ປູກຜັກໃນເຮືອນຮົ່ມເປັນອາຊີບ ສ້າງລາຍຮັບໃຫ້ຄອບຄົວ

  ບ້ານວຽງສາເປັນບ້ານທີ່ຢູ່ໃນເທສະບານແຂວງອຸດົມໄຊ ໄລຍະຜ່ານມາແມ່ນຍັງຖືອາຊີບເຮັດໄຮ່, ເຮັດນາ, ເຮັດສວນ ແລະຫາກິນແບບທໍາມະຊາດເປັນສ່ວນໃຫຍ່ຈິ່ງເຮັດໃຫ້ລາຍຮັບຂອງຄອບຄົວບໍ່ໝັ້ນຄົງຊີວິດການເປັນຢູ່ຂອງປະຊາຊົນພາຍໃນບ້ານຍັງທຸກຍາກ.

 ທ່ານ ບຸນທອງ ພົມມະສອນ ເລຂາພັກບ້ານນາຍບ້ານໆວຽງສາ ລາຍງານໃນກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ 13 ທີ່ໄດ້ໄຂຂຶ້ນທີ່ສະໂມສອນແຂວງອຸດົມໄຊ ວັນທີ 30-31 ຕຸລາ 2019 ໃຫ້ຮູ້ວ່າ: ໂດຍພາຍໃຕ້ການນໍາພາຂອງຄະນະພັກ, ອົງການປົກຄອງບ້ານ ແລະ ຄວາມຕື່ນຕົວຂອງປະຊາຊົນໃນການສ້າງເສດຖະກິດຄອ ບຄົວມາຮອດປີ 2007 ຄອບຄົວຂອງຕົນເອງໄດ້ລິເລີ່ມເຮັດການປູກຜັກໃນເຮືອນຮົ່ມເປັນຜູ້ທໍາອິດຊຶ່ງເປັນໜໍ່ແໜງໃນການລິເລີ່ມ ແລະ ເປັນບົດຮຽນທີ່ດີມີຜົນສໍາເລັດທີ່ນໍາພາປະຊາຊົນພາຍໃນບ້ານຫັນມາປູກພືດຜັກໃນເຮືອນຮົ່ມເປັນອາ ຊີບຈົນເປັນທີ່ຍອມຮັບຂອງສັງຄົມມາເຖິງປະຈຸບັນເມື່ອເຫັນວ່າການປູກຜັກໄດ້ຂາຍດີ ມີລາຍໄດ້ປົກກະຕິກໍ່ມີຫຼາຍຄອບຄົວທີ່ມີດິນຢູ່ໃກ້ຄຽງພາກັນຫັນມາປູກຜັກໃນເຮືອນຮົ່ມມາຮອດປີ 2010 ໄດ້ມີ 8 ຄອບຄົວ,ມີໂຮງເຮືອນ 13 ຫຼັງຕໍ່ຈາກນັ້ນມາຫຼາຍຄອບຄົວທີ່ມີເນື້ອທີ່ນາຢູ່ເຂດນັ້ນເຫັນວ່າການປູກຜັກມີລາຍໄດ້ດີກວ່າການເຮັດນາ, ເຮັດໄຮ່ຮັບຈ້າງຈຶ່ງພາກັນຫັນມາປູກຜັກໃນເຮືອນຮົ່ມເພີ່ມຂຶ້ນເປັນຈໍານວນຫຼາຍ.

 

  ມາຮອດປີ 2014 ທາງຂະແໜງສົ່ງເສີມກະສິກໍາ ແລະສະຫະກອນສົມທົບກັບຫ້ອງການກະສິກໍາ ແລະປ່າໄມ້ເມືອງໄຊໄດ້ລົງໄປຊຸກຍູ້ດ້ານວິຊາການ ແລະຈັດຕັ້ງເປັນກຸ່ມຜະລິດ ເວລານັ້ນມີສະມາ ຊິກກຸ່ມປູກຜັກ 54 ຄອບຄົວ ມີ ໂຮງເຮືອນປູກຜັກ 220 ຫຼັງ ມາ ຮອດວັນທີ 6 ມັງກອນ 2017 ເຈົ້າ ເມືອງໄຊ ໄດ້ອອກໃບອະນຸຍາດສ້າງຕັ້ງກຸ່ມຄຸ້ມຄອງການຜະລິດກະສິກໍາໃຫ້ກຸ່ມປູກຜັກໃນເຮືອນຮົ່ມບ້ານວຽງສາຢ່າງເປັນທາງການ ແລະກໍ່ໄດ້ຮັບການສະໜັບສະໜູນທຶນຈາກລັດຖະບານ ແລະ ໂຄງການດີດີເອັບຊີ ຈຳນວນໜຶ່ງມາຮອດປະຈຸບັນມີສະມາຊິກທັງໝົດ 55 ຄອບຄົວມີໂຮງເຮືອນ 240 ຫຼັງພືດຜັກທີ່ປູກມີຫຼາຍຊະນິດເຊັ່ນ: ຜັກກາດຊອມ, ຜັກສະຫຼັດ, ຜັກບົ່ວ, ຜັກກຫອມປ້ອມ, ຜັກຊີ, ຜັກກ້ານກໍ່າ ຫຼືຜັກຫອມລາບ ແລະຜັກອື່ນໆຫຼາຍຊະນິດ, ປູກຕາມຄວາມຕ້ອງການຂອງທ້ອງຕະຫຼາດລວມຜົນຜະລິດໄດ້ 200 ໂຕນຕໍ່ປີ, ສາມາດສ້າງລາຍຮັບຈາກການຂາຍພືດຜັກ 1,2 ຕື້ກີບຕໍ່ປີ ສະເລ່ຍໃສ່ຄອບຄົວໄດ້ 21 ລ້ານກວ່າກີບຕໍ່ຄອບຄົວ.

  ເວົ້າລວມແລ້ວການປູກຜັກໃນເຮືອນຮົ່ມໂດຍການໃສ່ຝຸ່ນຄອກສາມາດຢຶດເປັນອາຊີບຂອງຄອບຄົວໄດ້ເຮັດໃຫ້ຊີວິດການເປັນຢູ່ຂອງປະຊາຊົນບ້ານວຽງສາດີຂຶ້ນເທື່ອລະກ້າວ ສະແດງໃຫ້ເຫັນໃນປະຈຸບັນມີຄອບຄົວພົ້ນທຸກແລ້ວ 255 ຄອບຄົວ ມີເຮືອນຖາວອນ 168 ຫຼັງ, ມີລົດໃຫຍ່ 66 ຄັນ,ລົດຈັກ 387 ຄັນ, ໂຮງສີເຂົ້າ 20 ເຄື່ອງລູກຫຼານໄດ້ເຂົ້າໂຮງຮຽນ ແລະໄປຮຽນຕໍ່ວິຊາສະເພາະພາຍໃນ ແລະຕ່າງປະເທດ, ຜົນສໍາເລັດທັງໝົດນີ້ກໍຍ້ອນມີແນວທາງອັນຖືກຕ້ອງຂອງພັກ-ລັດ ທີ່ໄດ້ກະຕຸກຊຸກຍູ້, ສະໜັບ ສະໜູນ, ຊີ້ທິດເຍືອງທາງໃຫ້ແກ່ຄະນະໜ່ວຍພັກ, ອົງການປົກຄອງບ້ານວຽງສາໃນການວາງແຜນພັດທະນາເສດຖະກິດ-ສັງຄົມຂອງບ້ານຈົນມີຜົນສໍາເລັດ.

__________

ຂຽນໂດຍ: ນ້ອຍ ງອນວິໄລ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์