ລ້ອງແຈ້ງ ປະກາດນາໄຊສະຫວ່າງ ເປັນບ້ານວັດທະນະທໍາ

  ພິທີປະກາດຮັບຮອງບ້ານນາໄຊສະຫວ່າງ ເປັນບ້ານວັດທະນະທໍາແຫ່ງທີ 4 ຂອງເມືອງລ້ອງແຈ້ງ ແຂວງໄຊສົມບູນ ໄດ້ຈັດຂຶ້ນໃນວັນທີ 24 ຕຸລາ 2019 ທີ່ເດີ່ນໂຮງ ຮຽນປະຖົມນາໄຊສະຫວ່າງ, ໂດຍການເຂົ້າຮ່ວມຂອງທ່ານ ແດງ ປະທຸມທອງ ຮອງເຂົ້າແຂວງໄຊສົມບູນ, ທ່ານ ແຮ ວົງສຸວັດ ເຈົ້າເມືອງລ້ອງແຈ້ງ ແລະ ທ່ານ ທົງສະ ຫວັນ ໂພສະລາດ ຮອງຫົວ ໜ້າພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວແຂວງ, ມີອໍານາດການປົກຄອງບ້ານພ້ອມ ດ້ວຍປະຊາຊົນ ແລະນ້ອງນ້ອຍນັກ ຮຽນ-ເຍົາວະຊົນເຂົ້າຮ່ວມ.

  ທ່ານ ຊຽງຄໍາພັນ ພົມມະທັດເລຂາພັກບ້ານ,ນາຍບ້ານນາໄຊສະຫ່ວາງ ໄດ້ຜ່ານບົດລາຍງານການເຄື່ອນໄຫວວຽກງານຂອງບ້ານໃນໄລຍະຜ່ານມາ, ຊຶ່ງບ້ານນາໄຊສະຫ່ວາງ ໄດ້ສ້າງຕັ້ງຂຶ້ນ ໃນປີ 1997, ຫ່າງຈາກເທສະບານ ເມືອງລ້ອງແຈ້ງ ປະມານ 106 ກິໂລແມັດ, ມີ 208 ຫຼັງຄາເຮືອນ, ມີ 261 ຄອບຄົວ, ມີ 13 ໜ່ວຍ ສາມັກຄີ, ມີພົນລະເມືອງທັງໝົດ 1.121 ຄົນ, ຍິງ 537 ຄົນ, ມີສອງຊົນເຜົ່າຢູ່ຮ່ວມກັນຄື: ຊົນເຜົ່າລາວລຸ່ມ ແລະຊົນເຜົ່າຂະມຸ, ປະຊາຊົນພາຍໃນບ້ານສ່ວນຫຼາຍ ແມ່ນຢຶດຖືການປູກຝັງລ້ຽງສັດ ເປັນອາຊີບຕົ້ນຕໍ ແລະອາຊີບກໍາມະກອນເປັນສໍາຮອງ, ໃນໄລຍະຜ່ານມາອໍານາດການປົກຄອງບ້ານໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ປະຊາຊົນ ພາຍໃນບ້ານຢ່າງເປັນປົກກະຕິເພື່ອໃຫ້ເຂົາເຈົ້າໄດ້ຮັບຮູ້ ແລະເຂົ້າໃຈ ຕໍ່ແນວທາງຂອງພັກ,ລະບຽບກົດ ໝາຍຂອງລັດປະກອບສ່ວນເຂົ້າໃນວຽກງານຕ່າງໆຂອງຂັ້ນເທິງໂດຍສະເພາະກໍຄືການສ້າງຄົນ, ຄອບຄົວ ແລະບ້ານວັດທະນະທໍາຕິດພັນກັບມູນເຊື້ອດຸໝັ່ນຂະຍັນພຽນໃນການທໍາການຜະລິດເພື່ອສ້າງເສດຖະ ກິດຄອບຄົວໃຫ້ມີບາດກ້າວຂະຫຍາຍຕົວດີຂຶ້ນເທື່ອລະກ້າວ.

 ໃນພິທີໄດ້ມີການມອບໃບຢັ້ງຢືນບ້ານນາໄຊສະຫ່ວາງ ເປັນບ້ານແມ່ຍິງ 3 ດີ,ບ້ານສາທາລະນາສຸກ ແລະບ້ານວັດທະນະທໍາຊຶ່ງມອບໂດຍເຈົ້າເມືອງລ້ອງແຈ້ງ,ໂອກາດດັ່ງກ່າວຮອງເຈົ້າແຂວງໄຊສົມບູນ ໄດ້ມີຄໍາເຫັນໂອ້ລົມໂດຍຍົກໃຫ້ເຫັນເຖິງຄວາມໝາຍ-ຄວາມສໍາ ຄັນຂອງວຽກງານສ້າງຄົນ, ສ້າງ ຄອບຄົວ ແລະສ້າງບ້ານໃຫ້ກາຍ ເປັນບ້ານວັດທະນະທໍາ, ທັງໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງເປັນຕົ້ນແມ່ນອໍານາດການປົກຄອງບ້ານຕະຫຼອດຮອດພໍ່ແມ່ປະຊາຊົນພາຍໃນບ້ານຈົ່ງພ້ອມກັນປົກປັກຮັກສາມູນເຊື້ອວັດທະນະທໍາໃຫ້ຢູ່ຄຽງຄູ່ກັບບ້ານນາໄຊສະຫວ່າງຕະຫຼອດໄປເພື່ອໃຫ້ສາມາດກາຍເປັນບ້ານພັດທະນາໃນອະນາຄົດ,ຈາກນັ້ນ, ໄດ້ມີພິທີລັ່ນຄ້ອງ 9 ບາດ ແລະເປີດປ້າຍບ້ານນາໄຊສະຫວ່າງເປັນບ້ານວັດທະນະທໍາຢ່າງເປັນທາງການ.

-----------------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์