ກະລຶມເລີ່ມເສຍຄ່າທາງ ແລະພາສີທີ່ດິນຜ່ານທະນາຄານ

 ວັນທີ 24 ຕຸລາ 2019 ສ່ວຍສາອາກອນ, ເຈົ້າໜ້າທີ່ຕໍາຫຼວດຈາລະຈອນ, ທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາເຊກອງ ແລະຫ້ອງການໆເງິນເມືອງກະລຶມໄດ້ຮ່ວມ ກັນຈັດພິທີເປີດຂະບວນການຊຸກຍູ້ເສຍຄ່າທໍານຽມທາງກັບທີ່ຜ່ານລະບົບທະນາຄານຂຶ້ນຢູ່ຈຸດບ້ານແກ້ງກຸຍເມືອງກະລຶມໂດຍມີທ່ານ ສາຍຄໍາ ແກ້ວບຸນປານ ຮອງເຈົ້າເມືອງກະລຶມ,ທ່ານ ລໍາທອງ ຍົນມະຫາໄຊ ຫົວໜ້າສ່ວຍສາອາກອນແຂວງ, ທ່ານ ພັນໂທ ຊຽງກອງແກ້ວ ບຸດດາເຮືອງ ຮອງຫົວໜ້າຫ້ອງຕໍາຫຼວດກອງບັນຊາການ ປກສ ແຂວງ,ທ່ານ ສີບັງອອນ ດາລາວົງ ຫົວໜ້າຫ້ອງການໆເງິນເມືອງ; ພ້ອມນີ້ກໍມີຜູ້ຕາງໜ້າ ທຄຕລ ສາຂາເຊກອງ ແລະພາກກ່ຽວຂ້ອງ ເຂົ້າຮ່ວມ.

  ທ່ານ ລໍາທອງ ຍົນມະຫາໄຊ ໃຫ້ຮູ້ວ່າ: ເພື່ອປະຕິບັດຕາມແຜນການພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈໍາປີ 2019 ໂດຍສະເພາະແຜນການຈັດເກັບລາຍຮັບເຂົ້າງົບປະມານໃຫ້ບັນລຸຕາມເປົ້າໝາຍແຜນການທີ່ວາງໄວ້ແລະການປະຕິບັດພັນທະງົບປະມານແຫ່ງລັດກໍແມ່ນໜ້າທີ່ຂອງພົນລະເມືອງລາວທຸກໆຄົນຕ້ອງມີສ່ວນ ຮ່ວມ ໂດຍການເປີດຂະບວນການຊຸກຍູ້ ຄັ້ງນີ້ແມ່ນປະຕິບັດຕາມແຈ້ງການຂອງ ຫ້ອງວ່າການສໍານັກງານນາຍົກລັດຖະມົນຕີສະບັບເລກທີ1857/ຫສນຍ, ລົງວັນທີ 6 ພະຈິກ 2018; ແຈ້ງການ ຂອງລັດຖະມົນຕີກະຊວງການເງິນສະ ບັບເລກທີ 0013/ກງ, ລົງວັນທີ 2 ມັງ ກອນ 2019; ແຈ້ງການສະບັບເລກທີ 1066/ກງ, ລົງວັນທີ 8 ເມສາ 2019 ແລະແຈ້ງຂອງຜູ້ອໍານວຍການໃຫຍ່ ທະນາຄານການຄ້າຕ່າງປະເທດລາວມະຫາຊົນສະບັບເລກທີ 210/ທຄຕລ, ລົງວັນທີ 3 ກັນຍາ 2019 ຈຸດປະສົງແມ່ນເພື່ອໂຄສະນາກະຕຸກຊຸກຍູ້ບັນດາພະນັກງານ-ລັດຖະກອນ, ທະຫານ-ຕໍາຫຼວດ,ຫົວໜ່ວຍທຸລະກິດ ແລະປະຊາຊົນບັນດາເຜົ່າໃຫ້ມີຄວາມຕື່ນຕົວມາຊໍາລະຄ່າທໍາ ນຽມທາງ ແລະພາສີທີ່ດິນປະຈໍາປີ 2019 ຕາມແຜນການເກັບລາຍຮັບຂອງແຂວງທີ່ຂຶ້ນໄວ້ໃຫ້ສໍາເລັດ, ໂດຍປະຈຸບັນແຂວງເຊກອງສາມາດເກັບລາຍຮັບຈາກຄ່າທໍານຽມທາງ ແລະ ພາສີທີ່ດິນໄດ້ແລ້ວ 1,17 ຕື້ກວ່າກີບ, ໃນນີ້ຄ່າທໍານຽມທາງເກັບໄດ້ 393 ລ້ານກີບເທົ່າກັບ 69,77% ຂອງແຜນ ການ ແລະພາສີທີ່ດິນ 782 ລ້ານກີບເທົ່າກັບ 60,22% ຂອງແຜນການປີ.

ສະໜັບສະໜຸນໂດຍ: HONDA

 

 ການເປີດຂະບວນການຊຸກຍູ້ເສຍຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານປະຈໍາປີ 2019 ຢູ່ເມືອງກະລຶມຄັ້ງນີ້ອີກດ້ານໜຶ່ງກໍແມ່ນເປັນການຜັນຂະຫຍ າຍແຜນພັດທະນາການ ຫັນເປັນທັນສະໄໝຂອງຂະແໜງການ ເງິນ ໂດຍສະເພາະແມ່ນແຜນພັດທະນາຂະແໜງສ່ວຍສາອາກອນແຕ່ນີ້ຮອດປີ 2020 ຊຶ່ງແຜນການທໍາອິດແມ່ນການຫັນການຊໍາລະອາກອນທຸກປະເພດຜ່ານລະບົບທະນາຄານ ແລະໜຶ່ງໃນນັ້ນແມ່ນການຊໍາລະທໍານຽມທາງ ແລະພາສີທີ່ດິນ, ປະຈຸບັນການຊໍາລະຄ່າທໍານຽມທາງສາມາດຊໍາລະໄດ້ຫຼາຍຊ່ອງທາງຄື: ຜ່ານເຄົ້າເຕີ້ ທຄຕລ, ຜ່ານ BCEL one, ຜ່ານຕູ້ເອທີເອັມ ATM ແລະອື່ນໆ.

ສະໜັບສະໜຸນໂດຍ: ສ່ວນບຸກຄົນ

 

ຕອນທ້າຍ ທ່ານ ລໍາທອງ ຍົນມະຫາໄຊ ຫົວໜ້າສ່ວຍສາອາກອນແຂວງຍັງໄດ້ເຊີນຊວນ ແລະຮຽກຮ້ອງມາຍັງອົງການຈັດຕັ້ງພັກ-ລັດ, ຫົວໜ່ວຍທຸລະກິດ ແລະປະຊາ ຊົນບັນດາເຜົ່າພາຍໃນແຂວງເຊກອງ ໂດຍສະເພາະເມືອງກະລຶມໃຫ້ພ້ອມກັນມາປະກອບສ່ວນມອບພັນທະເຂົ້າງົບປະມານແຫ່ງລັດດ້ວຍການແຈ້ງເສຍຄ່າທໍານຽມທາງ ແລະພາສີທີ່ດິນປະຈໍາປີ 2019 ຮັບປະກັນໃຫ້ໄດ້ໝາກຜົນ ແລະປະສິດທິພາບສູງຕາມຈຸດປະສົງຄາດໝາຍແຜນການທີ່ວາງໄວ້.

______

ຂຽນໂດຍ: ສັນຍາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์