ຄ່າຍເຊັນ ເປີດຮັບຜູ້ເຂົ້າຮ່ວມແຂ່ງຂັນຮູບເງົາສັ້ນ

  ບໍລິສັດ ຄ່າຍເຊັນ ຈຳກັດ ຜູ້ດຽວຮ່ວມກັບກົມຮູບເງົາກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວຈັດກິດຈະກຳແຂ່ງຂັນຮູບເງົາເລື່ອງສັ້ນເພື່ອເປີດໂອກາດໃຫ້ນັກ ຮຽນ, ນັກສຶກສາໃນຂອບເຂດທົ່ວປະເທດໄດ້ສ້າງວິດີໂອສັ້ນຕາມຈິນຕະນາການ ແລະຄວາມຕ້ອງການຂອງນັກສຶກສາເອງປະຈຸບັນໄດ້ເປີດຮັບສະໝັກຜູ້ເຂົ້າຮ່ວມແຂ່ງຂັນແລ້ວຈົນຮອດທ້າຍເດືອນພະຈິກ 2019 ນີ້ຜູ້ຊະນະເລີດສາຍສາມັນຈະໄດ້ຮັບເງິນສົດ 3 ລ້ານກີບ ແລະສາຍວິຊາຊີບຈະໄດ້ຮັບເງິນສົດ 5 ລ້ານກີບ.

  ພິທີຖະແຫຼງຂ່າວເປີດຮັບສະໝັກຜູ້ເຂົ້າຮ່ວມແຂ່ງຂັນສ້າງຮູບເງົາເລື່ອງສັ້ນໄດ້ຈັດຂຶ້ນທີ່ນະຄອນຫຼວງວຽງຈັນ ໃນວັນທີ 4 ພະຈິກຜ່ານມາ, ທ່ານນາງ ຈິນດາວັນ ຈັນດາ ລາ ຜູ້ຈັດການໂຮງຮູບເງົາຊິດຕີ້ເພລັກຊ໌ບໍລິສັດຄ່າຍເຊັນໄດ້ກ່າວວ່າ: ຮູບເງົາທີ່ຈະນຳມາແຂ່ງ ຂັນມີຂໍ້ກຳນົດບໍ່ໃຫ້ມີການໂຄສະນາສິ່ງມຶນເມົາ, ສິ່ງເສບຕິດ ແລະ ປາສະຈາກການໃຊ້ຄວາມຮຸນແຮງທີ່ຈະເປັນຜົນສະທ້ອນຕໍ່ສັງຄົມໂດຍແບ່ງອອກເປັນ 4 ຫົວຂໍ້ຄື: ຊີວິດຂອງອາຈານທີ່ມາສອນນັກຮຽນ; ພໍ່ແມ່ທີ່ເສຍສະລະເພື່ອໃຫ້ລູກໄດ້ໄປໂຮງ ຮຽນ ; ອ້າຍ, ເອື້ອຍທີ່ເສຍສະຫຼະໃຫ້ນ້ອງໄດ້ໄປໂຮງຮຽນ ແລະຫົວຂໍ້ກ່ຽວກັບເດັກນ້ອຍທີ່ຕັ້ງໃຈຢາກໄປໂຮງຮຽນຊຶ່ງແຕ່ລະຫົວຂໍ້ ມີຄວາມຍາວ 5-10 ນາທີ, ການສ້າງກິດຈະກໍາດັ່ງກ່າວແນໃສ່ສົ່ງເສີມວັດທະນະທໍາ ແລະເຮັດໃຫ້ນັກຮຽນໄດ້ຮູ້ຈັກການສ້າງຮູບເງົາເລື່ອງສັ້ນທັງເປັນການສ້າງກິດຈະກຳຮ່ວມກັນລະຫວ່າງນັກຮຽນກັບຄູ-ອາຈານ ແລະຄອບຄົວທັງເຮັດໃຫ້ນັກຮຽນມີແນວຄິດພັດທະນາໃນການຮຽນຮູ້  ແລະເຫັນຄວາມສຳຄັນຂອງການຮໍ່າຮຽນ.

ສະໜັບສະໜຸນໂດຍ: ສ່ວນບຸກຄົນ

  ສ່ວນການແຂ່ງຂັນແມ່ນແບ່ງອອກເປັນ 2 ສາຍຄື: ສາຍສາມັນ (ລະດັບການສຶກສາປະຖົມເຖິງມັດທະຍົມຕອນປາຍ) ແລະສາຍວິຊາຊີບ (ລະດັບການສຶກສາຂັ້ນວິຊາຊີບເຖິງຂັ້ນມະຫາວິທະຍາໄລ) ຜູ້ເຂົ້າຮ່ວມແຂ່ງຂັນຈະຕ້ອງມີຫຼັກຖານມາອ້າງອີງວ່າຕົນມາຈາກໂຮງຮຽນໃດ, ຕ້ອງເປັນຄົນຖ່າຍພາບເອງໂດຍສາມາດໃຫ້ໝູ່-ເພື່ອນ ຫຼື ຄອບ ຄົວຮ່ວມມືໄດ້.

ສະໜັບສະໜຸນໂດຍ: HONDA

  ແນວໃດກໍດີຖ້າຫາກນັກສຶກສາມີຄວາມສົນໃຈສາມາດເຂົ້າໄປລົງທະບຽນໄດ້ທີ່ໂຮງຮູບເງົາຊິດຕີ້ເພລັກຊ໌ຕັ້ງຢູ່ບ້ານດົງໂດກ ເມືອງໄຊທານີ ນະຄອນຫຼວງວຽງຈັນ ຫຼືຕິດຕໍ່ລົງທະບຽນຜ່ານທາງເຟດບຸກ (Cityplex ແລະອີເມວ City plexlaos@gmail.com ).

 -------------

 ໜັງສືພິມເສດຖະກິດ-ສັງຄົມ

แชร์