ເປີດການທ່ອງທ່ຽວທຳມະຊາດແບບອະນຸລັກ ປະຊາຊົນມີສ່ວນຮ່ວມທີ່ເມືອງພີນ

   ແຂວງສະຫວັນນະເຂດເປີດການທ່ອງທ່ຽວທຳມະຊາດແບບອະນຸລັກໂດຍປະຊາຊົນມີສ່ວນຮ່ວມເຂດປ່າສະຫງວນແຫ່ງຊາດດົງພູວຽງທີ່ບ້ານວົງສີແກ້ວ  ແລະບ້ານຍາງເມືອງພີນທີ່ໄດ້ຮັບການສະໜັບສະໜູນຈາກໂຄງການຄຸ້ມຄອງທີ່ດິນ ແລະປ່າໄມ້ແບບຍືນຍົງໃນລະບົບນິເວດປ່າໂຄກພາກໃຕ້ ສປປ ລາວ  ຊຶ່ງພິທີໄດ້ຈັດຂຶ້ນໃນລະຫວ່າງວັນທີ 16-20 ມັງກອນຜ່ານມານີ້, ໂດຍການເປັນກຽດເຂົ້າຮ່ວມຂອງທ່ານທ່ອນແກ້ວ ພຸດທະໄກຍະລາດຮອງເຈົ້າແຂວງສະ ຫວັນນະເຂດ, ມີຕາງໜ້າອົງການສະຫະປະຊາຊາດປະຈຳ ສປປ ລາວ, ມີການນຳຂັ້ນກະຊວງ, ແຂວງ, ເມືອງ, ອຳນາດການປົກຄອງບ້ານ, ຄະນະຊີ້້ນຳໂຄງການຂັ້ນຕ່າງໆ, ຊ່ຽວຊານໂຄງການ, ວິຊາການກ່ຽວຂ້ອງຈາກນີ້ກໍ່ມີນັກທ່ອງທ່ຽວ ແລະປະຊາຊົນພາຍໃນສອງບ້ານດັ່ງກ່າວເຂົ້າຮ່ວມ.

  ທ່ານສີຫາ ພັນນະວົງຮອງຫົວໜ້າພະແນກຖວທແຂວງໄດ້ລາຍງານໃຫ້ຮູ້ວ່າ: ສອງບ້ານດັ່ງກ່າວແມ່ນຕິດພັນກັບເຂດປ່າສະຫງວນແຫ່ງຊາດດົງພູວຽງທີ່ຍັງອຸດົມສົມບູນໄປດ້ວຍສັດປ່າ ແລະຊີວະນານາພັນ, ຍັງມີຄວາມອຸດົມສົມບູນທາງດ້ານຂະນົບທຳນຽມ, ຮີດຄອງປະເພນີລວມທັງວິຖີຊີວິດຂອງບັນດາ   ເຜົ່າທີ່ເປັນເອກະລັກຂອງທ້ອງຖິ່ນ, ມີປ່າມະເຫສັກດົງສະກີທີ່ປະຊາຊົນມີຄວາມສັດທາ ແລະເຊື່ອຖືຢ່າງເຂັ້ມງວດນອກນີ້ໃນປ່າແຫ່ງນີ້ກໍ່ມີສັດປ່າທີ່ຫາຍາກກຳລັງຈະສູນພັນເປັນຕົ້ນ: ຂາແດງ ແລະຕະຫຼຸງ, ມີທ່າແຮງທາງດ້ານການລ່ອງເຮືອຊົມທຳມະຊາດຂອງສາຍນ້ຳເຊບັ້ງຫຽງຮອດແຫຼ່ງທ່ອງທ່ຽວທຳມະຊາດແກ້ງສາມັດແຕກ ແລະແຫຼ່ງທ່ອງທ່ຽວປະຫວັດສາດນັ້ນກໍ່ຄືຂົວຕາດໄຮພ້ອມນີ້, ປະຊາຊົນຍັງມີທ່າແຮງດ້ານຫັດຖະກຳທີ່ເປັນເອກະລັກທາງຊົນເຜົ່າທີ່ຍັງສືບທອດມາແຕ່ບັນພະບູລຸດ ແລະຍັງສິ່ງດີໆຫຼາຍຢ່າງທີ່ສ້າງຄວາມປະທັບໃຈໃຫ້ແກ່ນັກທ່ອງທ່ຽວທີ່ຈະເຂົ້າມາທ່ອງທ່ຽວໃນຂົງເຂດນີ້ນຳອີກ.ຜ່ານມາ, ຄະ ນະຮັບຜິດຊອບວຽກງານທ່ອງທ່ຽວຂັ້ນແຂວງ, ເມືອງ, ວິຊາການໂຄງການໂດຍສົມທົບກັບຊ່ຽວຊານຂອງໂຄງການໄດ້ມີແຜນລົງມາປັບປຸງວຽກງານທ່ອງ ທ່ຽວໃນຂົງເຂດນີ້ເພື່ອໃຫ້ເປັນຮູບປະທຳຊຶ່ງມາຮອດເວລານີ້, ການກະກຽມພື້ນຖານການຮອງຮັບການເປີດການທ່ອງທ່ຽວແບບອະນຸລັກປະຊາຊົນມີສ່ວນ ຮ່ວມແມ່ນມີຄວາມພ້ອມແລ້ວສຳລັບລາຍການທ່ອງທ່ຽວນີ້ແມ່ນໄດ້ຕິດພັນ ແລະເຊື່ອມໂຍງກັບແຫຼ່ງທ່ອງທ່ຽວເຂດໂອງ-ມັ່ງເມືອງຊົນນະບູລີທັງຕິດພັນ ແລະເປັນວົງຈອນທ່ອງທ່ຽວກັບບັນດາເມືອງຕ່າງໆນຳອີກ.

   ໂອກາດນີ້, ທ່ານຮອງເຈົ້າແຂວງສະຫວັນນະເຂດໄດ້ກ່າວຕໍ່ພິທີວ່າ: ການເປີດການທ່ອງທ່ຽວແບບອະນຸລັກໂດຍປະຊາຊົນມີສ່ວນຮ່ວມໃນຄັ້ງນີ້ມັນເປັນພຽງບາດກ້າວທຳອິດທີ່ເປັນພື້ນຖານໃນການພັດທະນາການທ່ອງທ່ຽວແຕ່ເພື່ອໃຫ້ມີຄວາມຍືນຍົງຕະຫຼອດໄປນັ້ນກໍ່ຍັງມີອີກຫຼາຍປັດໄຈທີ່ກ່ຽວພັນເປັນຕົ້ນແມ່ນ: ພື້ນຖານການຮອງຮັບ,ການມີໄມຕີຈິດມິດຕະພາບ, ການເປັນເຈົ້າບ້ານທີ່ດີ, ຄຸນນະພາບການບໍລິການ,ການຮັກສາໄວ້ຂະນົບທຳນຽມທີ່ເປັນເອກະ ລັກທີ່ໂດດເດັ່ນຂອງທ້ອງຖິ່ນ, ສິ່ງຂອງຫັດຖະກຳຫຼືສິ່ງຂອງທີ່ລະນຶກ,ການສົ່ງເສີມວຽກງານການຕະຫຼາດ ແລະອື່ນໆຊຶ່ງທາງແຂວງກໍ່ຢືນຢັນວ່າຈະໃຫ້ຄວາມຮ່ວມມືໃນການພັດທະນາວຽກງານດັ່ງກ່າວນີ້ເພື່ອໃຫ້ມີຄວາມຍືນຍົງ.

แชร์