ໃຊ້ງົບ 59,1 ຕື້ກີບ ສ້າງຂົວນໍ້າຮຸ່ງ 2 ແຫ່ງຢູ່ໄຊຍະ ດຽວນີ້ສຳເລັດເກືອບ 60%

  ໂຄງການກໍ່ສ້າງຂົວຂ້າມແມ່ນໍ້າຮຸ່ງ 2 ແຫ່ງທີ່ເມືອງ ແລະແຂວງໄຊຍະບູລີ, ໄດ້ເລີ່ມລົງມືກໍ່ສ້າງມາແຕ່ຕົ້ນເດືອນມັງກອນ 2019 ເປັນຕົ້ນມາ, ຮອດປະຈຸບັນມີຄວາມຄືບໜ້າແລ້ວ 57,26% ຂອງໜ້າວຽກທັງໝົດ, ໂດຍແມ່ນບໍລິສັດ MCE Gmbh ຈາກປະເທດໂອຕຣິດ ເປັນຜູ້ຮັບເໝົາກໍ່ສ້າງ, ໃນເວລາ 30 ເດືອນ, ມູນຄ່າ 59,17 ຕື້ກີບ.

  ທ່ານ ສົມບູນ ບຸນຈະເລີນ ຫົວໜ້າໂຄງການໃຫ້ຮູ້ວ່າ: ໂຄງການກໍ່ສ້າງຂົວຂ້າມແມ່ນໍ້າຮຸ່ງຈໍານວນ 2 ແຫ່ງຄື: ຈຸດຂ້າມລະຫວ່າງບ້ານທ່ານາ ຫາບ້ານນາຍາວ ແລະຈຸດຂ້າມບ້ານນາເລົາ ຫາ ບ້ານນາຕໍໃຫຍ່, ຂົວທັງ 2 ແຫ່ງ ມີຄວາມ ກວ້າງ 10,50ແມັດ, ມີ 2 ຊ່ອງຈະລະຈອນ, ມີຄວາມກວ້າງຊ່ອງລະ 3,75 ແມັດ, ມີທາງຄົນຍ່າງ 2 ຂ້າງ, ແຕ່ລະ ຂ້າງກວ້າງ 1,50 ແມັດ.

 ຂົວດັ່ງກ່າວຖືກອອກແບບເປັນ 3 ຊ່ວງຄື: ຄວາມຍາວຊ່ວງທຳອິດ 28,50 ແມັດ, ຊ່ວງທີ 2 ເປັນຊ່ວງກາງນໍ້າມີຄວາມຍາວ46,40 ແມັດ ແລະຊ່ວງ ທີ3 ມີຄວາມຍາວ 28,50 ແມັດ, ລວມລວງຍາວທັງໝົດຂອງຂົວແຕ່ລະແຫ່ງແມ່ນ 103,40 ແມັດ, ໂຄງສ້າງປະກອບດ້ວຍໂຄງເຫຼັກໂຕ I ສອງຄານ ແລະເຊື່ອມກັນດ້ວຍຄານຂວງຕາມໄລຍະຫ່າງ ທີ່ແນ່ນອນ,ດ້ານລຸ່ມເປັນຄອນກຣີດເສີມເຫຼັກ, ດ້ານເທິງຂອງອາຄານຈະຖືກຢຶດດ້ວຍຄອນກຣີດເສີມເຫຼັກສໍາເລັດຮູບ (ແຜ່ນໜ້າຂົວມີຄວາມໜາ 0,4 ແມັດ), ໜ້າຂົວປູຄອນກລີດເສີມເຫຼັກ ແລະປູອັດສະຟານປົກໜ້າເຊິ່ງມີຄວາມໜາ 5 ຊັງຕີແມັດ, ສາມາດຮັບນໍ້າໜັກໄດ້ 50 ໂຕນ.

  ປະຈຸບັນການກໍ່ສ້າງແມ່ນສໍາເລັດ 57,26%, ຄາດວ່າການກໍ່ສ້າງຈະໃຫ້ສໍາເລັດສົມບູນພາຍໃນຕົ້ນເດືອນມິຖຸນາ 2021, ໂດຍມີມູນຄ່າການກໍ່ສ້າງແມ່ນ 6,1 ລ້ານ ເອີໂຣ, ຫຼືເທົ່າກັບ 59,17 ຕື້ກີບ, ເງິນດັ່ງກ່າວແມ່ນກູ້ຢືມບໍ່ມີດອກເບ້ຍຈາກທະນາຄານUnicredit bank Austris AG ປະເທດ ໂອຕຣິດ ແລະແມ່ນບໍລິສັດ MCE Gmbh ຈາກປະເທດ ໂອຕຣິດ ເປັນຜູ້ຮັບເໝົາກໍ່ສ້າງ.

  ຂົວທັງ 2 ແຫ່ງດັ່ງກ່າວເມື່ອກໍ່ສ້າງສໍາເລັດຈະອໍານວຍຄວາມສະດວກໃຫ້ປະຊາຊົນ, ພະນັກງານ, ທະຫານ, ຕໍາຫຼວດ ແລະນັກຮຽນ-ນັກສືກສາທີ່ອາໄສຢູ່ສອງຟາກຝັ່ງຂອງແມ່ນນໍ້າຮຸ່ງໄດ້ໄປ-ມາ, ຫາ-ສູ່, ຄ້າ-ຂາຍ ແລະ ປະຕິບັດໜ້າທີ່ວຽກງານທາງລັດຖະການໄດ້ສະດວກ ແລະທ່ວງທັນກັບເວລາ.

__________

ຂຽນໂດຍ: ອຸ່ນເຮືອນ ໂພທິລັກ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์