ບ້ານຫ້ວຍໂປ່ງ ຖືກຮັບຮອງເປັນບ້ານວັດທະນະທໍາຂອງເມືອງຈອມເພັດ

 ພິທີປະກາດຮັບຮອງເອົາບ້ານຫ້ວຍໂປ່ງກຸ່ມນາໄຊຈະເລີນເມືອງຈອມເພັດແຂວງຫຼວງພະບາງເປັນບ້ານວັດທະນະທໍາໄດ້ຈັດຂຶ້ນໃວັນທີ 19 ມັງກອນ 2019 ທີ່ເດີ່ນໂຮງຮຽນບ້ານຫ້ວຍໂປ່ງໂດຍມີທ່ານຈັນວັນນະສີເຈົ້າເມືອງຈອມເພັດ, ທ່ານສີສະຫວາດຍີ່ລັດໃຈຫົວໜ້າຂະແໜງວັດທະນະທໍາພະແນກຖະແຫຼງຂ່າວ, ວັດທະນະທໍາແລະທ່ອງທ່ຽວແຂວງ, ມີຫົວໜ້າກຸ່ມ, ກໍາມະການພັກເມືອງ,ຫ້ອງການກ່ຽວຂ້ອງຂອງເມືອງ, ອົງການປົກຄອງບ້ານພ້ອມດ້ວຍປະຊາຊົນ ແລະ ຄູ-ອາຈານບ້ານຫ້ວຍໂປ່ງເຂົ້າຮ່ວມ.

  ພິທີເລີ່ມຕົ້ນດ້ວຍການເຄື່ອນຂະບວນທີ່ເຕັມໄປດ້ວຍສີສັນເປັນເອກະລັກຂອງທ້ອງຖິ່ນເປັນຕົ້ນແມ່ນນາງສາວຈັບປ້າຍບ້ານວັດທະນະທໍາ ແລະທຸງຊາດທຸງພັກ, ເຍົາວະຊົນ, ຂະບວນເຫຼົ້າໄຫ, ຟ້ອນດາບ, ຕີກອງຍາວ, ພາຂວັນ, ຂະບວນຂັບລໍາຂອງເຜົ່າກຶມມຸ-ມົ້ງ ແລະອື່ ນໆ, ຈາກນັ້ນທ່ານ ສົມເພັດ ວິໄລຈິດ ນາຍບ້ານຫ້ວຍໂປ່ງກໍໄດ້ຜ່ານການຈັດຕັ້ງປະຕິບັດວຽກງານສ້າງບ້ານວັດທະນະທໍາ, ຊຶ່ງມີບາງຕອນທ່ານກ່າວວ່າ: ບ້ານຫ້ວຍໂປ່ງເປັນບ້ານເຜົ່າກຶມມຸ ແລະເຜົ່າມົ້ງປະກອບມີ 87 ຄອບຄົວ, ພົນລະເມືອງ 502 ຄົນ, ຍິງ 278 ຄົນ, ອາຊີບຕົ້ນຕໍຂອງປະຊາຊົນແມ່ນປູກຝັງ ແລະລ້ຽງສັດໃຫຍ່. ໃນນີ້ອໍານາດການປົກຄອງໄດ້ເອົາໃຈໃສ່ວຽກງານການເມືອງແນວຄິດໂດຍໄດ້ນໍາເອົາລະບຽບກົດໝາຍຕ່າງໆຂອງພັກ-ລັດມາເຜີຍແຜ່ໃຫ້ປະຊາຊົນໄດ້ຮັບຮູ້ ແລະເຂົ້າໃຈຕໍ່ແນວທາງນະໂຍບາຍຂອງພັກ-ລັດ, ເຮັດໃຫ້ບ້ານມີຄວາມສະຫງົບ ແລະເປັນລະບຽບຮຽບຮ້ອຍໂດຍພື້ນຖານ, ສືບຕໍ່ພັດທະນາເສດຖະກິດຄອບຄົວກໍຄືບ້ານໃຫ້ພົ້ນອອກຈາກຄວາມທຸກຍາກເທື່ອລະກ້າວ, ຊຶ່ງມັນສະແດງອອກປະຊາຊົນມີຄວາມສາມັກຄີຮັກແພງຊ່ວຍເຫຼືອເຊິ່ງກັນ ແລະກັນພ້ອມກັນເຮັດພ້ອມກັນສ້າງສາພັດທະ ນາບ້ານຂອງຕົນຢ່າງເຂັ້ມແຂງ.ປີໜຶ່ງຜ່ານມາສາມາດສ້າງລາຍຮັບໄດ້1ຕື້ກວ່າກີບ, ສະເລ່ຍໃສ່ຫົວຄົນໜຶ່ງໄດ້3ລ້ານກວ່າກີບຕໍ່ຄົນຕໍ່ປີ, ມີເຮືອນຖາວອນ 36 ຫຼັງ, ເຄິ່ງຖາວອນ 30 ຫຼັງ, ຄອບຄົວເຫຼືອກິນ 70 ຄອບຄົວ, ກຸ້ມກິນ 17 ຄອບຄົວ ແລະຄອບຄົວທຸກຍາກ3ຄອບຄົວ. ມີຄອບຄົວຕົວແບບການລ້ຽງສັດ 3 ຄອບຄົວ, ການປູກຝັງ 1 ຄອບຄົວ ແລະຄອບຄົວໃຫ້ການບໍລິການ 1 ຄອບຄົວ. ຈາກການປະເມີນຜົນໃນ 5 ມາດຖານຂອງບ້ານວັດທະນະທໍາທີ່ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວວາງອອກເຫັນວ່າບ້ານດັ່ງກ່າວແມ່ນຄົບຕາມມາດຖານ 100%. ຈາກນັ້ນພິທີກໍໄດ້ຜ່ານຂໍ້ຕົກລົງຂອງເຈົ້າເມືອງຈອມເພັດວ່າດ້ວຍການຮັບຮອງເອົາຄອບຄົວ ແລະບ້ານຫ້ວຍໂປ່ງເປັນບ້ານວັດທະນະທໍາພ້ອມນັ້ນທ່ານຈັນວັນນະສີເຈົ້າເມືອງຈອມເພັດກໍໄດ້ມອບໃບຢັ້ງຢືນສະແດງຄວາມຊົມເຊີຍຕໍ່ຜົນງານຂອງບ້ານທີ່ຍາດມາໄດ້ພ້ອມທັງໄດ້ເນັ້ນໃຫ້ປະຊາຊົນພາຍໃນແຕ່ລະບ້ານຈົ່ງສືບຕໍ່ຮັກສາມູນເຊື້ອດັ່ງກ່າວນີ້ໄວ້ພ້ອມດຽວກັນນັ້ນກໍຕ້ອງບຸກບືນສູ້ຊົນສ້າງເສດຖະກິດຄອບຄົວໃຫ້ເຂັ້ມແຂງເຮັດໃຫ້ແຕ່ລະຄອບຄົວຫຼຸດພົ້ນອອກຈາກຄວາມທຸກຍາກກາຍເປັນຄອບຄົວ ແລະ ບ້ານບ້ານພັດທະນາໃນຕໍ່ໜ້າ. ຈາກນັ້ນປະທານ ແລະຜູ້ເຂົ້າຮ່ວມພິທີກໍ່ໄດ້ຮ່ວມກັນເປີດປ້າຍ ແລະລັ່ນຄ້ອງ 9 ບາດ ເພື່ອເປັນການຢືນຢັນວ່າບ້ານຫ້ວຍໂປ່ງ ກຸ່ມນາໄຊຈະເລີນ ເມືອງຈອມເພັດ ແຂວງຫຼວງພະບາງ ເປັນບ້ານວັດທະນະທໍາຢ່າງສົມກຽດ. ໃນພິທີຍັງມີການເຮັດບຸນປົດປີຫຼືບຸນເກຼິ ແລະບຸນໜໍ່ເປເຈົ່າຂອງເຜົ່າຂຶ້ນ,ໂດຍແມ່ນ ທ່ານດວງຈັນ ພັດຕິກຸນ ປະທານແນວລາວສ້າງຊາດເມືອງຈອມເພັດໃຫ້ກຽດຜ່ານສານອວຍພອນ ແລະເລົ່າປະຫວັດຄວາມເປັນມາຂອງສອງເຜົ່າດັ່ງກ່າວ,ຈາກນັ້ນກໍໄດ້ເຮັດພິທີທາງສາສະໜາຕາມແບບຂອງເຜົ່າພ້ອມທັງຈັດພາບາສີສູ່ຂວັນໃຫ້ແຂກທີ່ມາຮ່ວມງານ ແລະມ່ວນຊື່ນຕາມຮີດຄອງປະເພນີ.

แชร์