ຍົກ 3 ເອກະສານສໍາຄັນຂື້ນຫາລືໃນກອງປະຊູມລັດຖະບານ

  ກອງປະຊຸມລັດຖະບານສະໄໝສາມັນປະຈຳເດືອນຕຸລາ 2019 ໄດ້ດຳເນີນຢ່າງເປັນທາງການໃນວັນທີ 25 ຕຸລາ 2019 ທີ່ສຳນັກງານນາຍົກລັດຖະມົນຕີ, ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ; ມີບັນດາທ່ານຮອງນາຍົກລັດຖະມົນຕີ ແລະສະມາຊິກລັດຖະບານເຂົ້າຮ່ວມຢ່າງພ້ອມພຽງ.

  ກອງປະຊຸມລັດຖະບານຄັ້ງນີ້, ໄດ້ພ້ອມກັນຄົ້ນຄວ້າ, ປຶກສາຫາລື ແລະພິຈາລະນາ 3 ເອກະສານສໍາຄັນຄື:

      1. ກອງປະຊຸມໄດ້ຮັບຮອງດ້ານຫຼັກການບົດສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາປະຈຳປີ  2019 ແລະ ທິດທາງແຜນການປະຈຳປີ 2020, ພ້ອມນີ້ໄດ້ມອບໃຫ້ກະຊວງແຜນການ ແລະ ການລົງທຶນປະສານສົມທົບກັບກະຊວງການເງິນ, ທະນາຄານແຫ່ງ ສປປ ລາວ ແລະພາກສ່ວນກ່ຽວຂ້ອງປັບປຸງບົດລາຍງານດັ່ງກ່າວຕາມການປະກອບຄໍາເຫັນຂອງກອງປະຊຸມ, ພ້ອມທັງກະກຽມລາຍງານຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດຊຸດທີ VIII ໃນເດືອນພະຈິກ 2019 ເພື່ອພິຈາລະນາ ແລະອອກມະຕິຮັບຮອງ.

     2. ກອງປະຊຸມໄດ້ຮັບຟັງການລາຍງານກ່ຽວກັບຜົນຂອງການຈັດຕັ້ງປະຕິບັດບົດບັນທຶກຄວາມເຂົ້າໃຈເພື່ອສຶກສາ,ສຳຫຼວດຄວາມເປັນໄປໄດ້ ແລະອອກແບບພັດທະ ນາໂຄງການພັດທະນາຕົວເມືອງທັນສະໄໝ AMATA Smart and Eco City ຢູ່ແຂວງຫຼວງນໍ້າທາ ແລະ ແຂວງອຸດົມໄຊ ກອງປະຊຸມເຫັນວ່າໂຄງການດັ່ງກ່າວເປັນໂຄງການທີ່ມີການວິເຄາະວິໄຈເສດຖະກິດດີສົມຄວນທັງສອດຄ່ອງກັບທິດທາງຂອງລັດຖະບານໃນການສົ່ງເສີມການລົງທຶນ,ການຜະລິດພາຍໃນແລະການພັດທະນາຕາມແລວທາງລົດໄຟລາວ-ຈີນ ພ້ອມກັນນັ້ນກໍ່ເຫັນວ່າຜູ້ລົງທຶນມີບົດຮຽນ, ມີທຶນຮອນ, ມີຊື່ສຽງ ແລະມີປະສົບການຈາກການລົງທຶນຂະໜາດໃຫຍ່ຢູ່ຫຼາຍປະເທດມາແລ້ວເປັນຕົ້ນ ຫວຽດນາມ, ມຽນມາ ແລະໄທ,ທັງມີຄວາມຕັ້ງໃຈ ແລະພະຍາຍາມສູງເຖິງແມ່ນວ່າພື້ນທີ່ດັ່ງກ່າວຈະມີຄວາມຫຍຸ້ງຍາກ, ເປັນພູຜາ,ຍັງບໍ່ທັນມີພື້ນຖານໂຄງລ່າງ ແລະການລົງທຶນກໍຈະມີມູນຄ່າສູງດັ່ງນັ້ນ, ຖ້າໂຄງການນີ້ໄດ້ຮັບການຈັດຕັ້ງປະຕິບັດກໍ່ຈະເປັນການສະໜັບສະໜູນການນຳໃຊ້ໂຄງການທາງລົດໄຟ ລາວ-ຈີນ ແລະຈະປະກອບສ່ວນສໍາຄັນຕໍ່ການພັດທະນາເສດຖະກິດ-ສັງຄົມຂອງປະເທດເຮົາ.

   ແຕ່ເຖິງຢ່າງໃດກໍ່ຕາມ, ເນື່ອງຈາກໂຄງການດັ່ງກ່າວຕິດພັນກັບການສະເໜີຂໍນະໂຍບາຍສົ່ງເສີມການລົງທຶນ ແລະ ການຊົດເຊີຍໃຫ້ແກ່ຜູ້ໄດ້ຮັບຜົນກະທົບ, ກອງປະ ຊຸມຈຶ່ງມອບໃຫ້ກະຊວງແຜນການ ແລະ ການລົງທຶນເປັນເຈົ້າການສົມທົບກັບຂະແໜງການ ແລະ ທ້ອງຖິ່ນກ່ຽວຂ້ອງຄົ້ນຄວ້າບັນດາຂໍ້ສະເໜີ ແລະ ເຈລະຈາກັບບໍລິສັດເພື່ອຮັບປະກັນຜົນປະໂຫຍດຂອງປະເທດຊາດ ແລະ ປະຊາຊົນ, ຫຼີກເວັ້ນຜົນກະທົບຕ່າງໆທີ່ຈະເກີດຂຶ້ນໂດຍສະເພາະຜົນກະທົບທາງດ້ານສິ່ງແວດລ້ອມ ແລະ ສັງຄົມພ້ອມທັງຮັບປະກັນຄວາມສະຫງົບ ແລະຄວາມເປັນລະບຽບຮຽບຮ້ອຍ, ຫຼັງຈາກນັ້ນໃຫ້ມາລາຍງານຜົນການເຈລະຈາເພື່ອໃຫ້ລັດຖະບານພິຈາລະນາຕໍ່ໄປ.

    3. ກອງປະຊຸມໄດ້ຮັບຟັງລາຍງານຄວາມຄືບໜ້າ ແລະ ທິດທາງແຜນການການຈັດຕັ້ງປະຕິບັດວຽກຮ່ວມມືສອງຝ່າຍລາວ-ຫວຽດນາມ, ລາວ-ຈີນ ແລະລາວ-ກຳ ປູເຈຍ ແລະໄດ້ຊີ້ນຳໃຫ້ຂະແໜງການກ່ຽວຂ້ອງເອົາໃຈໃສ່ຕິດຕາມ, ຊຸກຍູ້ ແລະແກ້ໄຂບັນດາຂອດຄົງຄ້າງເພື່ອຜັນຂະຫຍາຍ ແລະຈັດຕັ້ງປະຕິບັດເນື້ອໃນເອກະສານ, ໂຄງການ ແລະກິດຈະກຳການຮ່ວມມືທີ່ໄດ້ຕົກລົງກັນໃຫ້ມີປະສິດທິຜົນ.

ສະໜັບສະໜຸນໂດຍ: ສ່ວນບຸກຄົນ

  ເພື່ອຈັດຕັ້ງປະຕິບັດທິດຊີ້ນຳຂອງກອງປະຊຸມລັດຖະບານສະໄໝສາມັນປະຈຳເດືອນຕຸລາ 2019 ໃຫ້ມີປະສິດທິຜົນ, ກອງປະຊຸມມອບໃຫ້ຫ້ອງວ່າການສໍານັກງານນາ ຍົກລັດຖະມົນຕີຜັນຂະຫຍາຍຜົນກອງປະຊຸມລັດຖະບານໃນຄັ້ງນີ້ເປັນມະຕິ ແລະ ແຈ້ງການເປັນອັນລະອຽດຕື່ມເພື່ອມອບຄວາມຮັບຜິດຊອບໃຫ້ບັນດາຄະນະກຳມະ ການ, ຂະແໜງການ ແລະ ທ້ອງຖິ່ນທີ່ີກ່ຽວຂ້ອງນໍາໄປຈັດຕັ້ງປະຕິບັດ; ມອບໃຫ້ສະມາຊິກລັດຖະບານເອົາໃຈໃສ່ນຳພາຊີ້ນໍາການຈັດຕັ້ງປະຕິບັດວຽກງານຈຸດສຸມປະຈໍາເດືອນພະຈິກທີ່ກ່ຽວຂ້ອງກັບຄວາມຮັບຜິດຊອບຂອງຕົນໃຫ້ມີປະສິດທິຜົນ, ພ້ອມທັງສະຫຼຸບລາຍງານຜົນການຈັດຕັ້ງປະຕິບັດໃຫ້ຫ້ອງວ່າການສຳນັກງານນາຍົກລັດຖະ ມົນຕີພາຍໃນວັນທີ 15 ພະຈິກ 2019.

ສະໜັບສະໜຸນໂດຍ: HONDA

 ----------------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

      

แชร์