ເມືອງນາໝໍ້ ຄາດເກັບກ່ຽວເຂົ້ານາປີສຳເລັດກາງເດືອນໜ້າ

  ການເກັບກ່ຽວມ້ຽນມັດເຂົ້ານາປີຂອງຊາວກະສິກອນຢູ່ເມືອງນາໝໍ້ ແຂວງອຸດົມໄຊ ມາຮອດປະຈຸບັນແມ່ນເປັນຂະບວນຟົດຟື້ນ ແລະສຳເລັດແລ້ວ 30% ຂອງເນື້ອທີ່ທັງໝົດ 3.189 ເຮັກຕາ ຄາດວ່າຈະໃຫ້ສໍາເລັດ 100% ກາງເດືອນພະຈິກ 2019 ນີ້.

  ທ່ານ ບຸນເຫຼື່ອມ ບາງແສງທອງ ຫົວໜ້າຫ້ອງການກະສິກຳ ແລະປ່າໄມ້ເມືອງນາໝໍ້ ແຂວງອຸດົມໄຊ ໃຫ້ຮູ້ວ່າ: ການຜະລິດປີນີ້ຖ້າທຽບໃສ່ປີຜ່ານມາເນື້ອທີ່ການປັກດຳຕົວຈິງຫຼຸດລົງຫຼາຍສົມຄວນ ປັກດຳໄດ້ພຽງແຕ່ 90% ຂອງ ເນື້ອທີ່ນາທົ່ວເມືອງ, ໂດຍສະເພາະ ມີຫຼາຍບ້ານເຂດນໍ້າແຊຕອນໃຕ້ ປັກດຳໄດ້ພຽງແຕ່ 40% ຂອງ ເນື້ອທີ່ນາໝົດບ້ານ, ສາເຫດ ຍ້ອນວ່າໄດ້ຮັບຜົນກະທົບໄພແຫ້ງ ແລ້ງແຕ່ຕົ້ນປີຝົນຕົກບໍ່ຖືກຕ້ອງຕາມລະດູການເຮັດໃຫ້ການຕົກກ້າຂອງປະຊາຊົນຫຼ້າຊ້າບາງບ່ອນພັດຖືກນໍ້າຖ້ວມສ້າງຜົນກະທົບຕໍ່ ການຜະລິດຫຼາຍສົມຄວນ, ໄປພ້ອມໆກັບການເກັບກ່ຽວມ້ຽນມັດເຂົ້ານາປີຊາວກະສິກອນຍັງໄດ້ສຸມໃສ່ເກັບກູ້ພືດຜົນລະປູກລະດູຝົນ ແລະສົ່ງເສີມການລ້ຽງສັດ ແລະການປະມົງເປັນຕົ້ນແມ່ນສາ ລີເກັບກູ້ສຳເລັດແລ້ວ 40% ຂອງ ເນື້ອທີ່ທັງໝົດ 1.156 ເຮັກຕາ, ໃນໄລຍະ 9 ເດືອນຜ່ານມາ ມີຈຳນວນສັດລ້ຽງໄດ້ຂະຫຍາຍຕົວເພີ່ມ ຂຶ້ນ ລວມທັງໝົດ 35.485 ໂຕ, ໃນນີ້ມີ: ງົວ 1.163 ໂຕ, ຄວາຍ 145 ໂຕ, ແບ້ 312 ໂຕ, ໝູ 4.207 ໂຕ, ໄກ່ 20.145 ໂຕ ແລະປາ 626 ໂຕເຖິງຈະມີຈຳນວນສັດລ້ຽງເພີ່ມຂຶ້ນແຕ່ການຕອບສະໜອງອັດຕາການບໍລິໂພກພາຍໃນເມືອງກໍຍັງບໍ່ທັນພຽງພໍສະເລ່ຍ 28 ກິໂລກຣາມຕໍ່ຄົນຕໍ່9 ເດືອ ນ, ທຽບໃສ່ແຜນປີປະຕິບັດໄດ້ 67%.

ສະໜັບສະໜຸນໂດຍ: ສ່ວນບຸກຄົນ

 

 ພາຍຫຼັງສຳເລັດການເກັບກູ້ ພືດລະດູຝົນແລ້ວທາງຫ້ອງການທີ່ກ່ຽວຂ້ອງຍັງຈະໄດ້ພ້ອມກັນລົງຊຸກຍູ້ສົ່ງເສີມໃຫ້ປະຊາຊົນ ແລະດຶງດູດເອົານັກທຸລະກິດມາສົ່ງເສີມການປູກພືດລະດູແລ້ງເປັນຕົ້ນແມ່ນຖົ່ວເບີຈຳນວນ 9 ບ້ານ, ເນື້ອທີ່ປະມານ 90 ເຮັກຕາ; ໝາກອຶຈຳນວນ 3 ບ້ານ, ເນື້ອທີ່ປະມານ 44 ເຮັກຕາ; ໝາກໂມຈຳນວນ 1 ບ້ານ, ເນື້ອທີ່ປະມານ 10 ເຮັກຕາ; ນອກຈາກນັ້ນຍັງຈະສົ່ງເສີມ ໃຫ້ປະຊາຊົນປູກອ້ອຍ, ຢາສູບ, ຜັກທຽມ-ຜັກບົ່ວຕື່ມອີກ.  

_____________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์