ຖໍ້າພະເຈົ້າຄຳຕັນ ໄດ້ຮັບຄວາມນິຍົມ ຈາກນັກທ່ອງທ່ຽວ

  ດ້ວຍຄວາມງາມແບບທຳມະຊາດສ້າງຂຶ້ນໂດຍບໍ່ມີຜູ້ໃດປັ້ນແຕ່ງໂດຍສະເພາະກໍ່ແມ່ນຄວາມງົດງາມຂອງຫີນງອກທີ່ມີນໍ້າຍ້ອຍໄຫຼຜ່ານຫຼາຍພັນປີລວມທັງຫີນຍ້ອຍຊຶ່ງກ່ຽວພັນກັບນິທານພື້ນບ້ານທີ່ເລົ່າຂານກັນມາວ່າ:ເປັນຖໍ້າພະຍານາກ ແລະ ເປັນບ່ອນຈຳສິນຂອງລືສີທີ່ຊາວບ້ານເອີ້ນວ່າຖໍ້າພະເຈົ້າຄຳຕັນໃນອະດີດຢູ່ໃນຖໍ້າມີບໍ່ນໍ້າແຫ່ງໜຶ່ງທີ່ຊາວບ້ານຕັກເອົາມາບູຊາແຕ່ບໍ່ແຫ້ງ, ໃຊ້ເທົ່າໃດກໍ່ຍັງຄືເກົ່າບໍ່ວ່າໃນລະດູໃດກໍ່ຕາມຢູ່ມາຄືນໜຶ່ງໄດ້ມີຊາວບ້ານຄົນໜຶ່ງຝັນວ່າພະລືສີຜູ້ເຝົ້າຢູ່ທີ່ນັ້ນຈົ່ມວ່າຜູ້ໃດກໍ່ພາ ກັນຕັກເອົາແຕ່ນໍ້າໄປພະອົງຫານໍ້າຈະລ້າງໜ້າກໍ່ບໍ່ມີຫຼັງຈາກນັ້ນນໍ້າກໍ່ໄດ້ແຫ້ງລົງເທື່ອລະເລັກລະນ້ອຍຈົນໝົດກໍ່ຍ້ອນຊາວບ້ານເຂົ້າໄປລົບກວນສະຖານທີ່ສັກສິດຂອງລືສີ, ລືສີຈິ່ງເຮັດໃຫ້ນໍ້າແຫ້ງ.

 ສະໜັບສະໜຸນໂດຍ: HONDA

  ຖໍ້າພະເຈົ້າຄຳຕັນຕັ້ງຢູ່ຫ່າງຈາກເທສະບານເມືອງປາກແບງປະມານ 16 ກິໂລແມັດ ເປັນສະຖານທີ່ທ່ອງທ່ຽວທີ່ໄດ້ຮັບຄວາມສົນໃຈຫຼາຍສົມຄວນເນື່ອງຈາກວ່າສະ ຖານທີ່ທ່ອງທ່ຽວແຫ່ງນີ້ມີຄວາມງາມທີ່ເປັນເອກະລັກແບບທຳມະຊາດໂດຍສະເພາະພາຍໃນຖໍ້າເບື້ອງຂວາມືມີແຜ່ນຫີນເປັນຮູບແທ່ນບູຊາ, ຫຼັງແທ່ນມີຮູບແມງກະເບື້ອ, ຊ້າຍມືເປັນເສົາອິນແຂວນ, ທາດກອງເຂົ້າ, ກ້ອນເສົ້າລືສີ, ຂາງ ແລະອື່ນໆ ຊຶ່ງເປັນຖ້ຳທີ່ມີຊື່ສຽງຂອງແຂວງອຸດົມໄຊໂດຍສ່ວນໃຫຍ່ແລ້ວຜູ້ຄົນຈະນິຍົມກັນໄປກິນເຂົ້າປ່າເນື່ອງຈາກວ່າທຳມະຊາດອ້ອມຂ້າງບໍລິເວນຖໍ້າດັ່ງກ່າວລ້ວນແຕ່ມີປ່າໄມ້ທີ່ອຸດົມສົມບູນໃຫ້ຄວາມສົດຊື່ນ.

ສະໜັບສະໜຸນໂດຍ: ສ່ວນບຸກຄົນ

 ----------------

 ໜັງສືພິມເສດຖະກິດ-ສັງຄົມ

• 08/11/2019