ຝຶກອົບຮົມສ້າງນິຕິກໍາໃຕ້ກົດໝາຍ ໃຫ້ພະນັກງານໄຊສົມບູນ

  ກະຊວງຍຸຕິທໍາຮ່ວມກັບພະແນກຍຸທໍາ ແຂວງໄຊສົມບູນ ຈັດພິທີເປີດຊຸດຝຶກອົບຮົມວຽກງານການສ້າງນິຕິກໍາໃຕ້ກົດໝາຍຂັ້ນທ້ອງຖິ່ນໃຫ້ແກ່ພະນັກງານຫຼັກແຫຼ່ງຂອງແຂວງໃນລະຫວ່າງວັນທີ 30-31 ຕຸລາ 2019 ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ແຂວງໄຊສົມບູນ ໂດຍເປັນປະທານຂອງ ທ່ານ ຄໍາແດງ ສີລາວົງ ຮອງປະທານສະພາປະຊາຊົນແຂວງ, ມີທ່ານ ສົມບູນ ວົງພະຈັນຮອງຫົວໜ້າກົມກົດໝາຍກະຊວງຍຸຕິທໍາ ແລະທ່ານ ອຸດອນ ສິງດາລາ ຫົວໜ້າພະແນກຍຸຕິທໍາແຂວງ, ມີຫົວໜ້າພະແນກ, ຮອງພະແນກການ, ອົງການ, ກົມກອງອ້ອມຂ້າງແຂວງພ້ອມດ້ວຍວິທະຍາກອນທີ່ມາຈາກສູນກາງ,ສຳມະນາກອນພາຍໃນແຂວງ ແລະ 5 ເມືອງເຂົ້າຮ່ວມ.

  ທ່ານ ຄໍາແດງ ສີລາວົງ ຮອງປະທານສະພາປະຊາຊົນແຂວງໄດ້ກ່າວເປີດພິທີພ້ອມທັງສະແດງຄວາມຍ້ອງຍໍຊົມເຊີຍຕໍ່ຄະນະນໍາຂອງພະແນກຍຸຕິທໍາແຂວງທີ່ໄດ້ເອົາໃຈໃສ່ປະສານສົມທົບກັບຄະນະນໍາຂອງກະຊວງກໍຄືພາກສ່ວນທີ່ກ່ຽວຂ້ອງໃນການກະກຽມວຽກງານຕ່າງໆດ້ວຍຄວາມຮັບຜິດຊອບສູງຈົນສາມາດເປີດບັ້ນຝຶກອົບຮົມໃນຄັ້ງນີ້ຢ່າງທັນເວລາ.

 ຈາກນັ້ນ ທ່ານ ສົມບູນ ວົງພະຈັນ ໄດ້ດຳເນີນບັນລະຍາຍເອກະສານທີ່ສຳຄັນຕ່າງໆເປັນຕົ້ນເອກະສານການສ້າງນິຕິກໍາໃຕ້ກົດໝາຍຂັ້ນທ້ອງຖິ່ນ, ເຕັກນິກການຮ່າງຂໍ້ຕົກ ລົງ ແລະວຽກງານການປະເມີນຜົນກະທົບຂອງຮ່າງ ນິຕິກໍາ,  ທັງນີ້ກໍເພື່ອປະຕິບັດຕາມແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກກ່ຽວກັບການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍລະບຽບກົດໝາຍໂດຍຫັນແນວທາງນະໂຍບາຍຂອງພັກໃຫ້ເປັນຕິນິກໍາ ເພື່ອໃຫ້ບັນດາແນວທາງດັ່ງກ່າວ ໄດ້ຮັບການຈັດຕັ້ງປະຕິບັດໃຫ້ປາກົດຜົນເປັນຈິງ ເພື່ອເປັນເຄື່ອງມືໃນການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ຫຼື ຄຸ້ມຄອງວຽກງານໃດໜຶ່ງທັງເປັນບ່ອນອີງໃຫ້ແກ່ອົງການຈັດຕັ້ງຂອງລັດລວມທັງພະນັກງານແລະເຈົ້າໜ້າທີ່ໃນການເຄື່ອນໄຫວຂອງຕົນໃຫ້ມີຄວາມຮັດກຸມຂຶ້ນເລື້ອຍໆ.

  ຄ່ຽງຄູ່ກັນນັ້ນກໍເພື່ອເຮັດໃຫ້ສຳມະນາກອນກໍຄືພະນັກງານໃນຂອບເຂດທົ່ວແຂວງໄຊສົມບູນສາມາດກໍາໄດ້ ແລະນໍາໄປສ້າງເປັນນິຕິກໍາໃນຂອບເຂດວຽກງານຂອງຕົນເພື່ອເປັນເຄື່ອງມື ແລະບ່ອນອີງໃນການຈັດຕັ້ງປະຕິບັດວຽກງານຕ່າງໆໃຫ້ເຂົ້າສູ່ລະບຽບຫຼັກການເທື່ອລະກ້າວ.

__________

ຂຽນໂດຍ: ນໍ້າເໝີຍ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์