ກອງປະຊຸມສຸດຍອດຂອບການຮ່ວມມືແມ່ນໍ້າຂອງ-ຍີ່ປຸ່ນ ຮັບຮອງ 2 ເອກະສານສຳຄັນ

  ວັນທີ 4 ພະຈິກ 2019, ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສຸດຍອດຂອບການຮ່ວມມືແມ່ນໍ້າຂອງ-ຍີ່ປຸ່ນ ຄັ້ງທີ 11 ທີ່ບາງກອກ, ປະເທດໄທ, ຊຶ່ງມີບັນດາຜູ້ນຳຈາກບັນດາປະເທດສະມາຊິກແມ່ນໍ້າຂອງ-ຍີ່ປຸ່ນ: ກໍາປູເຈຍ, ສປປ ລາວ, ມຽນມາ, ໄທ, ຫວຽດນາມ ແລະຍີ່ປຸ່ນເຂົ້າຮ່ວມຢ່າງພ້ອມພຽງ.

  ກອງປະຊຸມໄດ້ດຳເນີນໄປໂດຍການເປັນປະທານຮ່ວມລະຫວ່າງ ທ່ານ ປຼະຢຸດ ຈັນໂອຊາ, ນາຍົກລັດຖະມົນຕີແຫ່ງຣາຊະອານາຈັກໄທ ແລະທ່ານ ຊິນໂຊ ອາເບະ, ນາຍົກລັດຖະມົນຕີຍີ່ປຸ່ນກອງປະຊຸມໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມລັດຖະມົນຕີຕ່າງປະເທດແມ່ນໍ້າຂອງ-ຍີ່ປຸ່ນ ຄັ້ງທີ 12 ແລະກອງປະຊຸມລັດຖະມົນຕີ ເສດຖະກິດແມ່ນໍ້າຂອງ-ຍີ່ປຸ່ນຄັ້ງທີ 11 ຊຶ່ງໄດ້ຈັດຂຶ້ນໃນເດືອນສິງຫາ ແລະກັນຍາຜ່ານມາພ້ອມທັງໄດ້ທົບທວນຄືນຄວາມຄືບໜ້າຂອງການຈັດຕັ້ງປະຕິບັດວຽກງານຕ່າງໆພາຍໃຕ້ຂອບການຮ່ວມມືດັ່ງກ່າວໃນໄລຍະ 1 ປີຜ່ານມາໂດຍສະເພາະພາຍໃຕ້ 3 ເສົາຄໍ້າຂອງຍຸດທະສາດໂຕກຽວ 2018 ທີ່ບັນດາຜູ້ນຳໄດ້ຮັບຮອງເອົາໃນກອງປະຊຸມສຸດຍອດແມ່ນໍ້າຂອງ-ຍີ່ປຸ່ນຄັ້ງທີ 10, ທີ່ໂຕກຽວໃນປີ 2018 ຜ່ານມາ.

  ໃນປີນີ້ເພື່ອເປັນການສືບຕໍ່ຈັດຕັ້ງຜັນຂະຫຍາຍຍຸດທະສາດໂຕກຽວ 2018, ຍີ່ປຸນໃນນາມເປັນຄູ່ຮ່ວມພັດທະນາຂອບການຮ່ວມມືແມ່ນໍ້າຂອງ-ຍີ່ປຸ່ນກໍ່ໄດ້ຮ່າງເອກະສານຂໍ້ເລີ່ມແມ່ນໍ້າຂອງ-ຍີ່ປຸ່ນ ສຳລັບການພັດທະນາແບບຍືນຍົງເຖິງປີ 2030 ເພື່ອຄັດຈ້ອນເອົາບັນດາເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດທີ່ເປັນບູລິມະສິດ ແລະແທດເໝາະກັບການພັດທະນາແບບຍືນຍົງຂອງບັນດາປະເທດແມ່ນໍ້າຂອງລວມທັງ ສປປ ລາວ ເພື່ອໃຫ້ສອດຄ່ອງກັບຄວາມຕ້ອງການໃນການພັດທະ ນາເສດຖະກິດ-ສັງຄົມຂອງບັນດາປະເທດແມ່ນໍ້າຂອງ.

   ສປປ ລາວ ໄດ້ສະແດງຄວາມຂອບໃຈຕໍ່ຍີ່ປຸ່ນທີ່ໄດ້ໃຫ້ການຊ່ວຍເຫຼືອສະໜັບສະໜູນຕໍ່ບັນດາໂຄງການໆເຊື່ອມຈອດພື້ນຖານໂຄງລ່າງ ແລະໂຄງບົນເຊັ່ນ: ການພັດທະນາພື້ນຖານໂຄງລ່າງທີ່ມີຄຸນນະພາບ, ການພັດທະນາຊັບພະຍາກອນມະນຸດ ແລະການຊ່ວຍເຫຼືອດ້ານເຕັກນິກບັນດາໂຄງການເຫຼົ່ານີ້ບໍ່ພຽງແຕ່ປະກອບສ່ວນອັນສໍາຄັນໃຫ້ແກ່ການພັດທະ ນາເສດຖະກິດ-ສັງຄົມ ພາຍໃນປະເທດເທົ່ານັ້ນແຕ່ຍັງເປັນການສ້າງພື້ນຖານໂຄງລ່າງໃຫ້ແກ່ການເຊື່ອມຈອດ ແລະການເຊື່ອມໂຍງເສດຖະກິດຂອງພາກພື້ນແມ່ນໍ້າຂອງ ແລະລະຫວ່າງພາກພື້ນແມ່ນໍ້າຂອງກັບບັນດາປະເທດນອກພາກພື້ນ ແລະປະກອບສ່ວນອັນສຳຄັນເຂົ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງເຖິງປີ 2030 ນຳອີກ.

ສະໜັບສະໜຸນໂດຍ: HONDA

ສະໜັບສະໜຸນໂດຍ: ສ່ວນບຸກຄົນ

 ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນຄັ້ງທີ 11 ບັນດາຜູ້ນຳປະເທດແມ່ນໍ້າຂອງ-ຍີ່ປຸ່ນໄດ້ຮັບຮອງເອົາເອກະສານສຳຄັນຈຳນວນ 2 ສະບັບຄື: ຖະແຫຼງການຮ່ວມກອງປະຊຸມສຸດຍອດແມ່ນໍ້າຂອງ-ຍີ່ປຸ່ນ ຄັ້ງທີ 11 ແລະຂໍ້ລິເລີ່ມແມ່ນໍ້າຂອງ-ຍີ່ປຸ່ນ ສຳລັບການພັດທະນາແບບຍືນຍົງເຖິງປີ 2030 ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຕ່າງໆພາຍໃຕ້ຂອບການຮ່ວມມືແມ່ນໍ້າຂອງ-ຍີ່ປຸ່ນ ໃນອະນາຄົດ.

__________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์