ຄອບຄົວທ່ານ ບຸນລ້ອມ ຢຶດຖືຜະລິດກະສິກຳເປັນສິນຄ້າສ້າງລາຍຮັບໝັ້ນຄົງ

  ຄວາມດຸໝັ່ນຂະຫຍັນພຽນເປັນບໍ່ເກີດພາໃຫ້ຄອບຄົວພົ້ນທຸກໄດ້ດັ່ງຄອບຄົວ ທ່ານ ບຸນລ້ອມ ສິງລາດສົມບູນ ເປັນຄອບຄົວໜຶ່ງທີ່ຢຶດຖືອາຊີບຜະລິດກະສິກໍາເປັນສິນຄ້າ ຈົນກາຍເປັນຄອບຄົວຕົວແບບອັນພົ້ນເດັ່ນທີ່ມີຄວາມຍືນຍົງ, ຊຶ່ງສາມາດສ້າງອາຊີບຄົງທີ່ໄດ້ຢ່າງແທ້ຈິງ.

  ທ່ານ ບຸນລ້ອມ ສິງລາດສົມບູນ ໃຫ້ຮູ້ວ່າ: ນັບແຕ່ປີ 1986 ພາຍຫຼັງໄດ້ສ້າງຄອບຄົວກັບ ນາງ ຈິນນາລີ ສິງລາດສົມບູນ, ມີລູກຮ່ວມກັນ 4 ຄົນ, ຍິງ 1 ຄົນ ແມ່ນຢຶດຖືອາຊີບເຮັດທຸລະກິດຕັ້ງຊື່ບໍ ລິສັດສິງລາດສົມບູນກໍ່ສ້າງສ້ອມ ແປງຂົວທາງ ຈໍາກັດຜູ້ດຽວທີ່ບ້ານດອນຕະລາດເມືອງຈໍາປາສັກ, ແຂວງຈໍາປາສັກ ມາຮອດປີ 2003 ຕົນເອງໄດ້ຍົກຍ້າຍຄອບຄົວໄປຢູ່ ບ້ານເວີນແຄນເມືອງສາມັກຄີໄຊ ແຂວງອັດຕະປື ໂດຍໄດ້ສືບຕໍ່ດໍາເນີນທຸລະກິດຫຼາຍຢ່າງເປັນຕົ້ນ: ສືບຕໍ່ກໍ່ສ້າງ ແລະສ້ອມແປງຂົວທາງ, ຕັ້ງສາຂາຮັກສາຄວາມປອດໄພພາຍໃນແຂວງ ຫຼື (ລບພ) ຕັ້ງໂຮງງານບົດຫີນອ່ອນ, ໂຮງງານຄົບຫີນ, ຂຸດຄົ້ນແຮ່ຊາຍ ແລະ ຕັ້ງໂຮງງານປຸງແຕ່ງໄມ້ຂະໜາດກາງ ແລະອື່ນໆ, ປູກຝັງ-ລ້ຽງສັດ ເປັນອາຊີບສໍາຮອງ ແນວລະເລັກລະນ້ອຍເພື່ອຂາຍແກ້ໄຂຊີວິດຂອງຄອບຄົວຄ່ອຍໆດີຂຶ້ນ.

  ຕົກມາຮອດປີ 2019 ຕົນເອງໄດ້ມີໂອກາດທຽວໄປມາຮັບໂຄງການກໍ່ສ້າງສ້ອມແປງເສັ້ນທາງ 18A (ໄລຍະ 20 ກິໂລແມັດລະຫວ່າງສາມແຍກຫຼັກສາມເມືອງສາມັກຄີໄຊ ຫາບ້ານອິນທີ ເມືອງສະໜາມໄຊ ເວລານັ້ນໄດ້ສັງເກດທົ່ງນາແຫ່ງໜຶ່ງເປັນດິນນາຂອງກອງບັນຊາການທະຫານແຂວງອັດຕະປື ເປັນດິນເປົ່າຫວ່າງມາຫຼາຍປີທີ່ບ້ານອິນທີ ເມືອງສະໜາມ ໄຊ ຕົນເອງໄດ້ມີຄວາມຄິດຢາກທົດລອງເຮັດການກະເສດແບບ ນາຫວ່ານ ເພື່ອສ້າງລາຍຮັບເສີມໂດຍທີ່ວ່າບໍ່ທັນມີໃຜເຮັດມາກ່ອນ, ດັ່ງນັ້ນກໍພະຍາຍາມໃຊ້ເວລາ ຫວ່າງມາສຶກສາຄົ້ນຄວ້າກັບ ຄອບຄົວເພື່ອຫັນອາຊີບຈາກການ ເຮັດທຸລະກິດທີ່ກ່າວຂ້າງເທິງນັ້ນ ມາທົດລອງເຮັດການກະເສດນາຫວ່ານເພາະເຄີຍມີບົດຮຽນມາແລ້ວທີ່ບ້ານດອນຕະລາດ ເມືອງຈໍາປາສັກ, ຈຶ່ງໄດ້ຕົກລົງກັນກັບຄອບຄົວສ້າງສັນຍາກັບກອງບັນຊາການທະຫານແຂວງໃນປີ 2019 ນີ້, ທົດລອງເຮັດນາຫວ່ານໃຫ້ກາຍ ເປັນສິນຄ້າ ໃນເນື້ອທີ່ 57 ເຮັກຕາ, ຜົນຜະລິດອອກມາແມ່ນຈະຈຳໜ່າຍຂາຍໃຫ້ກອງບັນຊາການທະຫານແຂວງ ຫຼືຈໍາໜ່າຍພາຍໃນແຂວງອັດຕະປືນັ້ນເອງ.

  ຂັ້ນຕົ້ນກ່ອນລົງມືຈັດຕັ້ງປະຕິບັດກໍໄດ້ໃຊ້ທຶນປະມານ 130 ລ້ານກວ່າກີບ, ເຂົ້າໃນການຟື້ນຟູຄືນໃໝ່ດ້ວຍລະບົບກົນຈັກໜັກ ແລະເບົາ ເປັນຕົ້ນ ບຸກເບີກເນື້ອທີ່ຈໍານວນ 57 ເຮັກຕາ, ຈົກຄອງ ເໝືອງອ້ອມຮອບ, ຈົກໜອງປາ, ປຸກສ້າງທີ່ຢູ່ອາໃສ, ນໍາເຂົ້າກົນຈັກ ປັກດໍາ, ກົນຈັກເກັບກ່ຽວ, ອຸປະ ກອນໃສ່ຝຸ່ນ, ຈັກສູບນໍ້າ  ແລະອື່ນໆ ໃຫ້ພຽງພໍ, ໂດຍໄດ້ເລີມລົງມືແຕ່ ທ້າຍເດືອນພຶດສະພາ 2019 ເປັນຕົ້ນມາ, ດ້ວຍການໄຖແລະຫວ່ານແຫ້ງໃນເນື້ອທີ່ 50 ກວ່າເຮັກຕາ ແລະມາຮອດປະຈຸບັນເກັບກ່ຽວສໍາເລັດແລ້ວ 100%, ຜົນຜະລິດໄດ້ 120 ກວ່າໂຕນ.

  ທ່ານ ບຸນລ້ອມ ສິງລາດສົມບູນ ຍັງກ່າວຕື່ມວ່າ: ມີວັນນີ້ໄດ້ກໍຍ້ອນ ພັກ-ລັດຂັ້ນເທິງ ກໍຄືອຳນາດການປົກຄອງແຂວງອັດຕະປືໄດ້ເອື້ອອຳນວຍເງື່ອນໄຂໃນດ້ານຕ່າງໆ ໂດຍສະເພາະຂະແໜງການກະສິກໍາທີ່ໄດ້ສະໜອງແນວພັນ, ຈັດສົ່ງພະນັກງານວິຊາການໃຫ້ບົດຮຽນໃໝ່ໆໃນການບົວລະບັດຮັກສາ ແລະ ວັດຖຸອຸປະກອນຈໍານວນໜຶ່ງ, ການເຮັດນາ ກໍຄືການລ້ຽງສັດ ຖ້າເຮົາມັກຮັກ ແລະມີປະສົບການ ແລ້ວກໍບໍ່ຍາກພຽງແຕ່ເຮົາມີຄວາມ ດຸໝັ່ນເຮັດໃຫ້ທັນເວລາ, ເບິ່ງແຍງ ບົວລະບັດໃຫ້ດີນາກໍໝັ່ນໃສ່ຝຸ່ນ, ນໍ້າ ໃຫ້ພໍ, ໝັ່ນຂ້າຫຍ້າ ແລະແປງຄັນ ເຖິງເວລາເກັບກ່ຽວກໍເກັບກ່ຽວ ໃຫ້ທັນເວລາ; ກໍຈະໄດ້ຮັບຜົນດີ ສ່ວນຂໍ້ຫຍຸ້ງຍາກກໍມີ ແຕ່ສັດຕູພືດບາງປະເພດ, ສັດລ້ຽງສ່ວນໃຫຍ່ຢູ່ເຂດຊົນນະບົດບໍ່ຄ່ອຍຜູກມັດ ແລະສະພາບແວດລ້ອມຄືດັ່ງປີ 2019 ນີ້ ໄດ້ມີຝົນຕົກໜັກເກີດໄພນໍ້າຖ້ວມຖ້າທຽບໃສ່ແຜນການເຫັນວ່າຜົນຜະລິດບໍ່ຄ່ອຍດີອີກຢ່າງເປັນປີເລີ່ມຕົ້ນຍັງບໍ່ທັນກໍາໄດ້ສະພາບຈຸດພິເສດດິນແດນເຂດນີ້.

   ສະໜັບສະໜຸນໂດຍ: HONDA

  ແນວໃດກໍດີກ່ອນເລີ່ມເຂົ້າປີ 2020 ຈະມີແຜນການສູ້ຊົນຜະລິດເຂົ້ານາແຊງຕື່ມອີກ, ປະຈຸບັນກໍາລັງລົງຕາຂ່າຍໄຟຟ້າເພື່ອກະກຽມຜົນຜະລິດເຮັດນາແຊງໃນລະດູ ແລ້ງອີກເທື່ອໜຶ່ງທັງນີ້ທ່ານຍັງໃຫ້ທັດສະນະສ່ວນຕົວວ່າ: ຢາກໃຫ້ແຕ່ລະຄອບຄົວເອົາໃຈໃສ່ພັດທະນາເສດຖະກິດຄອບຄົວຂອງຕົນຢ່າງຫ້າວຫັນຖ້າພື້ນຖານຄອບຄົວໄດ້ຮັບການພັດທະນາມີເສດຖະກິດດີບ້ານ, ເມືອງກໍພັດທະນາໄດ້ໄວປະເທດຊາດກໍຈະຫຼຸດພົນຈາກຄວາມທຸກຍາກໄດ້.

ສະໜັບສະໜຸນໂດຍ: ສ່ວນບຸກຄົນ

__________

ຂຽນໂດຍ: ຊິບປະໄຊ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์