ພຸດທະສາສະນິກະຊົນ ຮ່ວມໃສ່ບາດ ທໍາມະຍາດຕາ 5 ແຜ່ນດິນ

  ຕອນເຊົ້າວັນທີ 26 ຕຸລາ 2019, ປະຊາຊົນພຸດທະສາສະນິກະຊົນທົ່ວນະຄອນຫຼວງວຽງຈັນ ໄດ້ຮ່ວມພິທີໃສ່ບາດພະສົງ 300 ກວ່າອົງໃນໂຄງການທໍາມະຍາດຕາ 5 ແຜ່ນດິນລຸ່ມແມ່ນໍ້າຂອງ  ຄື: ສປປ ລາວ, ຣາຊະອານາຈັກໄທ, ມຽນມາ, ສສ ຫວຽດນາມ ແລະກຳປູເຈຍ ຄັ້ງທີ 2 ຢູ່ພະທາດຫຼວງວຽງຈັນ ໂດຍມີພະອາຈານ ໃຫຍ່ມະຫາງອນ ດຳລົງບຸນປະທານສູນກາງພຸດທະສາສະໜາສຳພັນລາວ, ທ່ານ ໄຊສົມພອນ ພົມວິຫານ ປະທານສູນກາງແນວລາວ ສ້າງຊາດ.

ທ່ານ ບຸນທ່ຽງ ຂຸນສີ ປະທານ ແນວລາວສ້າງຊາດນະຄອນຫຼວງ ວຽງຈັນ ກ່າວວ່າ: ວຽງຈັນ ເປັນນະຄອນຫຼວງຂອງ ສປປ ລາວ ປະກອບມີ 9 ຕົວເມືອງ, 481 ບ້ານ, ມີພົນລະເມືອງ 1,2 ລ້ານ ຄົນ, ເປັນນະຄອນຫຼວງທີ່ມີປະຫວັດ ສາດອັນຍາວນານໃນບັນດາປະ ເທດລຸ່ມແມ່ນໍ້າຂອງ,ຮອດປີ 2020ຈະມີອາຍຸເຖິງ 460 ປີ, ມີບູຮານ ສະຖານຫຼາຍແຫ່ງ, ມີທໍາມະຊາດ ທີ່ສວຍງາມ, ມີພື້ນຖານວັດຖຸ  ແລະ ຈິດໃຈຢູ່ຄຽງຄ້າງກັບວິຖີການດໍາລົງຊີວິດທີ່ເປັນເອກະລັກຂອງຄົນລາວ ກໍຄືປະຊາຊົນນະຄອນຫຼວງວຽງຈັນ.

ໂອກາດດັ່ງກ່າວທ່ານປະທານ ສູນກາງແນວລາວສ້າງຊາດ ໄດ້ ຂຶ້ນໃຕ້ທູບ-ທຽນບູຊາພະລັດຕະນະໄຕ ແລະຕີຄ້ອງ 9 ບາດ ເພື່ອເປັນສັນຍານແຫ່ງມະຫາມົງຄຸນໃນ ການເປີດພິທີ, ຈາກນັ້ນຄະນະທໍາມະຍາດຕາ ແລະຂະນະຮັບຜິດຊອບ ທີ່ກ່ຽວຂ້ອງໄດ້ຮ່ວມກັນປູກຕົ້ນພະສີມະຫາໂພ ຫຼື ຕົ້ນໂພ ເພື່ອຄວາມຮົ່ມເຢັນເປັນສຸກຕາມຮອຍພະພຸດທະເຈົ້າ ແລະພາຍຫຼັງສຳເລັດພິທີ ໃສ່ບາດຄະບວນທໍາມະຍາດຕາ 5 ແຜ່ນດິນກໍໄດ້ໄປຢ້ຽມຊົມສະຖານທີ່ທາງສາສະໜາເຊັ່ນ: ຫໍພະແກ້ວ, ປະຕູໄຊ, ວັດສີສະເກດ ແລະໄດ້ສະ ແດງທໍາຈະເລີນກໍາມະຖານທີ່ວັດອົງຕື້.

ທ່ານ ສຸພາໄຊ ວີລະພຸຊົງ ເລຂາທິການສະຖາບັນໂພທິຄະຍາວິດຊາໄລ ແລະຄະນະທໍາມະຍາດຕາ 5 ແຜ່ນດິນໄດ້ກ່າວວ່າ: ງານທຳມະຍາດຕາ 5 ແຜ່ນດິນລຸ່ມແມ່ນໍ້າຂອງ ເປັນງານ ຊຶ່ງສັນຍາລັກທີ່ມີເສົາ ທຳມະຈັກເປັນກົງລໍ້ທຳ,ຕະຫຼອດການເດີນທາງຂອງຂະບວນໄດ້ເຫັນສັດທາອັນໝັ້ນຄົງຂອງຊາວ ພຸດລຸ່ມແມ່ນໍ້າຂອງເຊັ່ນ: ການບິນ ທະບາດທີ່ຊາຍແດນໄທ-ມຽນມາ ມີຊາວພຸດຮ່ວມໃສ່ບາດ 20.000 ຄົນ, ຫຼັງຈາກສໍາເລັດພິທີທີ່ນະຄອນຫຼວງວຽງຈັນ ແລ້ວແມ່ນໄດ້ ເຄື່ອນຂະບວນໄປທີ່ວັດປ່າ (ວັງ ນາຄິນ) ຄໍາສະໂໜດ ແຂວງອຸ ດອນທານີ ປະເທດໄທພ້ອມຊົມສີ ລະປະວັດທະນະທໍາທ້ອງຖິ່ນ, ວັດພະທາດເຊິງຊຸນວໍລະວິຫານແຂວງ ສະກົນນະຄອນ ແລະສະຖານທີ່ສໍາ ຄັນຕ່າງໆຂອງປະເທດໄທ, ຈາກນັ້ນເດີນທາງຕໍ່ຈົນຮອດສຽມລຽບ ປະເທດກໍາປູເຈຍ ຕາມກໍານົດທີ່ ວາງໄວ້ຄືວັນທີ  29 ຕຸລາ  ເພື່ອເຮັດ ພິທີປິດໂຄງການທໍາມະຍາດຕາ 5 ແຜ່ນດິນ ລຸ່ມແມ່ນໍ້າຂອງໃນປີນີ້.

-------------------

 ໜັງສືພິມເສດຖະກິດ-ສັງຄົມ

แชร์