ທ່ຽວຊົມຕາດນົກເຄົ້າ ເມືອງລະມາມ

  ຕາດນົກເຄົ້າ ເປັນແຫຼ່ງ ທ່ອງທ່ຽວທາງທໍາມະຊາດທີ່ສວຍ ສົດງົດງາມອີກແຫ່ງໜຶ່ງທີ່ມີອາ ກາດສົດຊື່ນເໝາະແກ່ການພັກຜ່ອນຢ່ອນໃຈໃນຍາມວັນພັກ ໂດຍ ການໄປນັ່ງກິນລົມຊົມວິວສູບເອົາ ອາກາດສົດໆ, ກິ່ນຫອມຂອງດອກ ຄັດເຄົ້າ, ຟັງສຽງນົກໜູປູປີກຢ່າງ ສະອອນໃຈ, ຊຸມແຊວກິນເຂົ້າປ່າສາມັກຄີກັບຄອບຄົວ, ໝູ່ຄູ່ ຫຼື ຄົນຮັກ.

ຕາດນົກເຄົ້ານັບວ່າເປັນສະຖານທີ່ທ່ອງທ່ຽວທາງທໍາມະຊາດທີ່ສວຍສົດງົດງາມ, ຊຶ່ງຕາດແຫ່ງ ນີ້ກໍາເນີດເກີດຂຶ້ນຢູ່ຕາມລໍາຫ້ວຍ ວີ, ມີນໍ້າໄຫຼຜ່ານຕະຫຼອດປີ, ມີອາກາດເຢັນສົດຊື່ນແຕ່ຈະສັງເກດ ເຫັນວ່າຊ່ວງທີ່ມີນັກທ່ອງທ່ຽວ ເຂົ້າໄປທ່ຽວຊົມຫຼາຍທີ່ສຸດແມ່ນ ຊ່ວງລະດູແລ້ງເພາະຊ່ວງດັ່ງກ່າວນໍ້າຈະໄສສາມາດແນມເຫັນສັດນໍ້ານາໆຊະນິດໄດ້ດີ ແລະກະແສ ນໍ້າກໍຈະບໍ່ໄຫຼແຮງເໝາະແກ່ການລົງໄປຫຼິ້ນນໍ້າເພື່ອຜ່ອນຄາຍຄວາມອິດເມື່ອຍຍິ່ງສໍາຄັນໄປກວ່ານັ້ນ ໃນບໍລິເວນອ້ອມຮອບຕາດແມ່ນຈະປົກຄຸມໄປດ້ວຍປ່າໄມ່ທີ່ຂຽວສົດ ງົດງາມມີຄວາມອຸດົມໄປດ້ວຍພືດ ພັນທັນຍາຫານພ້ອມທັງເປັນແຫຼ່ງ ທໍາມາຫາກິນເພື່ອລ້ຽງຊີບໃນຊີ ວິດປະຈໍາວັນຂອງປະຊາຊົນຢູ່່ ແຖວນັ້ນນໍາອີກ.

ຕາດດັ່ງກ່າວໃນເມື່ອກ່ອນແມ່ນ ຊາວບ້ານໄດ້ພາກັນມາຫາກິນແລ້ວ ກໍໄດ້ພົບເຫັນໝູ່ນົກເຄົ້າມາເຮັດ ຮັງໃສ່ຢູ່ຕົ້ນໄມ້ໃຫຍ່ເທິງຕາດຕົ້ນ ໜຶ່ງຢ່າງເປັນປົກກະຕິດັ່ງນັ້ນຊາວ ບ້ານຈຶ່ງໄດ້ເອີ້ນຊື່ຕາດນີ້ວ່າ: ຕາດ ນົກເຄົ້າຈົນມາຮອດປະຈຸບັນນີ້.

ຖ້າຫາກໃຜຍັງບໍ່ທັນໄດ້ໄປສໍາ ຜັດກັບທໍາມະຊາດ-ອາກາດປອດ ໂປ່ງຂອງຕາດນົກເຄົ້າ ກໍສາມາດ ໄປທ່ຽວຊົມໄດ້ ໂດຍມີທີ່ຕັ້ງຢູ່ບ້ານ ໜອງບົງ ເມືອງລະມາມ ແຂວງ ເຊກອງ ຫ່າງຈາກເທສະບານເມືອງ ແລະແຂວງ 14 ກິໂລແມັດ ແລະ ຫ່າງຈາກເສັ້ນທາງເລກທີ 16 B ປະມານ 1,5-2 ກິໂລແມັດ ຊຶ່ງໄດ້ເລີ່ມເປີດບໍລິການນໍາໃຊ້ແຕ່ປີ 2008 ເປັນຕົ້ນມາສະນັ້ນຖ້າຫາກວ່າທ່ານໃດໄດ້ມາທ່ຽວແຂວງເຊກອງ ກໍຢ່າລືມແວ່ທ່ຽວຊົມສະຖານ ທີ່ແຫ່ງນີ້ຮັບຮອງວ່າທ່ານຈະບໍ່ຜິດຫວັງຢ່າງແນ່ນອນ.

------------------------------------

ພາບແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์