ສ້າງບ້ານຫຼັກ 32 ໃຫ້ກາຍເປັນຕົວເມືອງນ້ອຍໃນຊົນນະບົດ

  ບ້ານຫຼັກ 32 ເປັນບ້ານໜຶ່ງທີ່ຂຶ້ນກັບກຸ່ມບ້ານຫົວນໍ້າງາຕັ້ງຢູ່ຫ່າງຈາກເທສະບານເມືອງໄຊ ແຂວງອຸດົມໄຊ 32 ກິໂລແມັດ, ລວມມີ 466 ຫຼັງຄາເຮືອນ, ມີ 591 ຄອບ ຄົວ, ມີພົນລະເມືອງທັງໝົດ 2.859 ຄົນ, ຍິງ 1.405 ຄົນ, ປະກອບມີ 6 ຊົນເຜົ່າ, ອາຊີບຕົ້ນຕໍຂອງປະຊາຊົນແມ່ນການປູກ-ການລ້ຽງ ແລະການບໍລິການຄ້າ-ຂາຍ.

  ທ່ານ ສົມຈັນ ມູນກາສິງ ເລຂາຄະນະພັກຮາກຖານນາຍບ້ານໆ ຫຼັກ 32 ລາຍງານຕໍ່ກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ13 ໃນວັນທີ 30 ຕຸລາ ວ່າ: ໃນໄລຍະຜ່ານມາບ້ານຫຼັກ 32 ເປັນບ້ານໜຶ່ງທີ່ຍັງບໍ່ທັນໄດ້ຮັບການພັດທະນາເທົ່າທີ່ຄວນ, ຄວາມຕື່ນຕົວທາງດ້ານການເມືອງຂອງປະຊາຊົນບັນດາເຜົ່າຈຳນວນໜຶ່ງກໍບໍ່ທັນສູງ, ລະບົບການເມືອງຈຳນວນໜຶ່ງບໍ່ທັນໜັກແໜ້ນ, ການຜະລິດຂອງປະຊາຊົນສ່ວນໃຫຍ່ກໍ່ອາໄສແຕ່ທຳມະຊາດ, ການຜະລິດເປັນສິນຄ້າກໍ່ບໍ່ທັນໄດ້ຮັບການຂະຫຍາຍຕົວ ແລະອັດຕາການບໍ່ຮູ້ໜັງສືຂອງປະຊາຊົນຍັງກວມຈຳນວນຫຼາຍ.

  ພາຍຫຼັງທີ່ມີມະຕິ, ຄຳສັ່ງ, ບົດແນະນຳ ແລະນິຕິກຳຕ່າງໆຂອງຄະນະພັກຂັ້ນເທິງ, ທາງຄະນະໜ່ວຍພັກ-ອົງການປົກຄອງບ້ານໄດ້ມີການຄົ້ນຄວ້າປຶກສາຫາລືເພື່ອຜັນຂະຫຍາຍ ແລະນຳມາຈັດຕັ້ງ ປະຕິບັດເຮັດໃຫ້ບ້ານຫຼັກ 32 ກາຍ ເປັນສີສັນຕົວເມືອງນ້ອຍໃນຊົນ ນະບົດຕາມທິດ 3 ສ້າງ ໃນນັ້ນ ການບໍລິຫານບ້ານແມ່ນປະຕິບັດຕາມທິດສາມສ້າງ, ເຮັດວຽກແບບ ລວມສູນປະຊາທິປະໄຕຊີ້ນໍາໆພາ ລົງເລິກແຕ່ລະໜ້າວຽກຢ່າງລະອຽດ, ໂດຍເລັ່ງໃສ່ 5 ໜ່ວຍງານ 13 ໜ້າວຽກຫຼັກ, ປະຈຸບັນໄດ້ສໍາເລັດການປັບປຸງຊັບຊ້ອນພະນັກ ງານຊ່ວຍວຽກຂັ້ນບ້ານຄືນໃໝ່ ເພື່ອໃຫ້ແທດເໝາະກັບໜ້າວຽກ ຕົວຈິງ ແລະສໍາເລັດການສ້າງກົດລະບຽບຄຸ້ມຄອງບ້ານ ແລະພ້ອມກັນເຫັນດີເປັນເອກະພາບນໍາໃຊ້, ການຈັດສັນອາຊີບໃຫ້ປະຊາຊົນພາຍໃນບ້ານແມ່ນອີງໃສ່ເງື່ອນໄຂທ່າແຮງຕົວຈິງຂອງແຕ່ລະຄອບຄົວ.

  ໂດຍຖືເອົາການປູກ-ການລ້ຽງ ເປັນກິດຈະກຳຫຼັກເຊັ່ນ: ການປູກຝັງເລັ່ງໃສ່ຍົກສະມັດຕະພາບເຂົ້ານາປີຈາກ 2,8 ໂຕນຕໍ່ເຮັກຕາ ມາເປັນ3,2 ໂຕນຕໍ່ເຮັກຕາ, ສົ່ງເສີມ ການປູກໝາກແໜ່ງ ມີ 79 ຄອບຄົວ, ເນື້ອທີ່ 93,6 ເຮັກຕາ, ສາມາດສ້າງລາຍຮັບເຂົ້າຄອບ ຄົວ 8-15 ລ້ານກີບຕໍ່ປີ, ສົ່ງເສີມການປູກຢາງພາລາມີ 46 ຄອບຄົວ ເນື້ອທີ່ 146 ເຮັກຕາ, ກຣີດແລ້ວ 100 ກວ່າເຮັກຕາ, ສາມາດສ້າງລາຍຮັບໄດ້ 15-35 ລ້ານກີບຕໍ່ຄອບຄົວຕໍ່ປີ, ສົ່ງເສີມການ ປູກໄມ້ໃຫຍ່ໄວ 42 ຄອບຄົວ, ເນື້ອທີ່ 44,6 ເຮັກຕາ, ປູກໄມ້ໄປ ແລ້ວ 60 ພັນກວ່າຕົ້ນ, ສົ່ງເສີມ ການບູລະນະ ແລະເກັບກູ້ດອກ ແຂມ, ມີ 133 ຄອບຄົວ ມີເນື້ອ ທີ່ 200 ກວ່າເຮັກຕາ, ສ້າງລາຍ ຮັບໄດ້ 10-15 ລ້ານກີບຕໍ່ຄອບ ຄົວຕໍ່ປີ, ການປູກຊາທໍາມະຊາດ ມີເນື້ອທີ່ທັງໝົດ 29 ເຮັກຕາ, ມີ 36 ຄອບຄົວ ເດັ່ນກວ່າໝູ່ມີ 1 ຄອບຄົວ, ມີເນື້ອທີ່ສວນຊາ 3,3 ເຮັກຕາ, ສ້າງລາຍຮັບຈາກການຂາຍໃບຊາໄດ້ 50-60 ລ້ານກີບ ຕໍ່ປີ, ການປູກມອນ-ລ້ຽງມ້ອນເນື້ອທີ່ປູກ 16 ເຮັກຕາມີ 15 ຄອບຄົວ, ປະຈຸບັນກໍາລັງທົດລອງປູກໄມ້ໃຫ້ໝາກມີ 9 ຄອບ ຄົວ, ເນື້ອທີ່ 13 ເຮັກຕາ, ປູກແລ້ວຈໍານວນ 3.200 ຕົ້ນ.

  ການລ້ຽງສັດເດັ່ນກ່ວາໝູ່ແມ່ນການລ້ຽງສັດໃຫຍ່ (ງົວ-ຄວາຍ) ປະຈຸບັນມີ 6 ກຸ່ມ, ມີ 126 ຄອບ ຄົວ, ມີສັດໃຫຍ່ 756 ກວ່າໂຕ ໃນນັ້ນຄອບຄົວທີ່ມີສັດໃຫຍ່ 80-100 ໂຕມີ 1 ຄອບຄົວ, 30-40 ໂຕມີ 12 ຄອບຄົວ,10-25 ໂຕມີ 49 ຄອບຄົວ ແລະ 10 ໂຕລົງມາ ມີ 64 ຄອບຄົວ, ສາມາດສ້າງເປັນຄອບຄົວຕົວແບບໄດ້ 1 ຄອບ ຄົວ ມີລາຍຮັບຈາກການຂາຍສັດໃຫຍ່ໂດຍສະເລ່ຍແລ້ວໄດ້ 10-30 ລ້ານກີບຕໍ່ຄອບຕໍ່ປີ, ນອກຈາກນັ້ນຍັງໄດ້ສົ່ງເສີມການລ້ຽງແບ້, ລ້ຽງໝູ, ສັດປີກ ແລະລ້ຽງປາແມ່ນອີງຕາມທ່າແຮງຂອງຄອບຄົວໃຜລາວທີ່ສາມາດເຮັດໄດ້.

 ນອກຈາກການພັດທະນາດ້ານອື່ນໆແລ້ວບ້ານສາມສ້າງຫຼັກ 32 ຍັງໄດ້ສ້າງຕັ້ງກອງທຶນພັດທະນາຄອບຄົວຂຶ້ນມາດ້ວຍຄວາມສະໝັກໃຈຂອງປະຊາຊົນເອງປະຈຸບັນມີສະ ມາຊິກທັງໝົດ 115 ຄົນ, ມີເງິນກອງທຶນທັງໝົດ 330 ລ້ານກີບ, ໄດ້ປ່ອຍກູ້ໃຫ້ສະມາຊິກກູ້ຢຶມແລ້ວ, ໄດ້ປຸກລະດົມພໍ່-ແມ່ປະຊາຊົນບັນດາເຜົ່າທົ່ວບ້ານໃຫ້ເສຍພັນທະເຂົ້າລັດເປັນຕົ້ນແມ່ນວຽກງານທີ່ດິນ, ຊັບສິນ ແລະອາກອນໃນແຕ່ລະປີ, ສຳລັບໃນປີ 2019 ນີ້ຕາມແຜນຂອງເມືອງທີ່ມອບໃຫ້ບ້ານສາມສ້າງຖອກງົບປະມານເປັນຈໍານວນ 107 ລ້ານກີບ, ໃນ 9 ເດືອນຜ່ານມາສາມາດປະຕິບັດໄດ້ຕົວຈິງ 93 ລ້ານກວ່າກີບ, ທຽບໃສ່ແຜນປີປະຕິບັດໄດ້ 87%.

ການພັດທະນາພື້ນຖານໂຄງ ລ່າງໄດ້ສຸມໃສ່ໃນການພັດທະນາ ພື້ນຖານໂຄງລ່າງ ໂດຍສະເພາະ ແມ່ນຂະແໜງການພັດທະນາຊົນ ນະບົດຂັ້ນເມືອງ ແລະແຂວງໄດ້ລົງ ສົມທົບກັບຄະນະພັກອົງການຈັດ ຕັ້ງບ້ານພ້ອມກັນກໍານົດແຜນພັດທະນາພື້ນຖານໂຄງລ່າງ 5 ປີແຕ່ 2016-2020, ມີທັງໝົດ 16 ໂຄງການ, ມາຮອດປີ 2018 ປະ ຕິບັດສໍາເລັດ 10 ໂຄງການໃນ ນັ້ນ 3 ໂຄງການແມ່ນກໍາລັງຈັດ ຕັ້ງປະຕິບັດໃນປີ 2019 ເຊັ່ນ: ໂຄງການກໍ່ສ້າງສະໜາມຂີ້ເຫຍື້ອ, ສ້າງສະຖານີຄີວລົດໂດຍສານ ແລະ ໂຄງການຈັດສັນ-ຕັດຜັງບ້ານ, ສ່ວນຍັງ 3 ໂຄງການແມ່ນຈະສືບຕໍ່ປະຕິບັດໃນປີ 2020 ມີໂຄງການກໍ່ ສ້າງລະບົບນໍ້າປະປາຂະໜາດ ນ້ອຍ, ຍົກລະດັບ ແລະປູຢາງທາງ ຮ່ອມພາຍໃນບ້ານ, ໂຄງການປັບ ປຸງແລະຍົກລະດັບດ້ານການບໍລິການຕະຫຼາດໃຫ້ໄດ້ມາດຕະຖານ.

  ສະໜັບສະໜຸນໂດຍ: HONDA

  ດ້ານວຽກງານວັດທະນາທຳ-ສັງຄົມໄດ້ສົມທົບກັບເຈົ້າກົກເຈົ້າເລົ່າຂອງແຕ່ລະເຜົ່າໃຫ້ພ້ອມກັນສົ່ງເສີມດ້ານວັດທະນະທໍາ ແລະຮີດຄອງປະເພນີອັນດີງາມຂອງຕົນເອງໄວ້, ປຸກລະດົມຂົນຂວາຍໃຫ້ພໍ່-ແມ່ປະຊາຊົນບັນດາເຜົ່າໃຫ້ສົ່ງລູກຫຼານຂອງຕົນເອງທີ່ຮອດເກນອາຍຸເຂົ້າຮຽນໄດ້ 95%, ສົ່ງນັກຮຽນທີ່ຈົບມໍ 7 ໄປຮຽນຕໍ່ສາຍວິຊາຊີບຢູ່ພາຍ ໃນ, ໂຮງໝໍນ້ອຍໄດ້ວາງແຜນ ແລະສັກຢາປ້ອງກັນພະຍາດໃຫ້ປະຊາຊົນຢ່າງປົກກະຕິ ແລະຕໍ່ເນື່ອງເພື່ອຮັບປະກັນທາງດ້ານສຸຂະພາບຂອງປະຊາຊົນ, ປຸກລະດົມຂົນຂວາຍໃຫ້ພໍ່-ແມ່ປະຊາຊົນບັນດາເຜົ່າຫັນມາເຂົ້າເປັນສະມາຊິກກອງທຶນປ້ອງສຸຂະພາບແຫ່ງຊາດໃຫ້ຫຼາຍຂຶ້ນເພື່ອເຮັດໃຫ້ປະຊາຊົນຜູ້ທຸກຍາກກໍ່ໄດ້ເຂົ້າໂຮງໝໍຢ່າງຖົ່ວເຖິງ, ພ້ອມ ທັງວາງແຜນກະກຽມປະກາດເປັນບ້ານຍຸດຕິການຖ່າຍຊະຊາຍໃນທ້າຍປີ 2019 ນີ້.

ສະໜັບສະໜຸນໂດຍ: ສ່ວນບຸກຄົນ

  ຕະຫຼອດໄລຍະທີ່ຜ່ານມາບ້ານສາມສ້າງຫຼັກ 32 ໄດ້ຮັບເປັນບ້ານນາມມະຍົດຢູ່ 10 ນາມມະຍົດເຊັ່ນ: ບ້ານວັດທະນະທໍາ, ບ້ານປອດຄະດີ, ບ້ານປອດຢາເສບຕິດ, ບ້ານປ້ອງກັນຄວາມສະຫງົບດີ, ບ້ານສາທາລະນະສຸກແບບຢ່າງ, ບ້ານ 3 ສະອາດ, ບ້ານຊາວໜຸ່ມ 4 ບຸກ, ບ້ານແມ່ຍິງ 3 ດີ, ບ້ານພັດທະນາດ້ານແຮງງານ ແລະສະຫວັດດີການ-ສັງຄົມ ແລະບ້ານພັດທະນາຮອບດ້ານ, ຜົນການລົງປະເມີນຕາມດໍາລັດ 348/ລບ, ຖ້າທຽບໃສ່ 8 ມາດຖານບ້ານພົ້ນທຸກແມ່ນໄດ້ 100%.

__________

ຂຽນໂດຍ: ໄມພອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์