ດ່ານພູເກືອ 9 ເດືອນເກັບລາຍໄດ້ບໍ່ເຖີງເຄິ່ງແຜນປີ ຍ້ອນສິນຄ້າຍົກເວັ້ນພາສີຜ່ານຫຼາຍ

  ດ່ານສາກົນພູເກືອ ທີ່ແຂວງອັດຕະປື ໄດ້ຕັ້ງເປົ້າໝາຍຈັດເກັບລາຍຮັບເຂົ້າງົບປະມານໃນປີ 2019 ນີ້ໃຫ້ໄດ້ທັງໝົດ 32 ຕື້ກີບ ຊຶ່ງຜ່ານການຈັດຕັ້ງປະຕິບັດ 9 ເດືອນມານີ້ສາມາດເກັບໄດ້ພຽງແຕ່ 14 ຕື້ກວ່າກີບ ເທົ່າກັບ 45,18% ຂອງແຜນການປີຍ້ອນລາຍການສິນຄ້ານຳເຂົ້າ ແລະສົ່ງອອກມີການຍົກເວັ້ນພາສີຜ່ານຫຼາຍ.

  ຕາມຂໍ້ມູນການເປີດເຜີຍຂອງທ່ານ ເຄນໄຊ ທອງພຸດ ຫົວໜ້າພາສີດ່ານສາກົນພູເກືອ ແຂວງອັດຕະປື ໄດ້ໃຫ້ສຳພາດວ່າ: ໃນ 9 ເດືອນຜ່ານມາການປະຕິບັດວຽກງານຂອງກອງຄຸ້ມຄອງລາຍຮັບແມ່ນມີທັງຂໍ້ສະດວກ ແລະຂໍ້ຫຍຸ້ງຍາກເປັນຕົ້ນ: ເສັ້ນທາງຄົມມະນາຄົມໄປ-ມາຍັງພົບຄວາມລຳບາກ, ການນຳເຂົ້ານໍ້າມັນເຊື້ອໄຟໝົດປີມີແຕ່ 2 ບໍລິສັດໃນນັ້ນຊ້ວງລະດູຝົນການນຳເຂົ້ານໍ້າມັນເຊື້ອໄຟຫຼຸດນ້ອຍລົງສາເຫດຍ້ອນເສັ້ນທາງເກີດສະພາບດິນເຊາະເຈື່ອນ, ສິນຄ້າຂາອອກດ້ານກະສິກຳ ແລະຜະລິດຕະພັນສຳ ເລັດຮູບສ່ວນຫຼາຍແມ່ນໄດ້ຮັບການຍົກເວັ້ນພາສີຕາມກົດໝາຍພາສີມາດຕາ 59 ຂະນະທີ່ການນຳເຂົ້າສ່ວນຫຼາຍກໍແມ່ນການສົ່ງເສີມການລົງທຶນຂັ້ນລັດຖະບານ ແລະ ຂັ້ນແຂວງໂດຍໄດ້ຮັບບູລິມະສິດຕາມກົດໝາຍວ່າດ້ວຍການລົງທຶນທີ່ໄດ້ຮັບການຍົກເວັ້ນແຈ້ງເສຍພາສີ, ບໍລິສັດທີ່ນຳເຂົ້າເສຍພາສີມີນ້ອຍ, ເສັ້ນທາງເປັນພູສູງ, ການຂົນສົ່ງມີຄວາມສ່ຽງ ແລະບັນຫາອື່ນໆ ອີກຫຼາຍຢ່າງ.

  ແນວໃດກໍ່ດີ ທ່ານ ເຄນໄຊ ທອງພຸດ ຢືນຢັນວ່າ: ຄາດຄະເນໃນ 3 ເດືອນທ້າຍປີຈະສູ້ຊົນເກັບລາຍຮັບເຂົ້າງົບປະມານຕື່ມອີກ4 ຕື້ກີບ ໃນນັ້ນບວກລາຍການຈົດຮັບຈົດຈ່າຍຂອງບໍລິສັດຮ່ວງເເອງຢາລາຍທີ່ກໍາລັງເລັ່ງທວງ 8 ຕື້ກີບນັ້ນລວມຈະໄດ້ 12 ຕື້ກວ່າກີບ ຊຶ່ງຄາດຄະເນໝົດປີ 2019 ລາຍຮັບທັງໝົດແມ່ນຈະເກັບໄດ້ປະມານ 27 ຕື້ກວ່າກີບ.

ສະໜັບສະໜຸນໂດຍ: ສ່ວນບຸກຄົນ

ທັງນີ້ດ່ານຈະໄດ້ນຳໃຊ້ຫຼາຍມາດຕະການໃນຕໍ່ໜ້າໂດຍເອົາໃຈໃສ່ສຶກສາອົບຮົມວຽກງານການເມືອງແນວຄິດໃຫ້ສະມາຊິກພັກ, ພະນັກງານທີ່ຢູ່ໃນຄວາມຮັບຜິດຊອບພາຍໃນດ່ານໃນນັ້ນຈະໄດ້ເນັ້ນໜັກບັນດາຫົວໜ້າໜ່ວຍງານ-ຮອງໜ່ວຍງານທີ່ໄດ້ແບ່ງຄວາມຮັບຜິດຊອບລົງເລິກກັບບັນດາວິຊາການທີ່ເຮັດວຽກຕົວຈິງ, ເອົາໃຈໃສ່ສັບຊ້ອນໝູນ ວຽນຫຼືສັບປ່ຽນໜ້າທີ່ໃຫ້ມີຄວາມເຂັ້ມແຂງ, ສືບຕໍ່ແກ້ໄຂລົດນໍາເຂົ້າບໍ່ຖືກຕ້ອງຕໍ່ຜູ້ທີ່ຍັງບໍ່ທັນມາແຈ້ງເສຍພາສີຈະໄດ້ສົມທົບກັບພາກສ່ວນກ່ຽວຂ້ອງເພື່ອຊອກຫາມາດຕະການແກ້ໄຂ, ເພີ່ມທະວີການສະກັດກັ້ນການລັກລອບສິນຄ້າໜີພາສີອື່ນໆຕາມເຂດທີ່ມີຄວາມສ່ຽງ, ປຸກລະດົມບັນດາຜູ້ປະກອບການໄດ້ເຂົ້າມາຜ່ານດ່ານໃຫ້ຫຼາຍຂຶ້ນ, ແກ້ ໄຂບັນຫາປະກົດການຫຍໍ້ທໍ້ພາຍໃນດ່ານ ແລະຂຸດຄົ້ນບັນດາແຫຼ່ງລາຍຮັບໃຫ້ໄດ້ຕາມແຜນໂດຍມີການປະສານສົບທົບກັບບັນດາໜ່ວຍງານພາຍ ໃນດ່ານ ແລະຈຸດປະສານງານທ່ານ ເຄນໄຊ ທອງພຸດ ກ່າວ.

ສະໜັບສະໜຸນໂດຍ: HONDA

__________

ຂຽນໂດຍ: ມາລາທິບ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์