ປະທານາທິບໍດີ ຮົງກາຣີ ຢ້ຽມຢາມລາວຄັ້ງປະຫວັດສາດ

 ໂດຍຕອບສະໜອງຕາມການເຊື້ອເຊີນຂອງທ່ານ ບຸນຍັງ ວໍລະຈິດ, ປະທານປະເທດແຫ່ງສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ຢາໂນສ ອາແດຣ, ປະ ທານາທິບໍດີແຫ່ງສາທາລະນະລັດ ຮົງກາຮີ ພ້ອມດ້ວຍພັນລະຍາ ແລະຄະນະໄດ້ເດີນທາງມາຢ້ຽມຢາມລັດຖະກິດຄັ້ງປະຖົມມະລຶກຢູ່ສາທາລະນະລັດ ປະຊາທິປະໄຕ ປະ ຊາຊົນ ລາວ, ໃນລະຫວ່າງ ວັນທີ 24-27 ຕຸລາ 2019, ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະສາທາລະນະລັດ ຮົງກາຮີ ໃຫ້ແຕກດອກອອກຜົນຍິ່ງໆຂຶ້ນໃນອະນາຄົດ ແລະ ນັບເປັນຄັ້ງທຳອິດຂອງຜູ້ນຳສູງສຸດຮົງກາຮີທີ່ມາຢ້ຽມຢາມລາວ.

ໃນວັນທີ 25 ຕຸລາ 2019, ທີ່ທໍານຽບປະທານປະເທດ, ທ່ານ ບຸນຍັງ ວໍລະຈິດ ແລະບັນດາຜູ້ແທນຂັ້ນສູງຂອງລາວ, ໄດ້ຈັດພິທີຕ້ອນຮັບທ່ານ ຢາໂນສ ອາແດຣ, ຢ່າງເປັນທາງການ ແລະສົມກຽດ, ພາຍຫຼັງສຳເລັດພິທີຕ້ອນຮັບຢ່າງເປັນທາງການ, ທ່ານ ບຸນຍັງ ວໍລະຈິດ ພ້ອມດ້ວຍການນຳຂັ້ນສູງຂອງລາວໄດ້ດຳເນີນການພົບປະສອງຝ່າຍກັບທ່ານ ຢາໂນສ ອາແດຣ ແລະຄະນະຜູ້ແທນຂັ້ນສູງຂອງ ສ.ຮົງກາຮີ, ໃນການພົບປະຄັ້ງນີ້ ທ່ານ ບຸນຍັງ ວໍລະຈິດ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ທ່ານປະທານາທິບໍດີ ຢາໂນສ ອາແດຣ ທີ່ໄດ້ນຳພາຄະນະຜູ້ແທນຂັ້ນສູງຂອງ ສ.ຮົງກາຮີ ເດີນທາງມາຢ້ຽມຢາມລັດຖະກິດ ສປປ ລາວ ໃນຄັ້ງນີ້, ຊຶ່ງເປັນການປະ ກອບສ່ວນອັນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະການຮ່ວມມືອັນດີງາມຂອງສອງປະເທດລາວ-ຮົງກາຣີໃຫ້ນັບມື້ແຕກດອກອອກຜົນຍິ່ງຂຶ້ນ.

  ສອງຝ່າຍໄດ້ປຶກສາຫາລື ແລະຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດນັບມື້ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງ ແລະຂະ ຫຍາຍກວ້າງອອກໃນຫຼາຍດ້ານ ນັບແຕ່ສອງປະເທດໄດ້ສ້າງຕັ້ງສາຍພົວພັນການທູດນຳກັນໃນເດືອນກັນຍາ ປີ1962 ເປັນຕົ້ນມາ, ຊຶ່ງສະແດງອອກ ໃນການພົວພັນທາງດ້ານການເມືອງລະຫວ່າງສອງປະເທດສືບຕໍ່ໜັກແໜ້ນ, ມີການແລກປ່ຽນຄະນະຜູ້ແທນໃນຫຼາຍລະດັບນັບແຕ່ການນໍາລັດຖະບານລົງຮອດຂັ້ນວິຊາການເພື່ອແລກປ່ຽນຄໍາຄິດເຫັນ ແລະຖອດຖອນບົດຮຽນນໍາກັນ ແລະຮັດແໜ້ນຄວາມສາມັກຄີທີ່ມີມູນເຊື້ອລະຫວ່າງສອງປະເທດ, ສອງຝ່າຍມີຄວາມເຂົ້າອົກເຂົ້າໃຈອັນເລິກເຊິ່ງ ແລະເຄົາລົບ ນັບຖືເຊິ່ງກັນແລະກັນ, ສະໜັບສະໜູນເຊິ່ງກັນ ແລະກັນໃນເວທີພາກພື້ນ ແລະ ສາກົນ, ນອກຈາກນີ້, ລັດຖະບານລາວ ໄດ້ຕີລາຄາສູງຕໍ່ລັດຖະບານຮົງກາຣີທີ່ ໄດ້ສືບຕໍ່ຊ່ວຍເຫຼືອດ້ານວິຊາການໃນຂະແໜງກະສິກຳ,ການສຶກສາ,ລວມທັງໃຫ້ເງິນກູ້ຢືມທີ່ບໍ່ມີດອກເບ້ຍ, ໃນນັ້ນ, ຮົງກາຮີ ກໍ່ໄດ້ສືບຕໍ່ໃຫ້ທຶນການສຶກສາແກ່ ສປປ ລາວ ໃນລະດັບປະລິນຍາຕີ, ປະລິນຍາໂທ ແລະປະລິນຍາເອກເພີ່ມຂຶ້ນ, ຊຶ່ງໃນປະຈຸບັນມີນັກສຶກສາລາວຮຽນຢູ່ຮົງກາຮີຈໍານວນທັງໝົດ185 ຄົນ.

 ພ້ອມດຽວກັນນີ້, ສອງຝ່າຍຍັງໄດ້ປຶກສາຫາລືທິດທາງເພື່ອເສີມຂະຫຍາຍສາຍພົວພັນ ແລະການຮ່ວມມືໃນດ້ານຕ່າງໆໂດຍສະເພາະແມ່ນການຮ່ວມມືດ້ານການເມືອງ, ການທູດ, ກະສິກຳ, ການສຶກສາ, ການຄ້າ-ການລົງທຶນ, ການເງິນ, ວິທະຍາສາດ-ເຕັກໂນໂລຊີ,ຊັບພະຍາກອນທໍາມະຊາດ ແລະສິ່ງແວດລ້ອມ,ລວມທັງການຄຸ້ມຄອງນໍ້າແບບຍືນຍົງ ແລະ ຂະແໜງການອື່ນໆທີ່ທັງສອງຝ່າຍມີທ່າແຮງ, ພ້ອມທັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາພາກພື້ນ ແລະສາກົນຊຶ່ງຕ່າງຝ່າຍມີຄວາມສົນໃຈ ແລະມີຜົນປະໂຫຍດຮ່ວມກັນ.

  ໃນໂອກາດດຽວກັນນີ້, ທ່ານ ບຸນຍັງ ວໍລະຈິດ, ກໍໄດ້ສະແດງຄວາມຂອບໃຈຕໍ່ ລັດຖະບານ ແລະ ປະຊາຊົນຮົງກາຮີ ທີ່ໄດ້ໃຫ້ການຊ່ວຍເຫຼືອແລະສະໜັບສະໜູນ ສປປ ລາວ ໃນໄລຍະຜ່ານມາ, ໂດຍສະເພາະໃນປີ 2018, ລັດຖະບານຮົງກາຣີ ໄດ້ໃຫ້ການຊ່ວຍເຫຼືອບັນເທົາທຸກໃຫ້ແກ່ ສປປ ລາວ ໂດຍສະໜອງ ແລະ ຕິດຕັ້ງເຄື່ອງຕອງນໍ້າສະອາດຈໍານວນໜຶ່ງໃຫ້ແກ່ປະຊາຊົນທີ່ປະສົບໄພພິບັດທໍາມະຊາດອັນຮ້າຍແຮງ ແລະບໍ່ເຄີຍມີມາກ່ອນ ຢູ່ ແຂວງອັດຕະປື ກໍຄືການສະແດງຄວາມເສຍໃຈ ແລະເຫັນໃຈຕໍ່ປະຊາຊົນໃນບັນດາແຂວງພາກໃຕ້ຂອງ ສປປ ລາວ ທີ່ໄດ້ຮັບ ຜົນກະທົບຈາກອຸທົກກະໄພອັນຮ້າຍແຮງເມື່ອບໍ່ດົນມານີ້ ແລະ ຄໍາສະເໜີອັນມີມະນຸດສະທໍາ ແລະເອື້ອເຟື້ອເພື່ອແຜ່ຂອງລັດຖະບານຮົງກາຮີ ທີ່ຈະສືບຕໍ່ໃຫ້ການຊ່ວຍເຫຼືອບັນເທົາທຸກແກ່ປະຊາຊົນລາວໃນແຂວງດັ່ງກ່າວ.

ໃນວັນດຽວກັນ, ພະນະທ່ານ ຢາໂນສ ອາແດຣ ພ້ອມດ້ວຍຄະນະຍັງໄດ້ພົບປະກັບ ທ່ານ ທອງລຸນ ສີສຸລິດ, ນາ ຍົກລັດຖະມົນຕີແຫ່ງ ສປປລາວ ແລະ ທ່ານ ນາງ ປານີ ຢ່າທໍ່ຕູ້, ປະທານສະພາແຫ່ງຊາດຕື່ມອີກ.

  ການຢ້ຽມຢາມຄັ້ງນີ້ເປັນຄັ້ງປະຫວັດສາດຂອງຜູ້ນຳຂັ້ນສູງສຸດຂອງຮົງກາຣີ ແລະໄດ້ດໍາເນີນໄປດ້ວຍບັນຍາກາດອັນ ອົບອຸ່ນ, ເຕັມໄປດ້ວຍໄມຕີຈິດ-ມິດຕະ ພາບ ແລະໄດ້ຮັບຜົນສໍາຢ່າງຈົບງາມຊຶ່ງໄດ້ເປັນນິມິດໝາຍອັນສຳຄັນໃນການເສີມຂະຫຍາຍສາຍພົວພັນມິດຕະພາບ ແລະການຮ່ວມມືທີ່ເປັນມູນເຊື້ອອັນດີງາມລະຫວ່າງລາວ-ຮົງກາຮີໃຫ້ໜັກແໜ້ນ ແລະແຕກດອກອອກຜົນຍິ່ງໆຂຶ້ນ.

-------------

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์