້າວັນທີ 7 ພະຈິກຜ່ານມາ ທີ່ຫໍສະພາແຫ່ງຊາດຫຼັກ 6 ພາຍໃຕ້ເປັນປະທານຂອງ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ໂດຍເປັນກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ເລຂາທິການໃຫຍ່ປະທານປະເທດແຫ່ງ ສປປ ລາວ, ມີບັນດາການນຳພັກ-ລັດ ສະມາຊິກສະພາແຫ່ງຊາດທຸກເຂດເລືອກຕັ້ງແລະແຂກຖືກເຊີນເຂົ້າຮ່ວມຢ່າງພ້ອມພຽງ.

  ທ່ານ ນາງ ປານີ ຢາທໍ່ຕູ້  ກ່າວວ່າ: ກອງປະຊຸມເທື່ອນີ້ແມ່ນຈະໄດ້ພິຈາລະນາຕົກລົງບັນຫາສຳຄັນພື້ນຖານຂອງປະເທດເຊັ່ນ 1. ຮັບເອົາການສະເໜີແຕ່ງຕັ້ງສະມາຊິກລັດຖະບານຕາມການສະເໜີຂອງທ່ານນາຍົກລັດຖະມົນຕີ, 2. ຮັບຟັງ ແລະພິຈາລະນາບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແຜນງົບປະມານແລະແຜນເງິນຕາປະຈຳປີ 2019 ພ້ອມທິດທາງແຜນການປະຈຳປີ 2020; 3. ພິຈາລະນາຮັບຮອງເອົາບົດລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະ ທິດທາງແຜນການປະຈຳປີ 2020 ຂອງອົງການກວດສອບແຫ່ງລັດບົດລາຍງານຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2018 ບົດລາຍງານຂອງອົງການລັດຖະບານກ່ຽວກັບການກວດສອບສົກປີ 2014-2015-2016 ແລະ

2017; 4. ຮັບຟັງການປະກອບຄຳເຫັນຂອງຄະນະປະຈຳສະພາຕໍ່ບົດລາຍງານຂອງລັດຖະບານອົງການກວດສອບແຫ່ງລັດ ແລະອົງການ ກວດສອບລັດຖະບານ; 5. ພິ ຈາລະນາຮັບບົດລາຍງານຕິດຕາມກວດກາຂອງຄະນະປະຈຳສະພາແຫ່ງຊາດກ່ຽວກັບການຈັດຕັ້ງປະຕິບັດກົດໝາຍ ແລະນິຕິກຳກົດໝາຍທີ່ຕິດພັນກັບການລາຍຮັບ, ການສ້າງວິຊາຊີບ, ການພັດທະນາສີມືແຮງງານທີ່ມີຄຸນນະພາບ, ການສ້າງວຽກເຮັດງານທຳຂອງປະຊາຊົນ ແລະ ການຈັດຕັ້ງປະຕິບັດນິຕິກຳທີ່ພົວພັນກັບການເຊົ່າສຳປະທານທີ່ດິນ; 6. ພິຈາລະນາຮັບເອົາບົດລາຍງານຂອງອົງການໄອຍະການປະຊາຊົນສູງສຸດ ແລະສານປະຊາຊົນສູງສຸດກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈຳປີ 2019 ແລະທິດທາງປະຈຳປີ 2020; 7. ພິຈາລະນາຮັບຮອງເອົາບົດລາຍງານກ່ຽວກັບການເຄື່ອນໄຫວວຽກງານຂອງສະພາແຫ່ງຊາດປະຈຳປີ 2019 ແລະ ທິດທາງແຜນການປະຈຳປີ 2020;8. ພິຈາລະນາຮັບຮອງເອົາການປະເມີນປະຕິບັດໜ້າທີ່ບຸກຄະລາກອນດຳລົງຕຳແໜ່ງທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການແຕ່ງຕັ້ງ ແລະ 9 ພິຈາລານາຮັບຮອງການສ້າງ ແລະປັບປຸງຮ່າງກົດໝາຍຈຳນວນ 8 ສະບັບຄືໃນຂົງເຂດເສດຖະກິດ 4 ສະບັບ ແລະເຂດວັດທະນະທຳ-ສັງຄົມ 4 ສະ ບັບ.

  ນອກຈາກນີ້ກອງປະຊຸມຍັງໄດ້ຮັບແຈ້ງອະທິບາຍຈາກ 5 ກະຊວງກ່ຽວຂ້ອງ, ກ່ຽວກັບນະໂຍບາຍ, ວິທີການ, ມາດຕະການເພື່ອຊຸກຍູ້ການຜະລິດສະບຽງອາຫານ, ການສົ່ງເສີມການຜະລິດພາຍໃນເພື່ອທົດແທນການນຳເຂົ້າສິນຄ້າ ແລະເພື່ອສົ່ງອອກການຄຸ້ມຄອງລາຄາສິນຄ້າ ແລະ ຄຸ້ມຄອງອັດຕາເງິນເຟີ້ອັດຕາແລກປ່ຽນ, ການປະຕິບັດນະໂຍບາຍປະຢັດ, ການຄຸ້ມຄອງຄົນເຂົ້າ-ອອກເມືອງ ແລະຮັບຟັງການປະກອບຄວາມເຫັນຂອງສູງກາງແນວລາວສ້າງຊາດ.

 ສະໜັບສະໜຸນໂດຍ: HONDA

__________

ຂຽນໂດຍ: ບຸນນິກ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์