ທຫລ ທາບທາມຄໍາເຫັນໃສ່ຮ່າງດໍາລັດການເງີນ ແລະບັນຊີ

  ກອງປະຊຸມທາບທາມຄໍາເຫັນເປີດກ້ວາງໃສ່ຮ່າງດໍາລັດການເງິນແລະການບັນຊີທະນາຄານແຫ່ງ ສປປ ລາວ (ທຫລ) ໄດ້ຈັດຂຶ້ນໃວັນທີ 1 ພະຈິກ 2019 ທີ່ນະ ຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ນາງ ວັດທະນາ ດາລາລອຍ ຮອງຜູ້ວ່າການ ທຫລ ແລະມີທ່ານ ນາງ ຂັນແກ້ວ ຫຼ້າມະນີເງົາ ຫົວໜ້າກົມບັນຊີ ແລະການເງິນ ທຫລ ແລະບັນດາກົມພາຍໃນ, ກະຊວງ-ອົງການກ່ຽວຂ້ອງເຂົ້າຮ່ວມ.

  ກອງປະຊຸມໃນຄັ້ງນີ້, ທ່ານ ນາງ ຂັນແກ້ວ ຫຼ້າມະນີເງົາ ໄດ້ຢັ້ງ ຢືນຄືນໝາກຜົນແຫ່ງການເຄື່ອນໄຫວໃນຜ່ານມາ ໂດຍສະເພາະນັບແຕ່ທ້າຍປີ 2018 ໄດ້ມີການແຕ່ງຕັ້ງຄະນະຮັບຜິດຊອບຄົ້ນຄວ້າ ຮ່າງດໍາລັດດັ່ງກ່າວ ແລະໃນຕົ້ນປີ 2019 ມາເຖິງປະຈຸບັນຮ່າງດໍາລັດສະບັບນີ້ໄດ້ມີການປະກອບຄໍາ ຄິດຄໍາເຫັນຢ່າງຕົງໄປຕົງມາ ແລະຫຼາກຫຼາຍຂອງບັນດາພະນັກ ງານໃນທົ່ວ ທຫລ ກໍ່ຄືບັນດາກະ ຊວງ - ອົງການກ່ຽວຂ້ອງຊຶ່ງດໍາລັດ ກ່ຽວກັບການເງິນ ແລະບັນຊີແມ່ນ ອີງໃສ່ກົດໝາຍ ວ່າດ້ວຍ ທຫລ (ສະບັບປັບປຸງ); ກົດໝາຍວ່າດ້ວຍງົບປະມານແຫ່ງລັດ (ສະບັບປັບປຸງ); ກົດໝາຍວ່າດ້ວຍການບັນຊີ (ສະບັບປັບປຸງ); ບົດຮຽນຂອງ ສສ ຫວຽດນາມ; ສປ ຈີນ, ໄທ, ກໍາປູ ເຈຍ ແລະ ອົງການຕ່າງໆຈໍານວນ ໜຶ່ງ ໂດຍປະກອບມີ 7 ພາກ, 4 ໝວດ ແລະ 48 ມາດຕາ.

  ການສ້າງດໍາລັດສະບັບນີ້ກໍ່ເພື່ອແນໃສ່ຄຸ້ມຄອງວຽກງານ ການເງິນ ແລະບັນຊີຂອງ ທຫລ ໃຫ້ມີປະສິດທິຜົນ, ປະຢັດ, ໂປ່ງໃສ ແລະສາມາດກວດສອບໄດ້ທັງເປັນການສ້າງຄວາມເຂັ້ມແຂງທາງ ດ້ານການເງິນ, ຮັບປະກັນການປະຕິບັດພາລະບົດບາດຂອງຕົນ ໂດຍ ສະເພາະດ້ານການເງິນ ແມ່ນຄຸ້ມຄອງບໍລິຫານຊັບສິນ, ໜີ້ສິນ ແລະ ທຶນ, ງົບປະມານ, ການແບ່ງປັນຜົນໄດ້ຮັບສຸດທິປະຈໍາປີ, ການສ້າງຄັງຕ່າງໆ. ທຫລ ເປັນເຈົ້າຕົນເອງໃນການຄຸ້ມຄອງບໍລິຫານວຽກງານການເງິນຂອງຕົນ (ກົດໝາຍ ວ່າດ້ວຍ ທຫລ ມາດຕາ 56). ດ້ານ ການບັນຊີ ແມ່ນເກັບກໍາ, ບັນທຶກ, ຈັດປະເພດ, ສະຫຼູບຂໍ້ມູນການເງິນ ແລະສ້າງເອກະສານລາຍງານການເງິນເພື່ອເປັນຂໍ້ມູນ ແລະເຄື່ອງມືວິເຄາະຖານະການເງິນ, ການຕິດຕາມ-ກວດກາ, ການວາງແຜນການເງິນ ແລະການຄຸ້ມຄອງບໍລິຫານວຽກງານຂອງ ທຫລ ໃຫ້ມີປະສິດທິຜົນ.

 ໃນກອງປະຊຸມບັນດາຜູ້ເຂົ້າຮ່ວມຍັງໄດ້ປຶກສາຫາລືໂດຍສະເພາະກ່ຽວກັບທຶນສ້າງຕັ້ງຂອງ ທຫລ; ແຜນງົບປະມານປະຈໍາປີຂອງ ທຫລ; ຄວາມຈໍາເປັນໃນການດັັດແກ້ແຜນງົບປະມານປະຈໍາປີ; ກ່ຽວກັບຫຼັກການບັນຊີ; ຂໍ້ຫ້າມທົ່ວໄປ - ຂໍ້ຫ້າມສໍາລັບ ທຫລ ແລະຂໍ້ຫ້າມສໍາລັບເຈົ້າໜ້າທີ່ ແລະພະນັກງານທີ່ກ່ຽວຂ້ອງ ແລະການກໍານົດການເງິນ ແລະ ການບັນຊີໃນນັ້ນການກໍານົດຊື່ແຈ້ງກົງຈັກຂັ້ນກົມທີ່ເຮັດໜ້າທີ່ເປັນເສນາທິການຂອງ ທຫລ ແລະ ວຽກງານອື່ນໆ ທີ່ປິ່ນອ້ອມວຽກງານການເງິນ ແລະບັນຊີ.

__________

ຂຽນໂດຍ: ຣັດສະໝີ ດວງສັດຈະ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์