ທຄຕລ ສະຫຼອງວັນຫັນເປັນທະນາຄານທຸລະກິດຄົບຮອບ 30 ປີ

  ທະນາຄານການຄ້າຕ່າງປະເທດລາວມະຫາຊົນ (ທຄຕລ) ໄດ້ຈັດພິທີສະເຫຼີມສະຫຼອງວັນຫັນເປັນທະນາຄານທຸລະກິດຄົບຮອບ 30 ປີ ໃນວັນທີ 1 ພະຈິກ ທີ່ໂຮງ ແຮມແລນມາກ ນະຄອນຫຼວງວຽງຈັນ ໂດຍການເປັນກຽດເຂົ້າຮ່ວມຂອງທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ພ້ອມດ້ວຍຄະນະຜູ້ວ່າການ,ບັນດາຄະນະກົມຈາກ ທຫລ ພາກສ່ວນກ່ຽວຂ້ອງ, ພະນັກງານຂອງ ທຄຕລ ແລະແຂກຖືກເຊີນເຂົ້າຮ່ວມ.

  ທ່ານ ພູຂົງ ຈັນທະຈັກ ຜູ້ອໍານວຍການໃຫ່ຍ ທຄຕລ ໄດ້ລາຍງານໂດຍຫຍໍ້ກ່ຽວກັບປະຫວັດການເຕີບໃຫ່ຍຂະຫຍາຍຕົວຂອງ ທຄຕລ ໃນໄລຍະ 30 ປີທີ່ຜ່ານມາໂດຍຍົກໃຫ້ເຫັນວ່າ ທຄຕລ ໄດ້ຫັນເປັນທະນາຄານທຸລະກິດໃນວັນທີ 1 ພະຈິກ 1989 ແລະໄດ້ຍົກລະດັບການຄຸ້ມຄອງບໍລິຫານຕາມຮູບແບບບໍລິສັດມະຫາຊົນດ້ວຍການຈົດທະບຽນຢູ່ໃນຕະຫຼາດຫຼັກຊັບລາວເປັນທະນາຄານແຫ່ງທໍາອິດຂອງປະເທດລາວໃນວັນທີ 11 ມັງກອນ 2011 ດໍາເນີນງານຕາມວິໄສທັດຄື: “ເປັນທະນາຄານທີ່ເຂັ້ມແຂງທັນສະໄໝກ້າວສູ່ມາດ ຕະຖານສາກົນ”, ມີໂຄງສ້າງການ ຖືຮຸ້ນ: ລັດຖະບານຖືຮຸ້ນ 70%, ນັກລົງທຶນພາຍໃນລວມນັກລົງ ທຶນຕ່າງປະເທດ 20% ແລະຄູ່ ຮ່ວມຍຸດທະສາດ 10% ມາຮອດປະຈຸບັນ ທຄຕລ ມີທັງໝົດ 14 ພະແນກ, 3 ສູນ, 20 ສາຂາ, 93 ໜ່ວຍບໍລິການ, 15 ຫ້ອງແລກ ປ່ຽນ, ມີຕູ້ ATM 408 ໜ່ວຍ, CDM 29 ໜ່ວຍ ແລະຕົວແທນບີຄໍາ 532 ຕົວແທນ, ມີພະນັກງານທັງໝົດ 2.013 ຄົນ (ຍິງ932).

  ຕະຫຼອດໄລຍະ 30 ປີ ທຄຕລ ໄດ້ເອົາໃຈໃສ່ປັບປຸງ ແລະພັດທະນາລະບົບບໍລິການຂອງຕົນຢ່າງຕໍເນື່ອງໂດຍສະເພາະແມ່ນການປັບປຸງວັດທະນະທໍາບໍລິການ, ປັບປຸງເອກະລັກຂອງສໍານັກງານ, ຂະຫຍາຍຕາໜ່າງບໍລິການໃຫ້ກ້ວາງຂວາງ, ນໍາໃຊ້ເທັກໂນໂລຊີທີ່ທັນສະໄໝເຂົ້າໃນການບໍລິການໃຫ້ມີລະບົບຂັ້ນຕອນການບໍລິການທີ່ ວ່ອງ ໄວ, ຖືກຕ້ອງຊັດເຈນ ແລະມີ ຄວາມປອດໄພສູງເອົາໃຈໃສ່ພັດທະນາຜະລິດຕະພັນອີເລັກໂທຣນິກເປັນຕົ້ນແມ່ນຜະລິດຕະພັນ iBank, BCEL ONE, CDM ແລະອື່ນໆທີ່ສາມາດສ້າງຄວາມສະດວກຫຼາຍດ້ານໃນການເຮັດທຸລະກໍາດ້ານການເງິນໂດຍສະເພາະຜະລິດຕະພັນ BCEL ONE ໄດ້ສ້າງຈຸດໄດ້ປຽບດ້ານການຊໍາລະສະ ສາງຜ່ານລະບົບມືຖືຮູບແບບ ໃໝ່ ທຄຕລ ຍັງເປັນຜູ້ລິເລີ່ມນໍາໃຊ້ການຊໍາລະດ້ວຍລະບົບ QR Code ຢູ່ພາຍໃນປະເທດຜ່ານ BCEL One Pay ທີ່ຊ່ວຍເຮັດໃຫ້ ການຊໍາລະສິນຄ້າ ແລະບໍໍລິການມີຄວາມວ່ອງໄວ, ມີຄວາມປອດໄພ, ສາມາດກວດສອບໄດ້ ແລະ ໄດ້ມາດຕະຖານສາກົນຊຶ່ງໄດ້ສ້າງຄວາມເຊື່ອໝັ້ນສູງໃຫ້ທັງຜູ້ຊື້ ແລະ ຜູ້ຂາຍ, ສາມາດຫຸຼດຜ່ອນການນໍາໃຊ້ເງິນສົດຢູ່ໃນສັງຄົມໄດ້ເປັນຢ່າງດີ.

  ນອກນັ້ນ ທຄຕລ ຍັງໄດ້ພັດທະນາ ແລະນໍາໃຊ້ຜະລິດຕະພັນຂອງຕົນເຂົ້າໃນການເກັບລາຍຮັບເຂົ້າງົບປະມານຂອງລັດເຊັ່ນ: ໂຄງການເກັບຄ່າທໍານຽມທາງ, ຄ່າພາສີທີ່ດິນ ແລະ ໂຄງການເກັບພາສີອາກອນແບບທັນສະໄໝ (Smart Tax, Smart VAT), ລວມທັງໂຄງການເກັບຄ່າທໍານຽມຜ່ານຂົວມິດຕະພາບ 1 ຊຶ່ງແຕ່ລະໂຄງການສາມາດຊ່ວຍໃຫ້ລັດເກັບກໍາງົບປະມານໄດ້ເປັນຢ່າງດີ.

 ທຄຕລ ໄດ້ພັດທະນາໂຄງການຊ່ວຍເຫຼືອສັງຄົມ BCEL OneHeart ຊຶ່ງເຮັດໜ້າທີ່ເປັນເຄື່ອງມື ແລະເປັນສື່ກາງໃນການຮັບບໍລິຈາກເງິນຊ່ວຍເຫຼືອສັງຄົມທີ່ອໍານວຍຄວາມສະດວກໃຫ້ທັງຜູ້ຂໍຮັບບໍລິຈາກ ແລະ ຜູ້ສະໝັກໃຈບໍລິຈາກມີຫຼາຍໂຄງການເຂົ້າຮ່ວມ ທຄຕລ ເປັນທີ່ຮັບຮູ້ ແລະ ຍອມຮັບຈາກພາຍໃນ ແລະ ຕ່າງປະເທດເຫັນໄດ້ຈາກບັນດາລາງວັນອັນຊົງກຽດທີ່ໄດ້ຮັບລາງວັນດີເດັ່ນໃນການບໍລິການດ້ານການທະນາຄານສາຂາຕ່າງໆ ຈາກເວທີລະດັບສາກົນລວມທັງໝົດ 25 ຄັ້ງ.

ສະໜັບສະໜຸນໂດຍ: ສ່ວນບຸກຄົນ

  ໃນໂອກາດດັ່ງກ່າວ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນກໍໄດ້ສະແດງຄວາມຍ້ອງຍໍຊົມເຊີຍຕີລາຄາສູງຕໍ່ຜົນງານຂອງ ທຄຕລ ທີ່ຍາດມາໄດ້ພ້ອມທັງມີທິດຊີ້ນໍາໃຫ້ຄະນະຜູ້ບໍລິຫານ ທຄຕລ ສືບຕໍ່ໃນການພັດທະນາຢ່າງໝັ້ນຄົງ, ປັບປຸງຄຸນນະພາບການບໍລິການດ້ານຕ່າງໆໃຫ້ໃກ້ຄຽງກັບສາກົນ.

__________

ຂຽນໂດຍ: ທຄຕລ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์