ບຸນທາດຫຼວງຈະມີຫຼາຍກິດຈະກຳ ສ່ວນແມ່ຄ້າເລີ່ມຈັບຈ່ອງຫ້ອງຂາຍສິນຄ້າ

 ພິທີຖະແຫຼງຂ່າວການຈັດງານບຸນນະມັດສະການພະທາດຫຼວງວຽງຈັນ (ນວ) ແລະງານວາງສະແດງສິນຄ້າປະຈໍາປີ 2019 ໄດ້ຈັດຂຶ້ນທີ່ເດີ່ນພະທາດຫຼວງວຽງຈັນ, ໃນວັນທີ 29 ຕຸລາ 2019, ໂດຍການຖະແຫຼງຂອງທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ມີທ່ານ ບຸນທ່ຽງ ຂຸນສີ ປະທານແນວລາວສ້າງຊາດ ນວ, ທ່ານ ພົ.ວ ບຸບຜາ ສີພົມມາ ຫົວໜ້າກອງບັນຊາການ ປກສ ນວ, ທ່ານ ເບີລິນ ເພັດຈັນທະລາດ ຫົວໜ້າພະແນກອຸດສາຫະກໍາ ແລະ ການຄ້າ ນວ ແລະ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ ນວ, ພ້ອມ ພະນັກງານກ່ຽວຂ້ອງເຂົ້າຮ່ວມ.

 ທ່ານ ສີຫຸນ ສິດທິລືໄຊ ກ່າວວ່າ: ການຈັດງານບຸນນະມັດສະການພະທາດຫຼວງວຽງຈັນແມ່ນເພື່ອປົກປັກຮັກສາ ແລະເສີມຂະຫຍາຍມູນເຊື້ອອັນດີງາມຂອງບຸນນະມັດ ສະການພະທາດຫຼວງຂອງຊາດລາວກໍຄືຊາວ ນວ ທີ່ເຄີຍສືບທອດກັນມາແຕ່ບູຮານນະການໃຫ້ດໍາລົງຄົງຢູ່ນໍາຊາວລາວຕະຫຼອດໄປ, ເປັນການສ້າງໂອກາດຊຸກຍູ້ສົ່ງເສີມທ່ອງທ່ຽວ-ການຄ້າ “ໜຶ່ງເມືອງໜຶ່ງຜະລິດຕະພັນ”, ສິນຄ້າຄອບຄົວຕົວແບບທີ່ຈະກ້າວເປັນສິນຄ້າໂອດ໋ອບທີ່ກາຍເປັນກາໝາຍແຫ່ງຊາດ ແລະ ສິນຄ້າຂອງບັນດາວິສາ ຫະກິດຂະໜາດນ້ອຍ-ກາງໄດ້ມາວາງສະແດງ, ຈໍາໜ່າຍສິນຄ້າທັງພາຍໃນ ແລະ ຕ່າງປະເທດ, ລວມທັງຮ່ວມ ແລກປ່ຽນບົດຮຽນ ແລະ ປະສົບການຈາກບັນດາຫົວ ໜ່ວຍທຸລະກິດດ້ວຍກັນ.

  ງານບຸນດັ່ງກ່າວຈະຈັດຂຶ້ນທັງໝົດ 7 ວັນ ເລີ່ມແຕ່ວັນທີ 5-11 ພະຈິກ 2019 ຄື: ວັນທີ 5 ພະຈິກ ເວລາ 17:00 ໂມງ ພິທີເປີດງານວາງສະແດງສິນຄ້າ ແລະສະຫຼຸບການປະຕິສັງຂອນພະທາດຫຼວງວຽງຈັນຄັ້ງທີ IV, ວັນທີ 9 ພະຈິກ ເວລາ 16:00 ໂມງ ພິທີສູດ ປະລິມຸງຄຸນທີ່ພະທາດຫຼວງ, ວັນທີ 10 ພະຈິກ ເວລາ 13:30 ໂມງ ພິທີແຫ່ຜາສາດເຜິ້ງ, ວັນທີ 11 ພະຈິກ ເວລາ 7:00 ໂມງ, ພິທີໃສ່ບາດຖວາຍສັງຂະທານເວລາ 13:00 ໂມງ, ພິທີແຫ່ລູກຄີ ແລະການແຂ່ງຂັນກີລາພື້ນບ້ານຕີຄີເວລາ 19:00 ໂມງ, ພິທີວຽນທຽນ ແລະ ຈູດທູບທຽນບັ້ງໄຟສັກກະລະບູຊາອົງພະທາດ, ສ່ວນງານວາງສະແດງສິນຄ້າຢູ່ສູນການຄ້າລາວ-ໄອເຕັກຈັດຂຶ້ນວັນທີ 6-17 ພະຈິກ 2019.

  ທ່ານ ສີຫຸນ ສິດທິລືໄຊ ຍັງກ່າວຕື່ມວ່າ: ສໍາລັບການວາງສະແດງສິນຄ້າທີ່ເດີນພະທາດຫຼວງສະໜາມຫຼວງປະກອບມີສິນຄ້າໂອດ໋ອບ, ສິນຄ້າຄອບຄົວຕົວແບບ, ສິນຄ້າຜະລິດຕະພັນພາຍໃນ ແລະວາງສະແດງປະເພດສິນຄ້າປະເພດທ່ອງທ່ຽວ 215 ຫ້ອງ ສິນຄ້າປະເພດບໍລິສັດຂາເຂົ້າ-ຂາອອກ, ເສື້ອຜ້າ, ສິນຄ້າທົ່ວໄປ ແລະເຄື່ອງຫຼິ້ນ 669 ຫ້ອງ, ປະເພດອາຫານ, ເຄື່ອງດື່ມ, ເຂົ້າຫຼາມປີ້ງໄກ່ຢູ່ຂອບເຂດຮອບນອກ 134 ຫ້ອງ, ລວມທັງໝົດປະມານ 1.018 ຫ້ອງ, ສ່ວນຢູ່ສູນການຄ້າລາວ-ໄອເຕັກມີບູດໄວ້ ຮອງຮັບ 488 ບູດ.

 ນອກຈາກນັ້ນ, ຍັງຈະມີງານສີລະປະວັນນະຄະດີ-ກີລາປະກອບມີການສະແດງການຟ້ອນ, ຂັບລໍາຈາກກອງສິລະປະກອນສູນກາງ, ສິລະປະກອນກອງທັບ, ສິລະປະຈາກເມືອງ,ສູນວັດທະນະທໍາເດັກ ແລະສະໂມສອນດ່ານຊ້າງ ແລະກີລາຕີມວຍເພື່ອເຂົ້າຮ່ວມສະແດງໃນແຕ່ລະຄືນເປັນການສ້າງບັນຍາກາດເຮັດໃຫ້ງານມີຄວາມເບີກ ບານມ່ວນຊື່ນ ແລະຮັກສາໄດ້ຮີດຄອງປະເພນີອັນດີງາມຂອງຊາດລາວເຮົາໃຫ້ຍືນຍົງຄຽງຄູ່ກັຍຊາດລາວຕະຫຼອດໄປ.

ສະໜັບສະໜຸນໂດຍ: ສ່ວນບຸກຄົນ

ສະໜັບສະໜຸນໂດຍ: HONDA

  ສຳລັບການຈັບຈອງຫ້ອງຂາຍເຄື່ອງໃນງານບຸນນະມັດສະການພະທາດຫຼວງວຽງຈັນປີນີ້ສະເພາະເຂດຮັບຜິດຊອບຂອງບໍລິສັດຄຳເສັງທ່ານ ຄຳເສັງ ສູນດາລາ ປະທານບໍລິສັດຄຳເສັງກ່າວວ່າ: ປະຈຸບັນພໍ່ຄ້າຊາວຂາຍ, ບັນດາຫົວໜ່ວຍທຸລະກິດໄດ້ເລີ່ມເຂົ້າມາຈັບຈອງຫ້ອງຂາຍເປັນຈຳນວນຫຼາຍເຫັນວ່າຍັງຄົງມີບັນຍາກາດຄຶກຄື້ນຄືກັບປີທີ່ຜ່ານມາ, ດຽວນີ້ແມ່ນມີຜູ້ເຂົ້າມາຈັບຈອງຫ້ອງຂາຍເຄື່ອງແລ້ວ 200 ຫ້ອງ ຈາກທັງໝົດຂອງບໍລິສັດ 300 ຫ້ອງສ່ວນດ້ານລາຄາແມ່ນຄືເກົ່າ,ບໍ່ໄດ້ມີການຂຶ້ນລາຄາ ຊຶ່ງບັນດາພໍ່ແມ່ປະຊາຊົນ, ຊາວຄ້າຂາຍ, ບັນດາຫົວໜ່ວຍທຸລະກິດທ່ານໃດສົນຈອງຫ້ອງຂາຍສິນຄ້າກໍສາມາດຕິດຕໍ່ບໍລິສັດຄຳເສັງທີ່ໝາຍເລກໂທລະສັບ 020 9999 7556, 9666 6599.

____________

ຂຽນໂດຍ: ພິມພອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์