9 ເດືອນ ເມືອງທ່າແຕງ ຈັດເກັບລາຍຮັບ ໄດ້ 2 ຕື້ກວ່າກີບ

  ໃນໄລຍະ 9 ເດືອນຂອງ ປີ 2019 ເມືອງທ່າແຕງ ແຂວງ ເຊກອງ ຈັດເກັບລາຍຮັບເຂົ້າງົບ ປະມານໄດ້ 2,9 ຕື້ກີບ ເທົ່າກັບ 75% ຂອງແຜນການປີ, ເມື່ອ ທຽບໃສ່ໄລຍະດຽວກັນຂອງປີ ຜ່ານມາແມ່ນຫຼຸດລົງ.

ທ່ານ ສຸວັນ ສ້ອຍທະວົງສາ ຫົວໜ້າຫ້ອງການ-ການເງິນ ເມືອງ ທ່າແຕງ ລາຍງານຕໍ່ກອງປະຊຸມ ສະຫຼຸບຖອດຖອນບົດຮຽນການ ຈັດຕັ້ງປະຕິບັດແຜນງົບປະມານ ແຫ່ງລັດ 9 ເດືອນ ແລະວາງແຜນ ຈັດເກັບລາຍຮັບ 3 ເດືອນທ້າຍປີ 2019 ເມື່ອບໍ່ດົນມານີ້ວ່າ: ການຈັດຕັ້ງປະຕິບັດແຜນງົບປະມານແຫ່ງລັດໃນການຈັດເກັບລາຍຮັບ ເຂົ້າງົບປະມານໃຫ້ໄດ້ຕາມແຜນ ຫຼື ລື່ນແຜນການທີ່ກຳນົດໄວ້ຕາມ ຕົວເລກທີ່ແບ່ງປັນໃຫ້ທ່ວງທັນ ກັບເວລາ, ຖືກຕ້ອງ-ໂປ່ງໃສ ແລະສາມາດກວດສອບໄດ້ນັ້ນແມ່ນ ເງື່ອນໄຂອັນຈຳເປັນພາວະວິໃສ ໃຫ້ແກ່ການກະຕຸກຊຸກຍູ້ບັນດາຫົວ ໜ່ວຍງົບປະມານທີ່ມີລາຍຮັບ, ຄ່າທຳນຽມ ແລະຄ່າບໍລິການ, ຜູ້ປະກອບການໃນການຈັດຕັ້ງປະຕິບັດຈັດເກັບລາຍຮັບເຂົ້າງົບປະ ມານແຫ່ງລັດ.

ທ່ານ ສຸວັນ ສ້ອຍທະວົງສາ ກ່າວຕື່ມວ່າ: ມາຮອດປະຈຸບັນການຈັດເກັບລາຍຮັບເຂົ້າງົບປະມານໄດ້ທັງໝົດ 2,9 ຕື້ກີບ, ຊຶ່ງ ລາຍຮັບສ່ວນໃຫຍ່ແມ່ນໄດ້ຈາກ ສ່ວຍສາອາກອນ 2,3 ຕື້ກີບ ແລະຊັບສິນຂອງລັດປະຕິບັດໄດ້ 594 ລ້ານກ່ວາກີບ, ໃນຂະນະທີ່ລາຍຮັບຈາກການດຸ່ນດຽ່ງຂອງແຂວງຈຳນວນ 27,5 ຕື້ກີບ, ໂດຍ  ປະຕິບັດລາຍຈ່າຍເງິນເດືອນ, ເງິນ ອຸດໜູນ, ເງິນບໍລິຫານ, ເງິນດັດ ສົມ, ເງິນແຮ ແລະເງິນລົງທຶນທັງ ໝົດ 30,4 ຕື້ກີບ.

ແຕ່ເຖິງຢ່າງໃດກໍດີ ສຳລັບ 3 ເດືອນທ້າຍປີ 2019 ນີ້ ບັນດາຂະ ແໜງການທີ່ກ່ຽວຂ້ອງພ້ອມຢືນ ຢັນຈະຊອກທຸກວິທີທາງເພື່ອຈັດ ເກັບລາຍຮັບວິຊາການເຂົ້າງົບປະມານແຫ່ງລັດໃຫ້ບັນລຸຕາມແຜນ ການທີ່ວາງໄວ້, ໂດຍຈະເປັນເຈົ້າ ປະຕິບັດພາລະບົດບາດ, ສິດ ແລະ ໜ້າທີ່ຂອງຕົນຢ່າງເຕັມປ່ຽມພ້ອມ ທັງຈັດເກັບລາຍຮັບແຕ່ຫົວທີ ແລະ ມີຄວາມຮັບຜິດຊອບສູງຕໍ່ລະບຽບຫຼັກການ-ການເງິນ ເພື່ອຮັບປະກັນ ການຈັດເກັບລາຍຮັບເຂົ້າງົບປະມາໃຫ້ຫຼາຍຂຶ້ນ.

------------------------------------

ພາບ ແລະຂາ່ວຈາກ: ໜັງສືພິມເສດຖະກິດ-ສັງຄົມ

แชร์