ນໍ້າຕົກຕາດຄາ ແຫຼ່ງທ່ອງທ່ຽວທີ່ສວຍງາມ

  ເມືອງໜອງແຮດ ແຂວງຊຽງຂວາງ ນັບວ່າຈັດຢູ່ໃນປະເພດເມືອງທີ່ມີເນື້ອທີ່ນ້ອຍແຕ່ກໍເຕັມໄປດ້ວຍຊັບພະຍາກອນທຳມະຊາດ ແລະຊີວະນາໆພັນອັນອຸດົມສົມບູນໂດຍສະ ເພາະດ້ານສະຖານທີ່ທ່ອງທ່ຽວກໍບໍ່ໄດ້ເປັນທີສອງຮອງຈາກເມືອງອື່ນ, ບໍ່ວ່າຈະເປັນທາງດ້ານວັດທະນະທຳຮີດຄອງປະເພນີ, ຮ່ອງຮອຍປະຫວັດສາດ ແລະ ທຳມະຊາດທີ່ສວຍງາມເປັນຕົ້ນແມ່ນນໍ້າຕົກຕາດຄາ.

 ສະເພາະແຫຼ່ງທ່ອງທາງທຳມະຊາດຖືວ່າມີບັນຍາກາດຟົດຟື້ນເປັນພິເສດ, ໃນນີ້ນໍ້າຕົກຕາດຄາເຫັນວ່າບັນດານັກທ່ອງທ່ຽວໃຫ້ຄວາມສົນໃຈຫຼາຍພໍສົມຄວນເນື່ອງຈາກທີ່ຕັ້ງຢູ່ບໍ່ໄກປານໃດຈາກຕົວ ເມືອງໃຫຍ່ທີ່ສຳຄັນທຳມະຊາດອ້ອມຂ້າງລວມທັງນໍ້າຕົກຕາດ ແມ່ນສຸດແສນສວຍງາມນັກທ່ອງທ່ຽວສາມາດລົງຫຼິ້ນນໍ້າທີ່ເຢັນສະບາຍໄດ້ຢູ່ບໍລິເວນກ້ອງນໍ້າຕົກຕາດ,ສ່ວນຢູ່ດ້ານລຸ່ມຂອງຕາດກໍມີສາລາໄວ້ໃຫ້ໄດ້ນັ່ງພັກຜ່ອນຢ່ອນໃຈ ແລະຢູ່ທາງເຂົ້າກໍ່ມີຮ້ານຂາຍເຄື່ອງກິນດື່ມ ແລະເຄື່ອງຫັດຖະກຳທ້ອງຖິ່ນໄວ້ບໍລິການແກ່ທ່ານນຳອີກ.

ສະໜັບສະໜຸນໂດຍ: ສ່ວນບຸກຄົນ

-------

 

 ນໍ້າຕົກຕາດຄາຕັ້ງຢູ່ບ້ານຄັງພະນຽນ ເມືອງໜອງແຮດ ຫ່າງຈາກເທສະບານເມືອງໄປທາງທິດຕາເວັນຕົກປະມານ 20 ກວ່າກິໂລແມັດ ເປັນຕາດທຳມະຊາດທີ່ມີນໍ້າໄຫຼຕະຫຼອດປີມີຄວາມສູງປະມານ 100 ກວ່າແມັດ ຊຶ່ງຕາດແຫ່ງນີ້ມີຄວາມສວຍງາມຫຼາຍເພາະເປັນຕາດທີ່ເປັນຊັ້ນໆອ້ອມຮອບຕາດຍັງມີປ່າໄມ້ທີ່ຕຶບໜາອັນໄດ້ເຮັດໃຫ້ອາ ກາດເຂດນັ້ນເຢັນສະບາຍປອດໂປ່ງເອົາເປັນວ່າບັນດານັກທ່ອງທ່ຽວທັງພາຍໃນ ແລະຕ່າງປະເທດທ່ານໃດທີ່ມີໂອກາດໄດ້ເດີນທາງໄປເຂດພາກເໜືອກໍຢ່າລືມແວ່ຊົມແຫຼ່ງທ່ອງທ່ຽວນໍ້າຕົດຕາດແຫ່ງດັ່ງກ່າວກໍແລ້ວກັນເຊື່ອແນ່ວ່າທ່ານຈະປະທັບຢ່າງແນ່ນອນ.

ສະໜັບສະໜຸນໂດຍ: HONDA

---------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄຄົມ

 

แชร์