ຜຸ້ວ່າການ ທຫລ ລົງຊຸກຍູ້ວຽກງານທະນາຄານຢູ່ພາກກາງ ແລະພາກໃຕ້

 ໃນລະຫວ່າງວັນທີ 28 ຕຸລາຫາ ວັນທີ 1 ພະຈິກ  2019, ທ່ານ ສອນໄຊ ສິດພະໄຊ ກໍາມະການສໍາຮອງສູນກາງພັກ, ຜູ້ວ່າການທະນາຄານແຫ່ງ ສປປ ລາວ (ທຫລ)  ພ້ອມຄະນະໄດ້ເຄື່ອນໄຫວຊຸກຍູ້ຕິດຕາມວຽກງານທະນາຄານຢູ່ພາກກາງ ແລະພາກໃຕ້ໂດຍໄດ້ພົບປະກັບບັນດາການນຳຂອງແຂວງ, ຂອງເມືອງຢູ່ແຂວງສະຫວັນນະເຂດ, ສາລະວັນ ແລະແຂວງຈຳປາສັກເພື່ອຮັບຟັງສະພາບຜົນເສຍຫາຍຈາກໄພພິບັດນໍ້າຖ້ວມທີ່ສົ່ງຜົນກະທົບຢ່າງໜັກໜ່ວງຕໍ່ຊີວິດ, ຊັບສິນ, ສັດລ້ຽງ ແລະ ຜົນລະປູກຂອງປະ ຊາຊົນ.

 ໃນການເຄື່ອນໄຫວຄັ້ງນີ້ທ່ານຍັງໄດ້ຮັບຟັງການລາຍງານຈາກສາຂາ ທຫລ ປະຈຳພາກ ແລະການລາຍງານຂອງສາຂາທະນາຄານທຸລະກິດໃນການປະກອບສ່ວນຊ່ວຍເຫຼືອທາງດ້ານເງິນ, ວັດຖຸສິ່ງຂອງບັນເທົາທຸກແກ່ບັນດາແຂວງທີ່ໄດ້ຮັບຜົນກະທົບ ແລະພ້ອມດຽວກັນນັ້ນ, ຍັງໄດ້ຮັບການລາຍງານສະພາບຂໍ້ມູນຜົນເສຍຫາຍຂອງລູກຄ້າທີ່ທະນາຄານໄດ້ປ່ອຍສິນເຊື່ອໃນຂະແໜງການຜະລິດ, ປູກຝັງ ແລະ ລ້ຽງສັດ.

  ໃນການປະກອບສ່ວນຊ່ວຍເຫຼືອບັນເທົາທຸກ, ຂະແໜງທະນາຄານໄດ້ລະດົມໃຫ້ການຊ່ວຍເຫຼືອເງິນວັດຖຸ ແລະປັດໃຈນໍາບັນດາທະນາຄານທຸລະກິດ ແລະ ສັງຄົມຈຳນວນຫຼວງຫຼາຍໂດຍສະເພາະທະນາຄານການຄ້າຕ່າງປະເທດລາວມະຫາຊົນໄດ້ຊື້ເຂົ້າສານຊ່ວຍເຫຼືອຜູ້ປະສົບໄພໃນວົງເງິນ 600 ລ້ານກີບ ຈຳນວນ 1.464 ເປ໋ົາ (ເປົ໋າລະ 50 ກິໂລ) ເພື່ອຊ່ວຍເຫຼືອບັນດາແຂວງທີ່ໄດ້ຮັບຜົນກະທົບ. ສຳລັບຜົນເສຍຫາຍເບື້ອງຕົ້ນຂອງທະນາຄານທຸລະກິດຕິດພັນກັບການປ່ອຍສິນເຊື່ອມີຈຳນວນເງິນທັງໝົດ 168,43 ຕື້ກີບ. ບັນຫາຄວາມຈໍາເປັນອັນຮີບດ່ວນຜ່ານຈາກການລາຍງານແມ່ນສະພາບການຂາດເຂົ້າກິນ, ຄວາມຕ້ອງການເມັດພັນເຂົ້າ ແລະເມັດພັນພືດເພື່ອປູກທົດແທນເຊິ່ງປະຊາຊົນກໍາລັງຄອງຄອຍການສະໜອງຈາກພາກລັດເຂົ້າໃຫ້ການຊ່ວຍ ເຫຼືອ ແລະ ມີປະຊາຊົນຈຳນວນໜຶ່ງກໍ່ໄດ້ມີການຊອກຫາດ້ວຍຕົນເອງກໍ່ຄືການເຂົ້າຫາແຫຼ່ງທຶນນຳທະນາຄານເພື່ອຊື້ເມັດພັນ.

  ຕໍ່ການປະກອບສ່ວນຂອງຂະແໜງທະນາຄານໃນການຟື້ນຟູໄພພິບັດດັ່ງກ່າວ, ທ່ານ ຜູ້ວ່າການ ທຫລ ໄດ້ຊີ້ນຳໃຫ້ບັນດາສາຂາທະນາຄານທຸລະກິດຈົ່ງເອົາໃຈໃສ່ຊ່ວຍເຫຼືອທາງດ້ານແຫຼ່ງທຶນເພື່ອຟື້ນຟູການຜະລິດ, ຊື້ເມັດພັນ ແລະ ສ້າງເງື່ອນໄຂໃຫ້ຊາວກະສິກອນສາມາດດຳເນີນການຜະລິດ ແລະຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ. ພ້ອມນີ້, ທ່ານຍັງໄດ້ຊີ້ນຳໃຫ້ມີການປະເມີນ ແລະຕີລາຄາຜົນເສຍຫາຍຂອງລູກຄ້າທີ່ໄດ້ຮັບສິນເຊື່ອຈາກທະນາຄານໃຫ້ຖືກຕ້ອງກັບສະພາບຄວາມຕົວຈິງ, ຫຼີກລ້ຽງການສວຍໂອກາດບໍ່ໃຫ້ເອົາບັນຫາສະພາບໄພນ້ຳຖ້ວມເປັນຂໍ້ອ້າງເວລາເກີດບັນຫາໜີ້ສິນ  NPLໃນຕໍ່ໜ້າ. ສຳລັບມາດຕະການຂອງທະນາຄານເພື່ອແກ້ໄຂຜົນເສຍຫາຍຈາກໄພທຳມະຊາດນັ້ນແມ່ນໃຫ້ບັນດາທະນາຄານທຸລະກິດຈັດຕັ້ງປະຕິບັດຕາມນະໂຍບາຍສິນເຊື່ອເພື່ອແກ້ໄຂຜົນກະທົບຈາກໄພທໍາມະຊາດທີ່ ທຫລ ໄດ້ກຳນົດ ໂດຍເລື່ອນເວລາຊຳລະໜີ້ທັງຕົ້ນທຶນ ແລະດອກເບ້ຍ; ສະໜອງເງິນກູ້ໃໝ່ໃຫ້ຊາວກະສິກອນຜູ້ທີ່ມີເງື່ອນໄຂສາມາດຊຳລະເງິນກູ້ຄືນໃຫ້ທະນາຄານ ແລະປັບປຸງສັນຍາເງິນກູ້ຄືນໃໝ່. ໃນກໍລະນີແຫຼ່ງທຶນບໍ່ພຽງພໍທະນາຄານທຸລະກິດສາມາດສະເໜີຄວາມຕ້ອງການທາງດ້ານແຫຼ່ງທຶນມາຍັງ ທຫລ.  

__________

ຂຽນໂດຍ: ຣັດສະໝີ ດວງສັດຈະ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์