ສຳເລັດ 99,99% ບ້ານຈັດສັນໃໝ່ໃຫ້ຜູ້ຖືກໂຄງການສ້າງເຂື່ອນໄຟຟ້ານໍ້າຫີນບູນ

 ໂຄງການກໍ່ສ້າງເຂື່ອນໄຟຟ້ານໍ້າຫີນບູນ ເມືອງຄູນຄຳ ແຂວງຄຳມ່ວນ ໃນຜ່ານມາໄດ້ເລັ່ງມືໃນການຈັດຕັ້ງປະຕິບັດກໍ່ສ້າງບ້ານຈັດສັນໃໝ່ໃຫ້ປະຊາຊົນທີ່ຖືກໂຄງການຊຶ່ງມາຮອດປະຈຸບັນສຳເລັດແລ້ວ 99,99% ຊຶ່ງໄດ້ມີການຍົກຍ້າຍຜູ້ຖືກກະທົບເຂົ້າຢູ່ ແລະມີຊີວິດການເປັນຢູ່ດີຂຶ້ນກວ່າເກົ່າຂະນະທີ່ສະຫຼຸບລວມຕົວເລກທົດແທນດ້ານຊັບ ສິນ ແລະ ຜົນລະປູກຂອງປະຊາຊົນມີທັງໝົດ 33,33 ຕື້ກີບ.

  ກອງປະຊຸມລາຍງານການຈັດຕັ້ງປະຕິບັດກ່ຽວກັບການຍົກຍ້າຍບັນດາບ້ານທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳຫີນບູນໄດ້ຈັດຂຶ້ນໃນວັນທີ 17 ຕຸລາຜ່ານມາທີ່ແຂວງຄຳມ່ວນຊຶ່ງເຂົ້າຮ່ວມມີທ່ານ ຄຳສີ ອຸດທິວົງ ຮອງເຈົ້າແຂວງໆຄຳມ່ວນ, ທ່ານ ແກ້ວລັນດອນ ຈັນທະປານີ ເຈົ້າເມືອງຄູນຄຳ ແລະ ທ່ານ ໂກມົນຈັນ ເພັດອາສາ ຮອງຜູ້ອຳນວຍການໃຫຍ່ລັດວິສາຫະກິດໄຟຟ້າລາວພ້ອມກັບພາກສ່ວນທີ່ກ່ຽວຂ້ອງເຂົ້າຮ່ວມ.

  ໃນກອງປະຊຸມໄດ້ມີການລາຍງານກ່ຽວກັບການຊົດເຊີຍຜົນກະທົບຂອງໂຄງການກໍ່ສ້າງເຂື່ອນໄຟຟ້ານໍ້າຫີນບູນຊຶ່ງປະກອບມີ 4 ບ້ານຄື: ບ້ານໂພນທອງ, ໜອງຮາງ, ຜາຄ້ອງ ແລະບ້ານນາຊ້າງຂາມມີ 441 ຫຼັງຄາເຮືອນ 575 ຄອບຄົວ ຊຶ່ງໄລຍະຜ່ານມາທາງໂຄງການໄດ້ສົມທົບກັບອຳນາດການປົກຄອງທ້ອງຖິ່ນ ແລະສາມາດເກັບກຳຂໍ້ມູນຜົນກະທົບທາງດ້ານຊັບສິນ, ຜົນລະປູກພ້ອມທັງຄິດໄລ່ຄ່າທົດແທນເພື່ອມອບໃຫ້ປະຊາຊົນ 4 ບ້ານດັ່ງກ່າວໄດ້ສຳເລັດເປັນທີ່ຮຽບຮ້ອຍແລ້ວລວມມູນຄ່າ 33,33 ຕື້ກີບ.

ສະໜັບສະໜຸນໂດຍ: HONDA

ນອກຈາກນັ້ນຍັງໄດ້ບຸກເບີກເນື້ອທີ່ດິນ ແລະຕັ້ງເປັນບ້ານໃໝ່ຄູນມະນີມີເນື້ອທີ່ທັງຫມົດ 108 ເຮັກຕາກວມເອົາດິນປະຊາຊົນຈຳນວນ 28 ເຈົ້າແຕ່ໂຄງການໄດ້ຊົດເຊີຍສຳເລັດແລ້ວເປັນເງິນ 726,28 ລ້ານກີບ ແລະຍັງໄດ້ສ້າງບ້ານຈັດສັນເພື່ອໃຫ້ເປັນບ່ອນຢູ່ອາໄສໃໝ່ແກ່ປະຊາຊົນມາຮອດປະຈຸບັນແມ່ນສາມາດຈັດຕັ້ງປະຕິບັດສຳເລັດ 99,99%, ພ້ອມນັ້ນທາງໂຄງການຍັງໄດ້ສະໜອງເຂົ້າ ແລະຊີ້ນໃຫ້ແກ່ປະຊາຊົນທີ່ຍົກຍ້າຍມາຢູ່ບ້ານໃໝ່ຄູນມະນີແລ້ວ 3 ງວດລວມ ມີເຂົ້າຈຳນວນ213,8 ພັນໂຕນ ແລະ ຄ່າທາດໂປຣຕີນເປັນເງິນ 557,89 ລ້ານກີບ.

 ຄຽງຄູ່ກັບຜົນສຳເລັດກໍ່ຍັງມີຂໍ້ຄົງຄ້າງຊຶ່ງທາງໂຄງການຈະໄດ້ຮ່ວມກັບບັນດາຄະນະກຳມະການ ແລະກອງເລຂາປະສານງານຊຸກຍູ້ໂຄງການລວມເຖິງອຳນາດການປົກ ຄອງທ້ອງຖິ່ນເພື່ອເລັ່ງປະຕິບັດໃຫ້ສໍາເລັດຕາມແຜນການພັດທະນາຂອງພັກ-ລັດ ໃນການຍົກລະດັບເສດຖະກິດ ແລະຊີວິດການເປັນຢູ່ຂອງປະຊາຊົນໃຫ້ນັບມື້ນັບດີຂຶ້ນ.

 ສຳລັບໂຄງການສ້າງເຂື່ອນໄຟຟ້ານໍ້າຫີນບູນມູນຄ່າການກໍ່ສ້າງທັງໝົດ 89,70 ລ້ານໂດລາ ປະມານ 789 ຕື້ ກວ່າກີບ ລວມມີກຳລັງການຕິດຕັ້ງ 30 ເມກາວັດ, ສາ ມາດຜະລິດໄຟຟ້າໄດ້ 155,25 ລ້ານກິໂລວັດໂມງຕໍ່ປີ ແລະມີລະບົບສາຍສົ່ງ 115 ກິໂລໂວນ ຍາວ 21,5 ກິໂລແມັດ ເພື່ອເຊື່ອມຕໍ່ເຂົ້າສະຖານີໄຟຟ້າຄອນເສົ່ງ,ພ້ອມ ກັນນັ້ນຍັງເປັນໂຄງການໜຶ່ງທີ່ສະໜອງນໍ້າໃຫ້ປະຊາຊົນເຮັດນາໃນລະດູແລ້ງໃນເນື້ອທີ່ 5-7 ພັນເຮັກຕາ.

ສະໜັບສະໜຸນໂດຍ: ສ່ວນບຸກຄົນ

 ໂຄງການດ່ັງກ່າວແມ່ນເປັນໂຄງການໜຶ່ງຂອງລັດວິສາຫະກິດໄຟຟ້າລາວ 100% ເພື່ອພັດທະນາພະລັງງານໄຟຟ້າໃຫ້ພຽງພໍກັບການຂະຫຍາຍໂຕຂອງເສດຖະກິດ- ສັງຄົມຂອງ ສປປ ລາວ ຕາມແຜນນະໂຍບາຍຂອງພັກ-ລັດຖະບານ ເພື່ອປະກອບສ່ວນຍົກລະດັບຊີວິດການເປັນຢູ່ຂອງປະຊາຊົນບັນດາເຜົ່າໃຫ້ມີຊີວິດການເປັນຢູ່ໃຫ້ດີຂຶ້ນ.

______________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์