ເອດີບີ ປ່ອຍເງິນກູ້ແກ່ລາວ 3 ໂຄງການ ມູນຄ່າ1,23 ພັນຕື້ກີບ

  ວັນທີ 30 ຕຸລາທີ່ນະຄອນຫຼວງວຽງຈັນ, ທະນາຄານພັດທະນາອາຊີ ຫຼືເອດີບີ ໄດ້ລົງນາມສັນຍາປ່ອຍເງິນກູ້ໃຫ້ແກ່ລັດຖະບານລາວຈໍານວນ 140 ລ້ານໂດລາ ປະມານ 1,23 ພັນຕື້ກີບ ເພື່ອພັດທະນາ 3 ໂຄງການໃນຂະແໜງກະສິກໍາ, ຂະແໜງສຶກສາ ແລະການຄຸ້ມຄອງການເງິນພາກລັດ.

   ຕາງໜ້າລັດຖະບານ ສປປ ລາວ ລົງນາມໂດຍທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນກັບທ່ານ ຢາຊູຊິ ເນກິຊິ ຜູ້ຕາງໜ້າທະນາຄານພັດທະນາອາຊີປະຈຳລາວ,ພ້ອມນີ້ກໍມີທ່ານຮອງລັດຖະມົນຕີກະຊວງກະສິກຳ ແລະປ່າໄມ້, ກະຊວງສຶກສາທິການ ແລະກີລາ, ຜູ້ຕາງໜ້າກະຊວງແຜນການ ແລະການລົງທຶນ, ທ່ານ ຮອງເຈົ້າແຂວງຫົວພັນ, ຫຼວງພະບາງ, ໄຊຍະບູລີ, ຊຽງຂວາງ ແລະຄະນະກົມທີ່ກ່ຽວຂ້ອງເຂົ້າຮ່ວມ.

  ການສະໜອງເງິນກູ້ຄັ້ງນີ້ກໍເພື່ອສ້າງຄວາມເຂັ້ມແຂງດ້ານເສດຖະກິດ-ສັງຄົມ ໃຫ້ມີການເຕີບໂຕຢ່າງຕໍ່ເນື່ອງ, ຮັກສາສະພາບແວດລ້ອມແບບຍືນຍົງໄປຄຽງຄູ່ກັບການລຶບລ້າງຄວາມທຸກຍາກ, ໂດຍສະເພາະແມ່ນໂຄງການພັດທະນາຂະແໜງກະສິກຳຈຳນວນ 45 ລ້ານໂດລາ,ເປັນການສ້າງຄວາມເຂັ້ມແຂງໃຫ້ລະບົບຊົນລະປະທານ, ເສັ້ນທາງໃນຊົນນະບົດ ແລະ ເງື່ອນໄຂດ້ານໂພຊະນາການ, ເຂົ້າເຖິງຕະຫຼາດກະສິກຳ,ຊ່ວຍໃຫ້ມີລາຍຮັບເພີ່ມ, ປັບປຸງຄຸນນະພາບຊີວິດການເປັນຢູ່ຂອງປະຊາຊົນໃນ 4 ແຂວງພາກ ເໜືອຂອງລາວເຊັ່ນ: ແຂວງຫົວພັນ, ຫຼວງພະບາງ, ໄຊຍະບູລີ, ຊຽງຂວາງ.

 ສຳລັບໂຄງການພັດທະນາຂະແໜງສຶກສາຈຳນວນ 50 ລ້ານໂດລາ, ເປັນການພັດທະນາຂະແໜງການສ້າງວຽກເຮັດງານທຳ, ຊ່ວຍຍົກລະດັບອັດຕາເຂົ້າຮຽນ, ປັບປຸງຄຸນ ນະພາບການສຶກສາໃນຂັ້ນມັດທະຍົມ, ຂັ້ນປະຖົມໃຫ້ແທດເໝາະກັບຄວາມຕ້ອງການທີ່ປ່ຽນແປງຂອງຕະຫຼາດແຮງງານ, ເພື່ອທີ່ຈະຍົກລະດັບການຈ້າງງານຂອງໄວໜຸ່ມ, ເພື່ອທີ່ຈະຊ່ວຍໃຫ້ນັກຮຽນມັດທະຍົມບົນພື້ນຖານຄວາມຮູ້ຄວາມສາມາດ ແລະຄວາມຮູ້ສະເພາະທີ່ ຕ້ອງການໃນຕະຫຼາດແຮງງານຕ້ອງການຕົວຈິງໃນປະຈຸບັນ.

  ສຳລັບໂຄງການຄຸ້ມຄອງການເງິນພາກລັດຈໍານວນ 45 ລ້ານໂດລາ ທີ່ເອດີບີສະໜອງເງິນກູ້ໃຫ້ແກ່ແຜນງານສ້າງຄວາມເຂັ້ມແຂງໃນການຄຸ້ມຄອງການເງິນພາກລັດ, ຊ່ວຍລັດຖະບານປັບປຸງການຄຸ້ມຄອງໜີ້ສິນພາກລັດ, ການຄຸ້ມຄອງປັບປຸງດ້ານພາສີ, ປັບປຸງການວາງແຜນງົບປະມານ ແລະການເງິນໄລຍະກາງ, ການສົ່ງເສີມການປົກ ຄອງ, ສ້າງຄວາມໜ້າເຊື່ອຖືທາງດ້ານການເງິນ. ທັງໝົດນີ້, ແມ່ນສອດຄ່ອງກັບການສະໜັບສະໜູນຂອງເອດີບີໃນການປັບປຸງໃນໄລຍະຍາວທີ່ເປັນບູລິມະສິດຂອງລັດຖະບານ.

ສະໜັບສະໜຸນໂດຍ: ສ່ວນບຸກຄົນ

 ແນວໃດກໍດີການສະໜອງເງິນກູ້ຂອງເອດີບີໃຫ້ແກ່ລັດຖະບານ ສປປ ລາວ, ເປັນການສ້າງຄວາມເຂັ້ມແຂງດ້ານເສດຖະກິດ-ສັງຄົມໃຫ້ມີການເຕີບໂຕຢ່າງຕໍ່ເນື່ອງ, ຮັກສາສະພາບແວດລ້ອມແບບຍືນຍົງໄປຄຽງຄູ່ກັບການລຶບລ້າງຄວາມທຸກຍາກຂອງລັດຖະບານ ສປປ ລາວ, ຊຶ່ງໃນປີ 2018 ເອດີບີ ສະໜອງທຶນລວມທັງເງິນຊ່ວຍເຫຼືອລ້າ ແລະເງິນກູ້ທັງໝົດ 21,6 ຕື້ໂດລາ.

ສະໜັບສະໜຸນໂດຍ: HONDA

 ________

ຂຽນໂດຍ: ກະຊວງການເງິນ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์