ກອງປະຊຸມໃຫຍ່ຜູ້ແທນອົງຄະນະພັກເມືອງໄຊ ຄັ້ງທີ XIII

ກອງປະຊຸມໃຫຍ່ຜູ້ແທນອົງຄະນະພັກເມືອງໄຊຄັ້ງທີ XIII ໄດ້ ໄຂຂຶ້ນໃນວັນທີ 30-31 ຕຸລາ 2019 ທີ່ສະໂມສອນຂອງແຂວງພາຍໃຕ້ການເປັນປະທານຂອງທ່ານ ວາລີ ຈືນໍເຢັງ ວ່າການເລຂາພັກເມືອງ ເຈົ້າເມືອງໆໄຊ, ເປັນກຽດເຂົ້າຮ່ວມມີ ທ່ານ ຄຳພັນ ເຜີຍຍະວົງ ກຳມະການສູນກາງພັກເລຂາພັກແຂວງເຈົ້າແຂວງອຸດົມໄຊ, ມີຄະນະປະຈຳພັກແຂວງ, ກຳມະການພັກແຂວງ, ຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ພະນັກງານອາວຸໂສບຳນານ, ຜູ້ແທນສົມບູນ ພ້ອມດ້ວຍແຂກຮັບເຊີນທີ່ມາຈາກຂັ້ນແຂວງແລະບັນດາເມືອງຂອງ ແຂວງອຸດົມໄຊ ແລະ ເມືອງນ້ຳບາກ ແຂວງຫຼວງພະບາງ.

 ທ່ານ ວາລີ ຈືນໍເຢັງ ກ່າວໄຂ ກອງປະຊຸມ ພ້ອມທັງຜ່ານຮ່າງລາຍງານການເມືອງຂອງຄະນະບໍລິຫານງານພັກເມືອງໄຊຊຸດທີ XII ວ່າ: ໃນໄລຍະ 5 ປີຜ່ານມາ ຄະນະ ພັກ, ອົງການປົກຄອງ ແລະ ປະຊາຊົນເມືອງໄຊ ໄດ້ສຸມໃສ່ປະ ຕິບັດມະຕິກອງປະຊຸມໃຫຍ່ ຄັ້ງທີ XII ຂອງອົງຄະນະພັກ ແລະແຜນ ພັດທະນາເສດຖະກິດ-ສັງຄົມ 5 ປີ ຂອງເມືອງພາຍໃຕ້ການຊີ້ນໍາ-ນໍາພາຂອງຄະນະພັກເມືອງ ແລະການໃກ້ຊິດຕິດແທດຂອງແຂວງເຮັດໃຫ້ສາມາດຮັກສາສະຖຽນລະພາບທາງດ້ານການເມືອງ, ຄວາມສະ ຫງົບ ແລະຄວາມເປັນລະບຽບ ຮຽບຮ້ອຍທາງສັງຄົມ, ໄດ້ເອົາໃຈໃສ່ຊີ້ນຳ-ນຳພາ ປະຕິບັດແຜນ ພັດທະນາເສດຖະກິດ-ສັງຄົມຢ່າງ ຕັ້ງໜ້າ, ສາມາດສືບຕໍ່ຮັກສາຈັງຫວະເຕີບໂຕຕໍ່ເນື່ອງ ແລະຂະ ຫຍາຍຕົວໃນທຸກດ້ານ, ໂຄງປະ ກອບເສດຖະກິດຫັນປ່ຽນຢ່າງ ຕັ້ງໜ້າ; ພື້ນຖານໂຄງລ່າງ ແລະ ການເຄື່ອນໄຫວວິທະຍາສາດ, ເຕັກໂນໂລຊີໄດ້ຮັບການເອົາໃຈໃສ່, ຈັງຫວະເຕີບໂຕເສດຖະກິດຂະ ຫຍາຍຕົວ ໃນລະດັບ 4,55%, ທຽບໃສ່ຄາດໝາຍກອງປະຊຸມ ໃຫຍ່ວາງອອກປະຕິບັດໄດ້ 39,56%, ລວມຍອດມູນຄ່າຜົນ ຜະລິດປະຕິບັດໄດ້ 1.132 ລ້ານກີບ, ທຽບໃສ່ຄາດໝາຍປະຕິບັດໄດ້ 101%, ຊຸກຍູ້ສົ່ງເສີມການຜະລິດ ໃຫ້ກາຍເປັນສິນຄ້າໂດຍ ສະເພາະ ແມ່ນ: ການປູກໄມ້ອຸດສາຫະກຳ, ປູກພືດເປັນສິນຄ້າ, ການລ້ຽງສັດ, ການປັບປຸງພື້ນຖານໂຄງລ່າງ ເຊັ່ນ: ສ້ອມແປງ ແລະກໍ່ສ້າງລະ ບົບຊົນລະປະທານ, ເສັ້ນທາງ, ນ້ຳ ລິນສະອາດ, ການຂະຫຍາຍຕາ ຂ່າຍໄຟຟ້າ, ຕາໜ່າງໄປສະນີ, ໂທ ລະຄົມ, ລະບົບການບໍລິການສິນເຊື່ອຂອງທະນາຄານ.

ສະໜັບສະໜຸນໂດຍ: HONDA

  ນອກຈາກນີ້ ຍັງມີການຈັດຕັ້ງ ແຂ່ງຂັນກີລາ, ສິລະປະວັນນະຄະດີ, ການສ້າງກຸ່ມບ້ານ ແລະບ້ານວັດທະນະທຳໃໝ່, ບ້ານປອດຄະດີ, ປອດຢາເສບຕິດ, ບ້ານພັດທະນາ, ຕິດພັນກັບການສ້າງໜ່ວຍພັກປອດ ໃສ, ເຂັ້ມແຂງ, ໜັກແໜ້ນ, ການ ເຮັດ ທົດລອງສາມສ້າງ, ການສ້າງ ເທສະບານຕາມຄາດໝາຍເມືອງ 4 ສໍ, ການປັບປຸງກົງຈັກການຈັດ ຕັ້ງຮາກຖານພັກ ແລະອົງການປົກ ຄອງຂັ້ນບ້ານຢ່າງເປັນຂະບວນກວ້າງຂວາງ, ປະຊາຊົນບັນດາເຜົ່າມີຄວາມສາມັກຄີປອງດອງ, ເປັນປຶກແຜ່ນ ແລະເອກະພາບພາຍໃນ ໄດ້ເປັນກໍາລັງແຮງສັງລວມ ເຂົ້າໃນການຈັດຕັ້ງປະຕິບັດບັນດາຄາດໝາຍ.

ສະໜັບສະໜຸນໂດຍ: ສ່ວນບຸກຄົນ

  ໂອກາດດັ່ງກ່າວຜູ້ແທນກອງປະຊຸມຈະໄດ້ພ້ອມກັນຄົ້ນຄວ້າ, ປະກອບຄຳເຫັນ ແລະຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດສັງຄົມ 5 ປີ ຄັ້ງທີ V (2020-2024), ຜ່ານບົດສຳຫຼວດການນຳພາລວມຂອງຄະນະບໍລິຫານງານພັກເມືອງຊຸດທີ XII, ຮັບຟັງການປະກອບຄຳຄິດຄຳເຫັນຈາກຕ່າງໜ້າແຕ່ລະ ຂົງເຂດວຽກງານ, ຕົວແບບການ ຜະລິດກະສິກຳເປັນສິນຄ້າ ແລະ ອື່ນໆ ທີ່ສຳຄັນໃນກອງປະຊຸມຈະ ໄດ້ປ່ອນບັດຄັດເລືອກເອົາຄະນະບໍລິຫານງານພັກເມືອງໄຊຊຸດທີ XIII, ປ່ອນບັດຄັດເລືອກເອົາຄະນະປະຈຳພັກເມືອງ, ເລືອກເອົາເລຂາ, ຮອງເລຂາພັກເມືອງ, ປ່ອນບັດຄັດເລືອກເອົາປະທານ, ຮອງປະທານກວດກາພັກຕື່ມອີກ.

__________

ຂຽນໂດຍ: ໄມພອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์