ນໍ້າຕົກຕາດແລ ແຫຼ່ງທ່ອງທ່ຽວສວຍງາມ ຂອງເມືອງນໍ້າບາກ

  ຫຼວງພະບາງ ເປັນແຂວງ ໜຶ່ງທີ່ອຸດົມສົມບູນໄປດ້ວຍວັດທະນະທຳ ແລະທຳມະຊາດມີຫຼາຍເຂດຫຼາຍທ້ອງຖິ່ນໄດ້ຖືກສ້າງໃຫ້ກາຍ ເປັນແຫຼ່ງທ່ອງທ່ຽວ ໂດຍອາໄສທຳມະຊາດ,ປະຫວັດສາດ ແລະວັດທະນະທຳເປັນສິ່ງດຶງດູດເອົາຜູ້ຄົນ ບໍ່ວ່າຈະເປັນທັງພາຍໃນ ແລະຕ່າງປະເທດ, ໃນນັ້ນມີສະຖານທີ່ໜຶ່ງທີ່ໜ້າສົນໃຈ ແລະຜູ້ຄົນມັກເວົ້າເຖິງນັ້ນກໍຄືຕາດແລແຫ່ງນີ້.

ຕາດແລ ເປັນນໍ້າຕົກໜຶ່ງທີ່ ມີຄວາມສວຍງາມ ແລະໄດ້ຮັບຄວາມນິຍົມຈາກນັກທ່ອງທ່ຽວພາຍໃນເຂົ້າໄປທ່ຽວຊົມຈັດກິດຈະກຳກິນເຂົ້າປ່າສາມັກຄີໃນວັນພັກລັດຖະການສຳລັບຕາດແຫ່ງນີ້ຢູ່ບ້ານຫ້ວຍ ເມືອງນໍ້າບາກ ແຂວງຫຼວງພະບາງ ຊຶ່ງຫ່າງຈາກ ຕົວເມືອງປະມານ 15 ກິໂລແມັດ,ຖ້າທ່ານໃດມີໂອກາດໄດ້ໄປແຂວງ ຫຼວງພະບາງ ກໍຢ່າລືມໄປສຳຜັດ ກັບບັນຍາກາດອັນສວຍງາມຂອງ ນໍ້າຕົກຕາດແຫ່ງນີ້ຮັບຮອງວ່າ ທ່ານຈະຕິດໃຈ ແລະຢາກກັບໄປ ອີກຢ່າງແນ່ນອນ.

ນໍ້າຕົກຕາດແຫ່ງນີ້ຍັງຮັກສາຄວາມເປັນທຳມະຊາດໄວ້ໄດ້ຢ່າງສົມບູນເພາະຍັງບໍ່ມີກັນດັດແປງ ຫຼື ພັດທະນາພໍປານໃດ,ສ່ວນເສັ້ນທາງທີ່ເຂົ້າໄປຫາຕາດນັ້ນແມ່ນຖືກປັບປຸງໃຫ້ສະດວກສະບາຍຫຼາຍເອົາເປັນວ່າຖ້າທ່ານໃດໄປຮອດ ແລ້ວຢ່າລືມລົງຫຼິ້ນນໍ້າໄສໆເຢັນໆທີ່ໄຫຼໄປຕາມໂງ່ນຫີນນ້ອຍໃຫຍ່ຊຶ່ງຈະສ້າງຄວາມເພີດເພີນໃຫ້ ທ່ານຢ່າງແນ່ນອນ.

-------------

 ໜັງສືພຶມເສດຖະກິດ-ສັງຄົມ

• 05/11/2019